މެޑިޓެރޭނިއަން ކަނޑުގެ މެދުތެރޭ ރޫޓް އިން، ލީބިޔާއިން އިޓަލީއަށް ދާން ކަނޑު ހުރަސްކުރަން އުޅުމުގެ ތެރޭގައި ހާލުގައި ޖެހުނު 6000 މީހުން ސަލާމަތް ކުރެވިފައިވާ ކަމަށް އިންޓަނޭޝަނަލް އޯގަނައިޒޭޝަން ފޯ މައިގްރޭޝަން (އައިއޯއެމް) އިން އަންގާރު ދުވަހު ބުނެފިއެވެ.
އައިއޯއެމްގެ ތަރުޖަމާނު ޖޮއެލް މިލްމަން ވިދާޅުވީ ކަނޑު ހުރަސްކުރަން އުޅުމުގެ ތެރޭގައި ރެފިއުޖީން ހިމެނޭ ގޮތުން، މިއަހަރުގެ މިހާތަނަށް 500 މީހުން މަރުވެފައިވާ ކަމަށެވެ. އޭނާ ވިދާޅުވީ ގިނަ ބަޔަކު ކަނޑު ހުރަސްކުރަން މަސައްކަތް ކުރީ މޫސުންވެސް ރަނގަޅުވުމުގެ ސަބަބުން ކަމަށެވެ.
ހޯމަދުވަހު، އިޓަލީ އާއި ޔޫރަޕުގެ ކަމާބެހޭ އޮފިޝަލުން ވިދާޅުވެފައި ވަނީ ލީބިޔާ ގައި މީހުން ޓްރެފިކް ކުރުމުގައި ހަރަކާތްތެރިވާ މީހުންނާ ދެކޮޅަށް މަސައްކަތް ކުރުމަށް ބޭނުންވާ ވަސީލަތާ އަދި އެހެނިހެން އެހީ ލީބިޔާއަށް ދިނުމަށް ތައްޔާރު ކަމަށެވެ. ލީބިއާގައި މީހުން ޓްރެފިކް ކުރުން އިތުރުވެފައި ވަނީ ކުރީގެ ލީޑަރު މުއައްމަރުލް ގައްޒާފީގެ ވެރިކަން 2011 ވަނަ އަހަރު ވައްޓާލައި އެގައުމުގައި އުފެދިފައިވާ ހަމަނުޖެހުންތަކާއި ހެދިއެވެ.
މިއަހަރުގެ މިހާތަނަށް އިޓަލީ އަށް ވަނީ 16،248 އަށް މީހުން ހިޖުރަކޮށްފައެވެ. މިދިޔަ އަހަރު މި މުއްދަތުގައި އިޓަލީއަށް ހިޖުރަކޮށްފައި ވަނީ 13،825 މީހުންނެވެ. އެހެން ނަމަވެސް ޔޫރަޕަށް ޖުމްލަގޮތެއްގައި ހިޖުރާ ކުރާ މީހުންގެ އަދަދު ވަނީ މަދުވެފައެވެ.
