ދުވަސްކޮޅެއް ކުރިން ސީރިއާގައި ދިން ކެމިކަލް ހަމަލާ އާއި ގުޅުން ހުރި ކަމަށް ޝައްކު ކުރެވޭ ކުންފުނިތަކާއި މީހުންގެ އެކައުންޓްތައް ފްރާންސުން ހިފަހައްޓައިފިއެވެ.
ދިމިޝްގުގައި ހުންނަ ސިގްމެޓިކް ކުންފުނިއާއި އަލް މަހްރަސް ގުރޫޕްގެ އިތުރުން ލުބްނާނުގައި ހުންނަ ޓެކްނޯލެބް އާއި ޗައިނާގެ ގުއަންޒޯގައި ހުންނަ ޓްރޭޑް ކުރާ ކުންފުންޏެއްގެ އެކައުންޓްތައް ވަނީ ހަ މަސްދުވަހަށް ހިފަހައްޓައިފައެވެ.
މީގެ އިތުރުން ސީރިއާގެ ދެ މީހަކާއި 1977 ގައި ލުބުނާނަށް އުފަންވެފައިވާ މީހެއްގެ ބޭންކް އެކައުންޓުގެ އިތުރުން އެ ތިން މީހުންގެ މުދާތައްވެސް ވަނީ ހިފަހައްޓާފައެވެ. މުދާ ހިފެހެއްޓުމަށް ސޮއި ކޮށްފައި ވަނީ ފްރާންސް ފައިނޭންސް މިނިސްޓަރ ބުރުނޯ ލެމޭޣައެވެ.
ޖެނުއަރީ މަހު ފްރާންސް އިން ވަނީ 25 މީހުންނާއި ބައެއް ކުންފުނިތަކާ ދެކޮޅަށް ދަތިކުރުމުގެ ފިޔަވަޅު އަޅާފައެވެ. ފިޔަވަޅު އެޅި ފަރާތައް ނިސްބަތްވާ ގައުމުތަކު ތެރޭގައި ލުބުނާން، ސީރިއާ އަދި ޗައިނާގެ އިތުރުން ފްރާންސްވެސް ހިމެނެއެވެ. މި މީހުންގެ މައްޗަށް ފްރާންސް ސަރުކާރުން ތުޙުމަތުކޮށްފައިވަނީ ކެމިކަލް ހަތިޔާރު އުފެއްދުމުގައި އެހީތެރި ވިކަމަށެވެ. އެކައުޓްތައް ފްރީޒް ކޮށްފައިފައިވަނީ ދަގަނޑާ، އިލެކްޓްރޯނިކްސްގެ ވިޔަފާރިކުރާ ކުންފުނިތަކާއި، ލޮޖިސްޓިކްސް ކުންފުނި ތަކެއްގެއެވެ.
ނަރވް އޭޖެންޓް ގޭސް ބޭނުން ކުރާ ފަރާތްތައް ދެނެގަނެ އެ ފަރާތްތަކާއި ދެކޮޅަށް ހަރުކަށި ފިޔަވަޅު އެޅުމުގެ ގަވައިދެއް އެކުލަވާލަން ތިރީހަކަށް ގައުމުން ހުކުރު ދުވަހު ވަނީ ބައްދަލުކުރުމަށް ނިންމައިފައެވެ.
ސީރިއާގައި ނަރވް އޭގެންޓެއް ބޭނުން ކޮށްގެން 2013 ވަނަ އަހަރު އޯގަސްޓް މަހު އެތައް ސަތޭކަ މީހުން މެރުމާއި ގުޅިގެން ބާރުގަދަ ގައުމުތަކުން ވަނީ ސީރިއާގެ އެންމެ ގާތް އެކުވެރިއާ ކަމުގައި ވާ ރަޝިއާ މެދުވެރިކޮށްގެން ސީރިއާލައްވައި ކެމިކަލް ހަތިޔާރުގެ ހުރިހާ ބާވަތެއް ނައްތާލުމަށް އެއްބަސްކުރުވާފައެވެ. އަދި އޭގެ ބަދަލުގައި އެމެރިކާއިން ވަނީ އެ ގައުމަށް ދެމުން ގެންދިޔަ މިސައިލް ހަމަލާތައް ހުއްޓާލައިފައެވެ.
ސީރިއާ ކެމިކަލް ހަތިޔާރު ނައްތާލަން އެއްބަސްވި ނަމަވެސް އޭޕްރިލް 7 ވަނަ ދުވަހު ސީރިއާ ސަރުކާރުން ވަނީ ކޮލޮރީން އާއި ސެރިން ބޭނުން ކޮށްގެން ހަމަލާ ދީފައެވެ. އެއާއެކު އެމެރިކާ އާއި އިގިރޭސިވިލާތާއި ފްރާންސުން ގުޅިގެން ވަނީ ކެމިކަލް ހަތިޔާރު ރައްކާ ކުރާ ސަރައްދުތަށް ނައްތާލުމަށް ކަމަށް ބުނެ މިސައިލް ހަމަލާތައް ދޭން ފައްޓައިފައެވެ. އެހެން ނަމަވެސް ސީރިއާ ބުނަމުން ދަނީ ކެމިކަލް ހަމަލާ ދީފައި ވަނީ އެމީހުން ނޫން ކަމަށެވެ.
