ޔޫކްރެއިންގެ އިރުމަތީގައި ވަކިވެގަތުމަށް މަސައްކަތް ކުރަމުންދާ ހަނގުރާމަވެރިން އަމިއްލައަށް އުފައްދާފައިވާ ރިބެލް ރިޕަބްލިކްގެ ޕާސްޕޯޓާއި ކާކުކަން އަންގައިދޭ އެހެނިހެން ލިއުންތައް ރަޝިއާއިން ވަގުތީ ގޮތުން ބަލައިގަންނަން ނިންމާފައިވާކަމަށް ރަޝިއާގެ ރައީސް ވްލާޑިމިއާރ ޕޫޓިން ވިދާޅުވެއްޖެއެވެ.
ރަޝިއާއަށް ތާއީދުކުރާ ހަނގުރާމަވެރިންނާއި ޔޫކްރެއިންގެ އަސްކަރިއްޔާއާ ދެމެދު އަނެއްކާވެސް ހަމަލާ ބަދަލުކުރުންތައް ފެށިފައިވާއިރު ފާއިތުވެ ދިޔަދެތިން ހަފްތާއެއްގެ ތެރޭގައި އެތައްބަޔަކުވަނީ މަރުވެފައެވެ.
ޔޫކްރެއިންގެ ރައީސް ޕެޓްރޮ ޕްރޫޝެން ކޯވަނީ ވަކިވެގަތުމަށް މަސައްކަތްކުރާ ފަރާތްތަކުގެ ޕާސްޕޯޓް ބަލައިގަތުމަށް ރަޝިއާއިން ނިންމި ނިންމުން ކުށްވެރިކޮށްފައެވެ.ނަމަވެސް ރަޝިއާގެ ފޮރިން މިނިސްޓަރ ވިދާޅުވެފައިވަނީ އެއީ އިންސާނިއްޔަތުކަމުގެ އަމަލެއްކަމަށެވެ.
ސަރްގޭ ލަވްރޯވް މީގެ އިތުރުން ވިދާޅުވެފައިވަނީ އެ ސަރަހައްދުން ބަރު ހަތިޔާރު ނެގޭނެ ކަމަށާއި ހޯމަ ދުވަހުން ފެށިގެން ހަމަލާ ބަދަލުކުރުން މެދުކަނޑާލެވޭނެ ކަމަށެވެ.
އޭނާ މިވަގުތު ހުންނެވީ ނޭޓޯގެ ކޮންފަރެންސަކަށް ވަޑައިގެން މިއުނިކްގައެވެ.
މިވަގުތު މިއުނިކްގައި ހުންނެވި އެމެރިކާގެ ނައިބް ރައީސް މައިކް ޕެންސް ވިދާޅުވީ އެމެރިކާއިން ރަޝިއާ ޖަވާބުދާރީ ކުރުވުން ކުރިޔަށް ގެންދާނެކަމަށެވެ.
އަދި 2015 ވަނަ އަހަރު ހަނގުރާމަ ހުއްޓާލުމަށް ބެލަރުސްގެ މިންސްކްގައި ވެވުނު އެއްބަސްވުމަށް އިހުތިރާމް ކުރުމަށް ރަޝިއާއަށް ޑިމާންޑް ކުރައްވާނެ ކަމަށެވެ.
ބަރު ހަތިޔާރު އެތަނުން ނެގުމަކީ މިންސްކް އެއްބަސްވުމުގެ އެއްބައެވެ.
ޔޫކްރެއިންގެ ހަނގުރާމަ ފެށުނު ފަހުން އެތައް ހާސް ބަޔަކު ގެންދަނީ ރަޝިއާއިން ރެފިއުޖީންގެ ގޮތުގައި ހިމާޔަތް ހޯދުމަށް މަސައްކަތް ކުރަމުންނެވެ.
