ޔަމަން ހަނގުރާމަ: ހުދައިދާގެ އެއަރޕޯޓަށް ސައުދީއާއި ގުޅިފައިވާ ފައުޖުން ހަމަލާދީފި

ސައުދީ އަރަބިއްޔައާއި ޔުނައިޓެޑް އަރަބް އެމިރޭޓްސް އިސްކޮށްއޮވެ އުފައްދާފައިވާ އަސްކަރީ ކޯލިޝަނުން ޔަމަނުގެ ހުދައިދާގެ އެއަރޕޯޓަށް ވައިގެ މަގުން ހަމަލާދީފިކަމަށް ސައުދީއާއި ހޫސީންގެ މީޑިއާތަކުން ބުނެފިއެވެ.

ބައިނަލްއަގްވާމީ މުޖުތަމައުން ބަލައިގަންނަ ޔަމަނުގެ ސަރުކާރުގެ ފައުޖުތަކުން ހުދައިދާގެ ކޮންޓްރޯލް ހޯދުމަށް އެއްގަމުމަގުން ހަނގުރާމަ ކުރަމުންދާއިރު ސައުދީއާއި ޔޫއޭއީއިން ހަމަލާދީފައިވަނީ އެ ފައުޖުތަކަށް ވައިގެ މަގުން އެހީތެރިކަން ފޯރުކޮށްދިނުމަށެވެ.

ހޫސީންގެ ރަސްމީ ނޫސް އޭޖެންސީ ސަބާގައި ބުނެފައިވާގޮތުގައި ގުޅިފައިވާފައުޖުގެ ހަނގުރާމަމަތީ ބޯޓުތަކުންވަނީ ހުދައިދާއަށް ފަސް ފަހަރެއްގެ މަތިން ވައިގެ މަގުން ހަމަލާދީފައެވެ.

ސައުދީގެ އަމިއްލަ ވެބްސައިޓެއްކަމަށްވާ އަލް އަރަބިއްޔާއިންވެސްވަނީ އެއަޕޯޓަށް ވައިގެ މަގުން ހަމަލާދިންކަމަށް ރިޕޯޓްކޮށްފައެެވެ.

ހޫސީންގެ ކޮންޓްރޯލްގެ ދަށުގައި އޮތް ހުދެއިދާ ހިފުމުގެ މައި އޮޕަރޭޝަން ސައުދީގެ ގުޅިފައިވާ ފައުޖުން ފަށާފައިވަނީ މީގެ ފަސް ދުވަސް ކުރިންނެވެ.

ހުދައިދާގެ ވައިގެ ބަނދަރު އޮންނަނީ އެރަށުގެ ދެކުނުންނެވެ. އދއިން ހުދައިދާގައި އަސްކަރީ ހަރަކާތްތައް ފަށާފައިވަނީ އެ ރަށަކީ ޔަމަނަށް ކަނޑުމަގުން އެތެރެކުރާ މުދަލުގެ 70 އިންސައްތަ އެތެރެކުރާ ރަށް ކަމަށްވުމުން ހުދައިދާއަށް އަރައިފިނަމަ އިންސާނީ މުސީބާތަކާއި ކުރިމަތިވެދާނެކަމަށްބުނެ ހުދައިދާއަށް ނޭރުމަށް އދއިން އިންޒާރު ދީފައިވަނިކޮށެވެ.

އެއަރޕޯޓްގެ އެކި ސަރަހައްދުތައް އޮންނަނީ އެކި ފަރާތްތަކުގެ ކޮންޓްރޯލުގެ ދަށުގައެވެ.

ހުދައިދާގެ އެއަރޕޯޓް ހިފިކަމަށް ޔޫއޭއީއާއި ސަޢޫދީގެ ގުޅިފައިވާ ފައުޖުން ހޮނިހިރު ދުވަހު އިއުލާނުކުރި ނަމަވެސް އެއަރޕޯޓް ގެއްލުނުކަން ހޫޘީ ހަނގުރާމަވެރިން ކަށަވަރުކޮށްދީފައެއް ނުވެއެވެ.

ޔަމަނުގެ ދާޚިލީ ހަނގުރާމައިގެ ސަބަބުން އެޤައުމުގައި ބަނޑުހައިހޫނުކަމެއް ފެތުރިދާނެކަމަށް އދގެ ސަލާމަތީ މަޖިލީހުން އިންޒާރު ދީފައިވާއިރު، ހުދައިދާގެ ބަނދަރު ހިފުމަށް ކުރަމުންދާ ހަނގުރާމައިގެ ސަބަބުން މި ބަނޑުހައިހޫނުކަމުގެ ބިރު ބޮޑުވެފައިވާކަމަށް ޤަތުލުއާއްމުތައް ހުއްޓުވުމާއި ބެހޭ އދގެ ޚާއްސަ ރެޕަޓުއަރ އެޑަނާ ޑިއެންގް ވަނީ ވިދާޅުވެފައެވެ.

ޔަމަނުގައި މިހާރުވެސް ހާލުގައި ޖެހިފައިވާ 22 މިލިއަން މީހުން ތިބިއިރު، 8.4 މިލިއަން މީހުން ތިބީ ބަނޑަށް ޖެހުމުގެ ބިރުވެރިކަން މަތީގައެވެ.

ޔަމަނުގެ ދާޚިލީ ހަނގުރާމައިގައި އެޤައުމުގެ ސަރުކާރުގެ ސިފައިންނަށް އެހީވުމަށް ހަނގުރާމަވެރި ބައެއް ޖަމާޢާތްތަކުގެ އިތުރުން ސަޢޫދީއާއި ޔޫއޭއީ ސިފައިން ދަނީ ހަނގުރާމައިގައި ބައިވެރިވަމުންނެވެ.

ހަނގުރާމައިގެ ސަބަބުން ހުދައިދާގައިވެސް އިންސާނީ ކާރިސާއެއް އުފެދިދާނެކަމުގެ ބިރުވެރިކަން އުފެދިފައިވަނިކޮށް މައްސަލައިގައި ވާހަކަދެއްކެވުމަށް އދ ގެ މަންދޫބަކު ހޮނިހިރުދުވަހުވަނީ ޔަމަނުގެ ވެރިރަށް ސަންއާއަށް ވަޑައިގެންފައެވެ.

އދގެ މަންދޫބު މާޓިން ގްރިފިތްސް މިހާތަނަށް އަދި އެއްޗެއްވިދާޅުވެފައެެއްނުވެއެވެ. ބެލެވޭ ގޮތުގައި ހަނގުރާމަ ހުއްޓާލައި އދގެ ބެލުމުގެ ދަށުން އޮންނަ ކޮމިޓީއަކުން ހުދައިދާގެ ބަނދަރުގެ ކަންކަން ބެލެހެެއްޓުމަށް ހަނގުރާމަވެރި ގްރޫޕްތަކުގެ ލީޑަރުންނަށް އޭނާ ހުށަހަޅުއްވާނެއެވެ.