އެމްޓީސީސީ އާއި އަލްޝާލީ މެރިން މޯލްޑިވްސްއާ ދެމެދު ޓްރޭޑް ޕާޓްނަރޝިޕް އެއްބަސްވުމެއްގައި ސޮއިކޮށްފި
މި އެއްބަސްވުމުގެ ދަށުން އަލްޝާލީ މެރިން އިން ބަންނަ އޮޑިދޯނި ފަހަރުގައި އެމްޓސީސީ އިން ރާއްޖޭގައި ވިއްކާ ސުޒުކީ އައުޓްބޯޑް އަދި ޔަންމާ އިންބޯޑް އިންޖީނު އެޅުމަށް އިސްކަންދެވިގެންދާނެ
އެއްބަސްވުމުގައި ސޮއިކުރުމުގެ ރަސްމިއްޔާތުގެ ތެރެއިން
މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އާއި އަލްޝާލީ މެރިން މޯލްޑިވްސްއާ ދެމެދު ޓްރޭޑް ޕާޓްނަރޝިޕް އެގްރީމަންޓެއްގައި ހޯމަ ދުވަހު ސޮއި ކޮށްފިއެވެ.
ސޮއިކުރުމުގެ ރަސްމިއްޔާތު އެމްޓީސީސީ ހެޑް އޮފީހުގައި ބާއްވާފައިވާއިރު އެމްޓީސީސީގެ ފަރާތުން ސޮއި ކުރެއްވީ އެ ކުންފުނީގެ ސީއީއޯ އިބްރާހިމް ޒިޔަތުއެވެ. އަލްޝާލީ މެރިން މޯލްޑިވްސްގެ ފަރާތުން ސޮއި ކުރެއްވީ އޮޕަރޭޝަންސް މެނޭޖަރ އިސްމާއީލް ޝަރީފްއެވެ.
އިސްމާއީލް ޝަރީފް ވިދާޅުވީ އެމްޓީސީސީ އާއެއްކޮށް ގާއިމުކުރެވުނު އެއްބަސްވުމުގެ ސަބަބުން ކަސްޓަމަރުންނަށް ގިނަ ލުއި ފަސޭހަތަކެއް ވެގެންދާނެ ކަމަށާއި އެމްޓީސީސީއާ އެއްކޮށް އެ ކުންފުނިން މަސައްކަތް ކުރަމުން އަންނަތާ ތިން އަހަރަށް ވުރެ ގިނަދުވަސްވެފައިވާ ކަމަށެވެ.
މި އެއްބަސްވުމުގެ ދަށުން އަލްޝާލީ މެރިން އިން ބަންނަ އޮޑިދޯނި ފަހަރުގައި އެމްޓީސީސީ އިން ރާއްޖޭގައި ވިއްކާ ސުޒުކީ އައުޓްބޯޑް އަދި ޔަންމާ އިންބޯޑް އިންޖީނު އެޅުމަށް އިސްކަންދެވިގެންދާނެ ކަމަށް އެ ކުންފުނިން ބުނެއެވެ.
އެއްބަސްވުމުގައި ސޮއިކުރުމުގެ ރަސްމިއްޔާތުގައި ވާހަކަފުޅު ދައްކަވަމުން ޒިޔަތު ވިދާޅުވީ މި އެއްބަސްވުމުގެ ސަބަބުން ވަރަށް ގިނަ ފުރުސަތުތަކެއް ދެ ކުންފުންޏަށް ހުޅުވި ކުރިއަށް އޮތްތާނގައި ވިޔާފާރީގެ ގޮތުން ދެ ކުންފުންޏަށްވެސް ކުރިއެރުންތަކެއް ލިބިގެންދާނެ ކަމަށެވެ.
އެމްޓީސީސީ އަކީ ޔަންމާ އިންޖީނު އަދި ސުޒުކީ އައުޓްބޯޑް އިންޖީނުގެ އިތުރުން ކާސްޓްރޯލް އަޑީތެލާ، ސިގްމާ އެންޓިފައުލިން ސިސްޓަމްގެ ރާއްޖޭގެ އެޖެންޓެވެ.
