މޫސަލް މިނިވަން ކުރުމަށް ކުރާ ހަނގުރާމައިގައި އިތުރު އަވަށްތަކެއް މިނިވަންކޮށްފި
ހަމަލާތައް ރަސްމީކޮށް އިއުލާނު ކުރައްވާފައިވަނީ އިރާގުގެ ބޮޑުވަޒީރު ހައިދަރު އަލް އަބާދީ
އިރާގުގެ ފައުޖުތައްވަނީ މޫސަލް އެއާޕޯޓަ ކައިރިއަށް ޖެހިލާފައި
އިރާގުގެ މޫސަލްގައި އައިއެސްގެ އަތްދަށުގައި އެންމެ ފަހުން އޮތް ސަރަހައްދު މިނިވަން ކުރުމަށް އިރާގު ސިފައިންގެ ފައުޖުތައް ކުރިއަރަމުންދާއިރު އެތައް އަވަށްތަކެއް އައިއެސްގެ އަތްދަށުން މިނިވަންކޮށްފިއެވެ
ވައިގެ މަގުން ދޭ ހަމަލާތަކުގެ އެހީއާއެކު އިރާގު ސިފައިންގެ އެތައް ސަތޭކަ އަސްކަރީ ވެހިކަލެއް އާދީއްތަ ދުވަހު ވަނީ އައިއެސް ހަނގުރާމަވެރިންގެ ޖަގަހަތަކާ ކައިރިއަށް ޖެހިލާފައެވެ.
އިރާގުގެ ދެވަނައަށް އެންމެ ބޮޑު ސިޓީގައި އިރާގު ސިފައިން ހޯދި ކުރިއެރުމާއެކު އެގައުމުގެ ސިފައިން މިހާރުވަނީ މޫސަލް އެއާޕޯޓަށް ހަމަލާ ދޭ ހިސާބަށް ގާތްވެފައެވެ.
އިރާގު ސިފައިންނާ އައިއެސް ހަނގުރާމަވެރިންނާ ދެމެދު ހަމަލާތައް ވަރުގަދަވެގެންދާއިރު ތާށިވެފައި ތިބި އެތައް ހާސް ޢާއްމުންގެ ރައްކާތެރިކަމާ މެދު ވަނީ ބިރު ހީވެފައެވެ.
މި ހަމަލާތައް ރަސްމީކޮށް އިއުލާނުކޮށްފައި ވަނީ އިރާގުގެ ބޮޑުވަޒީރު ހައިދަރު އަލް އަބާދީއެވެ.
އަސްކަރިއްޔާގެ މެމްބަރެއް ކަމަށްވާ ލެފްޓިނެންޓް ޖެނެރަލް އަބްދުލްއަމީރް ޔާރަﷲ ނެރެފައިވާ ބަޔާނެއްގައި ބުނެފައި ވަނީ އެލީޓް ރެޕިޑް ރެސްޕޮންސް ޔުނިޓުން ދިން ހަމާލަތަކުން، މޫސަލް އެއާޕޯޓްގެ ދެކުނުން އޮންނަ އަތްބައަ އަދި އަލް ލައްޒާގާ ވިލެޖް ހިފާފައިވާ ކަމަށެވެ.
