އެމޭޒަންގެ ދެ ލައްކަ އަށްވުރެ ގިނަ މުވައްޒަފުންގެ މުސާރަ ބޮޑުކުރަނީ

މަޝްހޫރު އޮންލައިން ވިޔަފާރި ކުންފުނި އެމޭޒަން ކުންފުނިން އެ ކުންފުނީގެ ދެ ލައްކަ އަށްވުރެ ގިނަ މުވައްޒަފުންގެ މުސާރަ ބޮޑު ކުރަން ނިންމައިފިއެވެ.

ނޮވެމްބަރު މަހުގެ އެއްވަނަ ދުވަހުން ފެށިގެން މުސާރަ ބޮޑު ކުރަން ނިންމާފައި ވަނީ އިނގިރޭސިވިލާތާއި އެމެރިކާގައި މަސައްކަތް ކުރާ އެކުންފުނީގެ 250,000 މުވައްޒަފެއްގެ އެވެ. މުސާރަ ބޮޑު ކުރުމަށްފަހު އެމެރިކާގައި މަސައްކަތް ކުރާ އެމެޒަންގެ މުވައްޒަފުންނަށް ގަޑިއިރަކަށް 15 ޑޮލަރު ލިބިގެންދާއިރު އިނގިރޭސިވިލާތުގައި މަސައްކަތް ކުރާ މުވައްޒަފުންނަށް 8.20 ޕައުންޑް ލިބިގެންދާނެއެވެ.

އެމެޒަން އިން އެ ކުންފުނީގެ މުވައްޒަފުންގެ މުސާރަ ބޮޑު ކޮށްފައި މި ވަނީ މުވައްޒަފުންނާއި ދޭތެރޭ އަމަލު ކުރަމުންދާ ގޮތަށް ފާޑު ކިޔުން އަމާޒުވެފައިވާ ދަނޑިވަޅެއްގައެވެ. އަދި އެ ކުންފުނީގެ ގުދަންތަކުގައި މަސައްކަތް ކުރުމުގެ ހާލަތު ރަނގަޅު ނޫން ކަމަށް ބުނަމުންދާ ދަނޑިވަޅެއްގައެވެ.

އެމެޒަންގެ ކުންފުނީގެ މަސައްކަތް ކުރާ ފުލްޓައިމް މުވައްޒަފުންނާއި ޕާޓްޓައިމް މުވައްޒަފުންގެ ވަގުތީ މުވައްޒަފުންގެ އިތުރުން ސީޒަނަލް މުވައްޒަފުންނަށް ވެސް މުސާރަ ބޮޑުވެގެންދާނެ ކަމަށް އެމެޒަން އިން ބުނެއެވެ.

އެ ކުންފުނީގެ އަގު ވަނީ ދާދިފަހުން 1 ޓްރިލިއަން އެމެރިކާ ޑޮލަރަށް އަރާފައެވެ. އެމެޒަން އަކީ އެމެރިކާގެ ހިއްސާގެ ބާޒާރުގައި ލިސްޓްކޮށްފައިވާ ކުންފުނިތަކުގެ ތެރެއިން މާކެޓް ވެލިއު 1 ޓްރިލިއަން ޑޮލަރަށް އެރި 2 ވަނަ ކުންފުންޏެވެ.

1994 ވަނަ އަހަރު ވުޖޫދަށް އައި އެމެޒަން ކުންފުންޏަކީ ދުނިޔޭގައި މިވަގުތު އޮތް ރީޓެއިލް ވިޔަފާރި އޮންލައިންކޮށް ކުރާ އެންމެ ބޮޑު ކުންފުންޏެވެ. އަދި އެކުންފުނީގެ ވެރިޔާ ޖެފް ބީޒޮސް އަކީ ދުނިޔޭގައި މިވަގުތު ހުރި އެންމެ މުއްސަނދި މީހާއެވެ. އޭނާގެ މިލްކިއްޔާތު 160 ބިލިއަން އެމެރިކާ ޑޮލަރަށް އަރާކަމަށް ފޯބްސްއިން އަންދާޒާކުރެއެވެ.

މިއަހަރުގެ 2 ވަނަ ކުއަރޓަރގައި އެމެޒަން އިން 53 ބިލިއަން ޑޮލަރުގެ ވިޔަފާރިކުރިއިރު، ފައިދާވެފައި ވަނީ 2.5 ބިލިއަން ޑޮލަރެވެ.

އެމެޒަންގެ ވަޒީފާގައި 575،000 މުވައްޒަފުން އެބަތިއްބެވެ. އަދި އެކުންފުންޏަކީ އޮންލައިން ރީޓެއިލްގެ އިތުރުން ކްލައުޑް ކޮމްޕިއުޓިންގ ދާއިރާގައި އެންމެ ފާހަގަކޮށްލެވޭ އެއް ކުންފުންޏެވެ.