ތޫފާން ފްލޮރެންސް: އެމެރިކާއަށް އަރައި މަދުވެގެން ތިން މީހަކު މަރުވެއްޖެ

ތޫފާން ފްލޮރެންސް އެމެރިކާގެ ނޯތު ކެރޮލައިނާ އަރައި މަދުވެގެން ތިން މީހުން މަރުވެފައިވާ ކަމަށް ރިޕޯޓްތައް ބުނެފިއެވެ.

ބީބީސީން ރިޕޯޓްކޮށްފައިވާ ގޮތުގައި މި ތޫފާނުގެ ސަބަބުން މަރުވި ތިން މީހުންނަކީ ގަދަ ވަޔާއި ބޯކޮށް ވާރޭވެހި، ކަނޑު ގަދަވެ، ބިޔަ ރާޅު އެރުމުގެ ސަބަބުން މަރުވި ތިން މީހުންނެވެ.

ނޯތު ކެރޮލައިނާގެ ގަވަރނަރ ރޯއި ކޫޕާ ހުކުރު ދުވަހު ވިދާޅުވީ އަދިވެސް އެތައް މީހަކު މަރުވެފައިވާ ކަމަށް ބެލެވޭ ކަމަށާއި އެކަންތައްތައް ތަހުގީގު ކުރަމުން އަންނަ ކަމަށެވެ.

ތޫފާން ފްލޮރެންސް އެމެރިކާއަށް އަރާނެ ކަމުގެ އިންޒާރު މީގެ ކުރިން މޫސުމާ ބެހޭ އިދާރާއިން ވަނީ ދީފައެވެ.

އެހެންކަމުން މިލިއަނެއެހާ ރައްޔިތުން ވަނީ ރައްކާތެރި ހިސާބުތަކަށް ބަދަލުކޮށްފައެވެ.

ތޫފާނުގައި ގެއަކަށް ގެއްލުންވެފައި

ގަދަ ވަޔާއި ބޯކޮށް ވާރޭވެހި ކަނޑު ގަދަވެ، ބިޔަ ރާޅު އެރުމުގެ ސަބަބުން ގެތަކުގައި މީހުން ވަނީ ތާށިވެފައެވެ. އެ މީހުން ސަލާމަތްކުރުމުގެ މަސައްކަތް ކުރަމުންދާ ކަމަށް ޚަބަރުތައް ބުނެއެވެ.

މިތޫފާން އެންމެ ފުރަތަމަ އަރާފައި ވަނީ އެމެރިކާގެ ނޯތު ކެރޮލައިނާގެ ރައިޓްސްވިލް ބީޗަށެވެ. ރޯއި ކޫޕާ ވިދާޅުވީ އެ އަވަށުގެ ގެތައް މިހާރު ވަނީ ފެނު އަޑީގައި ކަމަށެވެ.