ތުރުކީގެ ފައުޖުތައް ގަތަރައް ފޮނުވުމަށް ތައްޔާރުވަނީ!

ގަތަރާއި ގަލްފްގެ ގައުމުތަކާ ދެމެދު އުފެދިފައިވާ ނުތަނަވަސްކަން ހޫނުވަމުން ދަނިކޮށް ތުރުކީގެ ސިފައިން ގަތަރަށް ފޮނުވުމަށް އަވަސް ތައްޔާރީތަކެއް ވަމުން އަންނަ ކަމަށް އަލްޖަޒީރާއިން ބުނެފިއެވެ.

ޚަބަރުތައް ބުނާ ގޮތުގައި ގަތަރުގެ މިލިޓަރީ ބޭސްގައި ތުރުކީގެ ސިފައިން ގާއިމް ވުމަށް ބޭނުންވާ ގާނޫނު ތުރުކީގެ ޕާލިމެންޓުން އަވަހަށް ފާސް ކުރުމުގެ މަސައްކަތް ތުރުކީން ވަނީ ފަށާފައެވެ.

ގަތަރައް ތުރުކީގެ ސިފައިން ފޮނުވުމަށް ކުރަންޖެހޭ މަސައްކަތްތައް ހަލުއި ކަމާއެކު ކުރިއަށްދާ ކަމަށް އޮފިޝަލުންނާ ހަވާލާދީ އަލްޖަޒީރާއިން ބުނެފައިވާއިރު، ތުރުކީ އަކީ ގަތަރަށް ވަރަށް ބޮޑަށް ތާއީދު ކޮށް އެއްބާރުލުން ދެމުން އަންނަ ގައުމެއްކަން ފާހަގަ ކުރެވެއެވެ. ގަލްފްގެ ބައެއް ގައުމުތަކުން ގަތަރާއެކު އޮންނަ ގުޅުން ކަނޑާލާ އަދަބު ދިނުމުގެ ގޮތުން ތަފާތު ފިޔަވަޅު ތައް އަޅަމުންދާއިރު، ތުރުކީގެ ރައީސް ތައްޔިބު އޮރުދުޣާން ވަނީ އެކަންކަމާމެދު ހިތްޕުޅު ހަމަޖެހިވަޑައިގެން ނުގަންނަވާ ކަމަށް ވިދާޅުވެ، ގަތަރާއެކު އޮންނަ ގުޅުން އިތުރަށް ބަދަހި ކުރައްވާނެ ކަމަށް ވިދާޅުވެފައެވެ.

މެދުއިރުމަތީގެ ބޮޑެތި ބާރުތަކުން ގަތަރު އެކަހެރިކޮށް ވިޔާފާރީގެ ރޮނގުން ދަތިކުރުމުގެ ފިޔަވަޅު އަޅަމުންދާ މި ދަނޑިވަޅުގައި ތުރުކީގެ އަސްކަރީ ފައުޖެއް ގަތަރަށް އަވަހަށް ފޮނުވުމަށް ނިންމުމަކީ، ތުރުކީން ގަތަރަށް ކުރާ ތާއީދު ހާމަވެގެންދާ ކަމެއް ކަމަށް މެދުއިރުމަތީގެ މަސްރަހު ދިރާސާ ކުރާ ފަރާތްތަކުން ދެކެއެވެ.

ސައުދީ އަރަބިއްޔާ އާއި، ޔުނައިޓެޑް އެރަބް އެމިރޭޓްސް އާއި، މިސްރާއި ބަހުރެއިނުން ވަނީ ގަތަރާއެކު އޮންނަ ސިޔާސީ އަދި ވިޔަރާރީގެ ގުޅުންތައް ކަނޑާލާފައެވެ.

މެދުއިރުމަތީގައި އޮންނަ އެމެރިކާގެ އެންމެ ބޮޑު މިލިޓަރީ ބޭސް ވެސް އޮންނަނީ ގަތަރުގައެވެ.

ގަތަރުގައި ތުރުކީގެ މިލިޓަރީ ބޭސް އެއް ގާއިމް ކުރުމުގެ އެއްބަސްވުމުގައި ދެ ގައުމުން ސޮއި ކުރީ 2014 ވަނަ އަހަރުއެވެ. މި އެއްބަސްވުމުގެ ދަށުން މިހާރުވެސް ގަތަރުގައި ތުރުކީގެ ސަތޭކަ ފަންސާސް ހާހެއްހާ ސިފައިން ތިބެއެވެ. ތުރުކީން ބޭނުންވަނީ މި އަދަދު ތިން ހާހަށް އިތުރު ކުރުމަށެވެ.