ވީޑިއޯ މުބާރާތުގެ ޕާޓްނަރުންނާއެކު ސޮއިކޮށްފި
1 މިނެޓުގެ ވީޑިއޯ ކްލިޕް ހުށައަޅަން ޖެހޭ
ޕާޓްނަރުންނާއެކު ސޮއި ކުރުމުގެ ރަސްމިއްޔާތުގެ ތެރެއިން
ރާއްޖޭގެ ރީތިކަން ދައްކުވައިދޭ "އެޑްވެންޗަރ އޮފް މޯލްޑިވްސް" ވީޑިއޯ ހެދުމުގެ މުބާރާތުގެ ޕާޓްނަރުންނާއެކު މޯލްޑިވްސް މާކެޓިންގ އެންޑް ޕީއާރު ކޯޕަރޭޝަން (އެމް.އެމް.ޕީ.އާރު.ސީ) އިން ބުރާސްފަތި ދުވަހު ސޮއިކޮށްފިއެވެ.
ވީޑިއޯ ހެދުމުގެ މުބާރާތުގެ ޕާޓްނަރުންގެ ގޮތުގައި ހަމަޖައްސާފައިވަނީ ދައުލަތުގެ މީޑިއާ ޕީއެސްއެމް އާއި ކޯ-ސްޕޮންސަރ ޔޫރޯ ސްޓޯރުގެ އިތުރުން ޓެކް ސްޓްރީޓްއެވެ.
މި މުބާރާތަކީ އެމް.އެމް.ޕީ.އާރު.ސީ އިން ރެޑް ބުލް އާއި ގުޅިގެން ބާއްވާ ދެ ވަނަ ފޭސްބުކް ވީޑިއޯ މުބާރާތެވެ. އަދި މި މުބާރާތަކީ ރާއްޖޭގައި ފަތުރުވެރިންނަށް ތަޖުރިބާ ކުރުމުގެ ފުރުސަތު ލިބޭ ތަފާތު ކަންކަމުގެ މައްޗަށް ތައްޔާރު ކުރާ 1 މިނެޓުގެ ވީޑިއޯ ކްލިޕް ހުށަހެޅުމަށް ބާއްވާ މުބާރާތެކެވެ.
މުބާރާތުގައި ސަރފްކުރުމާއި ސްނޯކްލިންގ ފަދަ ކަންތައްތައް ހިމަނައިގެން ވީޑިއޯ ތައްޔާރުކުރުމުގެ ފުރުސަތު ހުޅުވާލާފައިވާއިރު އެ މުބާރާތް ބޭއްވުމުގެ މަޤްސަދަކީ ފަތުރުވެރިންނަށް ތަޖުރިބާ ކުރެވެން ހުރި ކަންކަން މާކެޓް ކުރުން ކަމަށް ވެސް އެމް.އެމް.ޕީ.އާރު.ސީ އިން ބުނެއެވެ.
އެންމެ މޮޅު ވީޑިއޯ ތައްޔަރުކޮށް ހުށައަޅާ ފަރާތަކަށް އެއްލައްކަ ވިހި ހާސް ރުފިޔާ ހުށައަޅާފައިވާ އިރު، އެންމެ މޮޅު 10 ވީޑިއޯ އެމް.އެމް.ޕީ.އާރު.ސީގެ އޮފިޝަލް ޓުވިޓަރ އެކައުންޓްގައި ފީޗަރ ކުރުމަށް ވަނީ ނިންމާފައެވެ. އަދި މުބާރާތަށް ވީޑިއޯ ހުށަހަޅަން ބޭނުންވާ ފަރާތްތަކުން ވީޑިއޯ ހުށަހެޅުމަށް ހަމަޖެހިފައި ވަނީ ވިޒިޓް މޯލްޑިވްސް ވެބްސައިޓު މެދުވެރިކޮށް ކަމަށް އެ ކުންފުނިން ވަނީ ބުނެފައެވެ.
ވީޑިއޯ ހުށަހަން ޖެހެނީ އޮކްޓޯބަރު މަހުގެ 26 ވަނަ ދުވަހުން ނޮވެމްބަރު މަހުގެ 26 ވަނަ ދުވަހުގެ މެންދުރު 02:00 ޖެހުމާއި ހަމައަށެވެ. ވީޑިއޯތަކަށް ވޯޓުލުމަށް ފުރުސަތު ނޮވެމްބަރު 28 ވަނަ ދުވަހުން ފެށިގެން ޑިސެމްބަރު މަހުގެ 4 ވަނަ ދުވަހާއި ހަމައަށް ހުޅުވާލާނެ ކަމަށް އެމް.އެމް.ޕީ.އާރު.ސީ އިން ބުނެއެވެ.
އެމްއެމްޕީއާރްސީގެ ފަރާތުން މިދިޔަ އަހަރު ވެސް މި މުބާރާތް ބާއްވާފައިވާއިރު އޭރު މުބާރާތަށް 46 ވީޑިއޯ އާންމުން ވަނީ ހުށައަޅާފައެވެ.
