އެމެރިކާއާއި ޔޫރަޕްގެ ގުޅުންތަކަށް ވެރިވެފައިވާ ނުތަވަސްކަން ނައްތާލަން  ބޭނުންވާ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.

ޓްރަމްޕް މިހެން ވިދާޅުވީ ރަސްމީ ދަތުރުފުޅެއްގައި އެމެރިކާއަށް ވަޑައިގެން އުޅުއްވާ ޖަރުމަނުގެ ޗާންސެލާ އެންގެލާ މާކަލް އާ ވައިޓް ހައުސްގައި ބައްދަލުކުރެއްވުމަށް ފަހު ނޫސްވެރިންނަށް މައުލޫމާތު ދެއްވަމުންނެވެ.

ޓްރަމްޕް ވިދާޅުވީ އެމެރިކާގެ ބައިވެރިންނާ އެކަހެރި ސިޔާސަތެއް ނުގެންގުޅުއްވާނެ ކަމަށާއި އަދި ނޭޓޯ ބަލިކަށިވާ ފަދަ ކަމެއްކުރަން ވެސް އޭނާގެ ސަރުކާރުން ބޭނުންނުވާ ކަމަށެވެ. ނަމަވެސް ޓްރަމްޕް ވިދާޅުވީ އެމެރިކާއާއި އެމެރިކާގެ ބައިވެރިންނާ ދެމެދު ހިނގާ ވިޔަފާރީގެ މުއާމަލާތްތައް އިންސާފުވެރި ނޫންކަމަށާއި މިކަން އިންސާފުވެރި ކުރަން ޖެހޭ ކަމުގަ އެވެ.

ނަމަވެސް ޓްރަމްޕް، އެމެރިކާގެ ރައީސްކަމަށް އިންތިޚާބުވުމަށް ފަހު ރައީސްކަމާ ހަވާލުވެވަޑައިގަތުމުގެ ކުރިން ދެއްވި ބަޔާންތަކުގައި ނޭޓޯއަކީ މިޒަމާނަށް ކަމުނުދާ ބޯދާ އަސްކަރީ ޖަމްއިއްޔާއެއްކަމަށް ސިފަކުރައްވައި ނޭޓޯ އަށް ވަރަށް ބޮޑަށް މަލާމާތް ކުރައްވާފައިވެ އެވެ. އަދި ޔޫރަޕްގެ ގައުމުތަކަށް ވެސް ބަހުގެ ހަމަލާތައް ދެއްވައި މަލާމާތް ކުރައްވުމުގެ އިތުރުން ހަނގުރާމައިގެ ސަބަބުން ހާލުގައި ޖެހިފައިވާ ގައުމުތަކުގެ ނިކަމެތި ރެފިއުޖީންނަށް ޔޫރަޕްގެ ގައުމުތަކުން އެހީތެރިވެ ހިޔާވަހިކަންދޭތީ އެކަމާ ނުރުހުން ފާޅުކުރައްވާފައިވެސް ވެއެވެ.