ޔަމަނުގައި ކޮލެރާ ޖެހިފައިވާ މީހުންގެ އަދަދު ހަތަރު މަސްތެރޭގައި ފަސްލައްކަ އަށް އަރައިފި
ޔަމަނުގައި މިހާތަނަށް 2000 އެއްހާ މީހުން މި ބަލީގައި މަރުވެފައިވޭ
ޔަމަނުގައި ކޮލެރާ ފެތުރުން ވަނީ ކޮންޓްރޯލުން ނައްޓާފައި
ކޮލެރާ ޖެހިގެން ޔަމަނުގައި ރިޕޯޓްކޮށްފައިވާ މީހުންގެ އަދަދު ހަތަރު މަސްތެރޭގައި ފަސްލައްކައަށް އަރާފައިވާ ކަމަށް ދުނިޔޭގެ ސިއްހަތާ ބެހޭ ޖަމިއްޔާ ޑަބްލިއުއެޗްއޯ އިން ހާމަކޮށްފިއެވެ.
ދާޚިލީ ހަނގުރާމައިގެ ސަބަބުން ޔަމަނުގައި މި ބަލި ހަލުވިކަމާ އެކު ފެތުރެން ފަށާފައިވާއިރު، ޑަބްލިއުއެޗްއޯއިން ވަނީ މި ބަލީގެ ސަބަބުން ޔަމަނުގައި މިހާތަނަށް 2000 އެއްހާ މީހުން މަރުވެފައިވާ ކަމަށް ހާމަކޮށްފައެވެ.
އެ ޖަމިއްޔާއިން ބުނާ ގޮތުގައި މިދިޔަ ޖުލައި މަހަށް ފަހު މި ބައްޔަށް ޝައްކުކުރެވިގެން ދުވާލެއްގެ މައްޗަށް ރިޕޯޓްކޮށްފައިވާ މީހުންގެ އެވަރެޖް އަދަދު ދަށްވެފައިވީ ނަމަވެސް އަދިވެސް ދުވާލަކު ފަސްހާހެއްހާ މީހުން މި ބަލިޖެހިގެން ރިޕޯޓްކުރެއެވެ.
ޑަބްލިއުއެޗްއޯއިން ބުނާ ގޮތުގައި މި ބައްޔަކީ ސާފުތާހިރުކަމުގެ މިންވަރު ދަށްވުމުގެ ސަބަބުން އަދި ތަޢައްޔަރުވެފައިވާ ފެނުގެ ޒަރިއްޔާއިން ފެތުރޭ ބައްޔަކަށްވާއިރު މި ބަލި ޔަމަނުގައި ފެތުރޭ މިންވަރު އެހާ އަވަސްވެފައިވާ ސަބަބަކީ ޔަމަނުގައި ހިންގަމުންދާ ދާޙިލީ ހަނގުރާމައިގެ ސަބަބުން ސާފު ބޯ ފެން ލިބުމަށް މީހުންނަށް ކުރިމަތިވެފައިވާ ދަތިތަކުގެ ސަބަބުންނެވެ. ޔަމަނުގައި 14 މިލިއަނެއްހާ މީހުންނަށް ސާފު ބޯ ފެން ލިބުމުގެ ދަތިކަން ކުރިމަތިވެފައިވާ ކަމަށް ވަނީ ލަފާކުރެވިފައެވެ.
އަވަހަށް ފަރުވާ ނުކުރެވިއްޖެ ނަމަ ފުރާނައަށް ނުރައްކާވާ މި ބައްޔަކީ ބައެއް ފަހަރު މި ބަލީގެ އެއްވެސް ނިޝާނެއް ހަށިގަނޑުން ނުފެންނަ ބައްޔެއް ކަމަށް ދިރާސާކުރާ ފަރާތްތަކުން ވަނީ ހާމަކޮށްފައެވެ. ޔަމަނުގައި ހިނގަމުންދާ ދާޙިލީ ހަނގުރާމައިގެ ސަބަބުން އެގައުމުގެ ހާލުގައި ޖެހިފައިވާ މީހުންނަށް އެހީ އަދި ބަލި މީހުންނަށް ފަރުވާކުރުމަށް ވެސް ބޮޑެތި ދަތިތަކާއި ކުރިމަތިވެފައިވާ ކަމަށް ޑަބްލިޔު އެޗްއޯއިން ވަނީ ހާމަކޮށްފައެވެ.
