ހަނގުރާމަވެރި ޖަމާއަތްތަކުގެ އަތްދަށުގައި އޮތް ސީރިޔާގެ އިދްލީބްގައި ކެމިކަލް ހަތިޔާރު ބޭނުންކޮށްގެން ދިން ހަމަލާއެއްކަމަށް ބެލެވޭ ހަމަލާއަށް ފަހު އެމެރިކާއިން ރައްދުގައި ސީރިއާގެ އަމާޒުތަކަށް މިސައިލް ހަމަލާއެއް ދީފިއެވެ.
ޕެންޓަގަންގެ އޮފިޝަލް ވިދާޅުވީ މެޑިޓެރޭނިއަންގައި އޮތް އެމެރިކާގެ މަނަވަރުން ސީރިޔާގެ އަސްކަރިއްޔާގެ ވައިގެ ބަނދަރަކަށް ގާތްގަނޑަކަށް 50 ޓޮމަހޯކް ކްރޫޒް މިސައިލް ފޮނުވާލާފައިވާ ކަމަށެވެ.
ރައީސް ޑޮނަލްޑް ޓްރަމްޕް ޓީވީ މެދުވެރިކޮށް ދެއްވި ތަގުރީރެއްގައި ވިދާޅުވީ އެ ވައިގެ ބަނދަރަކީ އަންގާރަ ދުވަހު ދިން ކެމިކަލް ހަމަލާތައް ދިނުމަށް ބޯޓްތައް ނައްޓާލި ބަނދަރު ކަމަށެވެ.
ރައީސް ޓްރަމްޕް ވަނީ ސީރިޔާގެ ހަނގުރާމަ ހުއްޓުވައި ދިނުމުގައި އެހީވުމަށް "ތަހުޒީބް ހުރިހާ ގައުމަކަށް" ގޮވާލައްވާފައެވެ.
އިދްލިބްގެ ޚާން ޝެއިޚޫން ޕްރޮވިންސްގައި ނާވް ގޭސް ބޭނުންކޮށްގެން ދިން ހަމަލާއެއްކަމަށް ބެލެވޭ މިހަމަލާގައި ޢާއްމުންގެ އެތައް ބަޔަކު މަރުވެފައިވާއިރު އޭގެ ތެރޭގައި އެތައް ބައިވަރު ކުޑަކުދިންނެއް ހިމެނެއެވެ.
ފްލޮރިޑާގައި ހުންނަވައި ޓްރަމްޕް ދެއްވި ތަގުރީރުގައި ސީރިޔާގެ ރައީސް ބަޝާރުލް އަސަދު ސިފަކުރައްވާފައި ވަނީ ކުށެއް ނެތް ޢާއްމުންނާ ދެކޮޅަށް ކެމިކަލް ހަތިޔާރު ބޭނުންކޮށްގެން ހަމަލާދިން "ޑިކްޓޭޓަރެއް"ގެ ގޮތުގައެވެ.
"މިރޭ އަޅުގަނޑު ގޮވާލަން ތަހުޒީބް ހުރިހާ ގައުމަކަށް ސީރިޔާގެ މި ގަތުލުއާއްމާއި މި ލޭއޮހޮރުވުން އަދި ހުރިހާ ބާވަތެއްގެ ޓެރެރިޒަމްގެ އަމަލުތައް ހުއްޓުވުމުގައި އަޅުގަނޑުމެންނާ ބައިވެރިވުމަށް" ޓްރަމްޕް ވިދާޅުވިއެވެ.
"އަޅުގަނޑުމެން އުއްމީދުކުރަން އެމެރިކާއިން އިންސާފު ގާއިމް ކުރުމަށް ތެދުވުމުން އެންމެ ފަހުން ސުލްހަ މަސަލަސްކަން ކަށަވަރު ކުރެވޭނެކަމަށް"
ޕެންޓަގަންއިން ބުނީ އެމެރިކާއިން މި ހަމަލާ ދިނުމުގެކުރިން ސީރިޔާގެ އަސްކަރިއްޔާއަށް މަދަދުދެމުންދާ ރަޝިއާގެ އަސްކަރިއްޔާއަށް ހަމަލާގެ މައުލޫމާތު ދިން ކަމަށެވެ. ނަމަވެސް ރަޝިޔާ އިން ވަނީ މިއީ ބަލައިގަނެވޭނެ ކަމެއް ނޫން ކަމަށް ބުނެފައެވެ.
ވައިޓް ހައުސްގެ ތަރުޖަމާނު ވިދާޅުވީ ކްރޫޒް މިސައިލްތައް އަމާޒުކޮށްފައި ވާނީ ކެމިކަލް ހަތިޔާރު ބޭނުންކޮށްގެން ދިން ހަމަލާއާ ސީދާ ގުޅުންހުރި ތަންތަނަށް ކަމަށެވެ.
ސީރިޔާގެ ދައުލަތުގެ ޓީވީއިން ވެސް ވަނީ އެމެރިކާއިން އެގައުމަށް މިސައިލް ހަމަލާތަކެއް ދީފައިވާކަން ކަށަވަރުކޮށްދީފައެވެ. ނަމަވެސް އިތުރު އެއްވެސް ތަފްސީލެއް ނުދެއެވެ.
ރައީސް ޓްރަމްޕް މީގެ ކުރިން ވަނީ ސީރިޔާގެ އިދްލިބްގައި ދިން ހަމަލާގައި އާއްމުންގެ އެތައް ބަޔަކު މަރާލުން ސީރިޔާގެ ސަރުކާރާ ދެކޮޅަށް ކަމެއް ހިނގާނެ ކަމަށް ވިދާޅުވެފައެވެ. ނަމަވެސް ކަމުގެ ތަފްސީލެއް ނުދެއްވައެވެ.
މީގެ އިތުރުން އެމެރިކާގެ ސެކްރެޓަރީ އޮފް ސްޓޭޓް ރެކް ޓިލާސަން ވެސް ބުރާސްފަތި ދުވަހު ވަނީ އެފަދަ އިޝާރާތެއް ކުރައްވާފައެވެ.
ޓިލާސަން ވިދާޅުވެފައި ވަނީ އެމެރިކާއިން ސީރިޔާއާ މެދު ގެންގުޅޭ ސިޔާސަތު ބަދަލުވެފައިވާކަމަށާއި މުސްތަގުބަލުގެ ސީރިޔާގައި ރައީސް ބަޝާރުލް އަސަދުގެ ދައުރެއް އޮވެގެން ނުވާނެ ކަމަށެވެ.
