ޖަޕާނަށް ކުރަމުންދާ މޫސުމީ ވިއްސާރަ:މަރުވި މީހުންގެ އަދަދު 126 އަށް އަރައިފި
10 ޖުލައި 2018 | އަންގާރަ 06:35އެންމެ ގިނަ މީހުން މަރުވެފައިވަނީ ހިރޯޝިމާ ޕްރިފެކްޗަރއިން
ޖަޕާނުގެ ހުޅަނގުގެ އެތައް ހާސް ގެއެއްގައި ފެންބޮޑުވެ ކަރަންޓްވަނީ ކެނޑިފައި
ޖަޕާނަށް ކުރަމުންދާ މޫސުމީ ވިއްސާރައިގައި އެ ގައުމުގެ ހުޅަނގުގެ ސަރަހައްދުތަކަށް ބޯކޮށް ވާރޭވެހި ފެންބޮޑުވެ ބިންގަޑު ކަނޑައިގެން ދިއުމުގެ ހާދިސާތަކާއި ގުޅިގެން މަރުވި މީހުންގެ އަދަދު މަދުވެގެން 126 އަށް އަރާކަމަށް އެ ގައުމުގެ ސަރުކާރުން ބުނެފިއެވެ.
މިއީ ވޭތުވެ ދިޔަ ތިރީހަށް ވުރެ ގިނަ އަހަރުގެ ތެރޭގައި އެ ގައުމުގައި ވާރޭ ވެހި ފެން ބޮޑުވެގެން އެންމެ ގިނައިން މީހުން މަރުވި ފަހަރެވެ.
އެތައް ބަޔަކު ގެއްލިފައިވާއިރު މީހުން ސަލާމަތްކުރުމުގެ މަސައްކަތް ކުރާ ފަރާތްތަކުންދަނީ ކުނިބުންޏާއި ކިސަޑުގެ ތެރެއިން ދިރި ހުއްޓައި މީހަކު ފެނޭތޯ ކޮންނަމުންނެވެ.
ކޯރުގެ ފެންގަނޑު ބޮޑުވުމާއިއެކު އެ ސަރަހައްދުގެ ދެ މިލިއަނެއްހާ ރައްޔިތުންވަނީ ރައްކާތެރި ސަރަހައްދުތަކަށް ބަދަލުކޮށްފައެވެ.
ބޮޑުވަޒީރު ޝިންޒޯ އަބޭ ވަނީ ފެންބޮޑުވުމުގެ ހާދިސާއާއި ގުޅިގެން ކުރައްވަން ޖެހިވަޑައިގަންނަވާ މަސައްކަތްތަކެއް ކުރެއްވުމަށްޓަކައި ގައުމުން ބޭރަށް ކުރައްވަން އޮތް ދަތުރުފުޅުވެސް ކެންސަލް ކުރައްވާފައެވެ.
ފެންބޮޑުވުމާއި ގުޅިގެން ނެރެފައިވާ އިންޒާރު ބައެއް ސަރަހައްދުތަކަށް އަދިވެސް އުވާލާފައިނުވާއިރު އޭގެ ތެރޭގައި އޮކަޔާމާ ޕްރިފެކްޗަރ ހިމެނެއެވެ. ނަމަވެސް ކުރިޔަށް އޮތް ދެތިން ދުވަހަށްބަލާއިރު މޫސުން ރަނގަޅުވާނެ ކަމަށް ބެލެވޭއިރު އެއީ މީހުން ސަލާމަތްކުރުމުގެ މަސައްކަތަށް އެހީއަކަށް ވެގެންދާނެއެވެ.
ބުރާސްފަތި ދުވަހުން ފެށިގެން ޖަޕާނުގެ ހުޅަނގުގެ ސަރަހައްދުތަކަށް ވާރޭ ވެހިފައިވާ މިންވަރަކީ އާއްމުކޮށް މުޅި ޖުލައި މަހު ވެހޭ މިންވަރުގެ ތިންގުނައެވެ.
ވެރިރަށް ޓޯކިޔޯގެ ހުޅަނގުން 600 ކިލޯމީޓަރު ދުރުމިނުގައި އޮންނަ މޮޓޮޔާމާ ޓައުންއަށް ހުކުރު ދުވަހުގެ ހެނދުނުން ފެށިގެން ހޮނިހިރު ދުވަހުގެ ހެނދުނާއި ހަމައަށް 583 މިލިމީޓަރގެ ވާރޭވެހިފައިވެއެވެ.
.
