މަހެއްގެ ތެރޭގައި ޖަޕާނަށް ތިންވަނަ ކާރިސާ: ބާރުގަދަ ތޫފާނެއް އަރައިފި

ޖޮންގްޑާރީގެ ނަމުން ނަންދީފައިވާ ބާރުގަދަ ތޫފާން އާދީއްތަ ދުވަހު ޖަޕާނަށް އަރައިފިއެވެ.

މިއީ މިމަހުގެ ތެރޭގައި ޖަޕާނުގައި ހިނގި ގުދުރަތީ ތިންވަނަ ކާރިސާއެވެ.

ޖަޕާނުގެ އެކި ސަރަހައްދުތަކަށް ހޫނު ގަދަ ވުމުގެ ސަބަބުން 30 މީހުން މަރުވެ އެތަކެއް ހާސް މީހުން ހޮސްޕިޓަލުގައި އެޑުމިޓް ކޮށް ފަރުވާދީފައިވަނީ މިދިޔަ ހަފްތާ ތެރޭގައެވެ. އޭގެ ކުރިން މިމަހުގެ ތެރޭގައި ޖަޕާނަށް ވާރޭވެހި ފެންބޮޑުވުމާއި ގުޅިގެން 218 އަށް ވުރެ ގިނަ މީހުން މަރުވެ 12 މީހުންނަށްވުރެ ގިނަ މީހުން ވަނީ ގެއްލިފައެވެ.

އާދީއްތަ ދުވަހު ޖަޕާނަށް އެރި ޖޮންގްޑާރީގެ ނަމުން ނަންދީފައިވާ ތޫފާނުގައި 150,000 ގެއިން ކަރަންޓުގެ ހިދުމަތް މެދުކެނޑިފައި ވާއިރު މި ތޫފާނުގައި 16 މީހުން ވަނީ ޒަހަމު ވެފައިވާކަމަށް ޚަބަރުތައް ބުނެއެވެ.

ޖަޕާނުގެ ހީރޯޝީމާގެ ގަވަރުނަރު ހިދެހިކޯ ޔުޒަކީ ވަނީ ތޫފާނާއި ގުޅިގެން ރައްކާތެރިވުމަށާއި ރައްކާތެރި ހިސާބުތަކަށް ބަދަލުވުމަށް އިލްތިމާސްކުރައްވަމުންނެވެ. އަދި ކުރިއާލާ ރައްކާތެރިވުމަށް ވަނީ އެދިވަޑައިގެންފައެވެ.