ބަގްދާދުގައި 24 ގަނޑިއިރު ތެރޭގައި ދެވަނަ ބޮމެއް ގޮއްވާލައިފި

އިރާގުގެ ވެރިރަށް ބަގްދާދުގައި 24 ގަނޑިއިރު ތެރޭގައި ދެވަނަ ބޮމެއް ގޮއްވާލައިފިއެވެ.

ބަގްދާދުގެ އަލް-ޝަހާދާ ބްރިޖުގައި ގޮއްވާލި މި ބޮމުގެ ހާދިސާ ގައި މަދުވެގެން އަށް މީހުން މަރުވެ، 30 މީހުން ޒަޚަމްވިއެވެ.

ރިޕޯޓުތައް ބުނާ ގޮތުން އަލް-ޝަހަދާ ބްރިޖުގައި ގޮއްވާލި ބޮމަކީ ވެސް ކާރު ބޮމެކެވެ. މިހަަމަލާގެ ޒިންމާ އެއްވެސް ފަރާތަކުން އަދި އުފުލާފައެއް ނުވެއެވެ.

އަންގާރަ ދުވަހު ފުރަތަމަ ބޮން ގޮއްވާލައިފައި ވަނީ އިރާގުގެ ވެރިރަށް ބަގްދާދުގެ މެދުތެރޭ ސަރަަހައްދެއްގައި ހުންނަ މަޝްހޫރު އައިސްކްރީމް ވިއްކާ ފިހާރައެއްގެ ބޭރުގައެވެ. މިހާދިސާގައި މަދުވެގެން 15 މީހުން މަރުވިއެވެ. މިހަމަލާގެ ޒިންމާ އިސްލާމިކް ސްޓޭޓް (އައިއެސް) އިން ވަނީ ނަގާފައެވެ.

އިރާގުގައި ރަމްޟާން މަހު އެހެން މަސްތަކާ ހިލާފަށް ހަމަނުޖެހުން ބޮޑުވެ ހަމަލާތައް އިތުރުވެއެވެ.

މިދިޔަ ރަމްޟާން މަހު ވެސް އިރާގުގައި ވަނީ ޓްރަކް ބޮމުގެ ބޮޑު ހަަމަލާއެއް ދީފައެވެ. ބަގްދާދުގެ މެދުތެރޭ ހިސާބެއްގައި ހުންނަ ރީޓެއިލް ފިހާރަތަކެއް ހުންނަ ސަރަހައްދެއްގައި ދިން ހަމަލާގައި 300އާ ގާތް ކުރާ އަދަަދަކަށް މީހުން ވަނީ މަރުވެފައެވެ. މި ހަމަލާއަކީ 2003 ގައި ސައްދާމް ހުސައިން ވެރިކަމުން ދުރުކުރެވުނު ފަހުން ދިން އެންމެ ނުރައްކާތެރި ހަމަލާއެެވެ. މި ބޮމުގެ ހަމަލާގެ ޒިންމާ އައިއެސް އިން ނެގިއިރު، މިހާދިސާއާ ގުޅިގެން އިރާގުގެ އިންޓީރިއާ މިނިސްޓަރު ވަނީ އިސްތިއުފާ ދެއްވާފައެވެ.