އައިޓީއެފްސީ އާއި އެސްޓީއޯއާ ދެމެދު ފައިނޭންސް އެއްބަސްވުމެއްގައި ސޮއިކޮށްފި

އިންޓަނޭޝަނަލް އިސްލާމިކް ޓްރޭޑް ފައިނޭންސް ކޯޕޮރޭޝަން (އައިޓީއެފްސީ) އާއި އެސްޓީއޯ އާ ދެމެދު 100 މިލިއަން ޑޮލަރު (1.5 ބިލިއަން ރުފިޔާ)ގެ މުރާބަހާ ފައިނޭންސް އެއްބަސްވުމެއްގައި ސޮއިކޮށްފިއެވެ.

މި އެއްބަސްވުމުގެ ދަށުން، އެސްޓީއޯއި ން އިމްޕޯރޓްކުރާ ތެލުގެ ބާވަތްތަކަށް އެއް އަހަރު ދުވަހުގެ މުއްދަތައް އައިޓީއެފްސީ އިން ފައިނޭންސް ކޮށްދިނުމަށް ހަމަޖެހިފައިވެއެވެ. މުރާބަހާ އަކީ ރިބާ ނުހިމެނޭ ގޮތަށް، އިސްލާމީ ޝަރީއަތުގެ ހަމަތަކުގެ ތެރެއިން ދޫކުރަ ލޯނަކަށް ކިޔާ ނަމެކެވެ.

އެސްޓީއޯ އިން ނެރުނު ބަޔާނެއްގައި ވަނީ އައިޓީއެފްސީގެ މައިގަނޑު މަގުސަދަކީ އޯގަނައިޒޭޝަން ފޯ އިސްލާމިކް ކޯޕަރޭޝަން (އޯއައިސީ)ގެ މެމްބަރު ގައުމުތަކުގެ މެދުގައި އޮންނަ ވިޔަފާރީގެ ގުޅުން ރަގަޅުކޮށް، އެގައުމުތަކުގެ އިގްތިސާދު ކުރިއެރުވުމަށް އެހީތެރިވެދިނުން ކަމަށާއި އޯއައިސީ މެމްބަރު ގައުމެއްގެ ހައިސިއްޔަތުން ދިވެހިރާއްޖެއަކީ ވެސް މެދުކެނޑުމެއް ނެތި އައިޓީއެފްސީގެ ފަންނީ އަދި މާލީ އެހީތެރިކަން ލިބެމުން އަންނަ ގައުމެއް ކަމަށެވެ. އެގޮތުން އައިޓީއެފްސީގެ މަސައްކަތް ފަށައިގެން މިހާތަނަށް އައިއިރު މީގެ ކުރިން ވެސް އެސްޓީއޯއަށް އެ ކޯޕަރޭޝަނުން މިފަދަ ފެސިލިޓީސް މެދުވެރިކޮށް ފައިނޭންސް ހަމަޖައްސައި ދީފައިވާ ކަމަށް އެސްޓީއޯގެ މި ބަޔާނުގައިވެއެވެ.