ސީއޯއޯ ހުސެއިން ފިޔާޒްގެ ހަށިގަނޑަށް ވަޅި ހެރުމަށް ސިޔާސީ ޕާޓީއަކުން ޒުވާނަކާއި ހަވާލުކުރި: ރާއްޖެޓީވީ

ރާއްޖެ ޓީވީގެ ޗީފް އޮޕަރޭޓިން އޮފިސަރ ހުސެއިން ފިޔާޒް މުސާއަށް ވަޅިން ހަމަލާދޭން ރާއްޖޭގެ ބޮޑު ސިޔާސީ ޕާޓީ އަކަށް ނިސްބަތްވާ ބަޔަކު ކޮންޓްރެކްޓަށް ޒުވާނަކަށް ހަވާލު ކުރި ކަމުގެ ކަށަވަރު މައުލޫމާތު ލިބިފައިވާ ކަމަށް ސްޓޭޝަނުން ބުނެފި އެވެ.

ރާއްޖެ ޓީވީގެ ޗީފް އޮޕަރޭޓިން އޮފިސަރ ހުސެއިން ފިޔާޒް މުސާއަށް ވަޅިން ހަމަލާދޭން ބަޔަކު މަސައްކަތްކުރިކަމުގެ މައުލޫމާތުލިބިފައިވާކަން ހާމަކޮށް، ސްޓޭޝަނުން ނެރުނު ބަޔާނުގައި ބުނެފައިވަނީ ފިޔާޒަށް ހަމަލާދީ ޒަހަމްކޮށްލުމަށް ހަވާލު ކުރީ ޒުވާނަކަށް ކަމަށާއި އެކަމުގެ ކޮންޓްރެކްޓް އަގެއްގެ ގޮތުގައި އެއް ލައްކަ ސާޅީސް ހާސް ރުފިޔާ ހުށަހެޅި ކަން ވެސް އެނގިފައިވާ ކަމަށެވެ. އަދި އެނގިފައިވާގޮތުގައި މި ޒުވާނާ އޮފީހަކަށް ގެންގޮސް އޭނާއަށް ހަވާލު ކުރެވުނީ ފިޔާޒްގެ ހަށިގަނޑުގެ ކޮންމެވެސް އެއް ތަނަކަށް ވަޅި ޖެހުމަށްކަމަށް ރާއްޖެޓީވީން ބުންޏެވެ. އޭގެއިތުރުން އޭނާއަށް ކޮންޓްރެކްޓަށް އެކަން ހަވާލު ކުރި އިރު އެ އިދާރާގެ ތެރޭގައި ސިޔާސީ މައިދާނުގައި އެންމެން ދަންނަ ދެ ފަރާތެއް ތިބިކަން ވެސް ރާއްޖެޓީވީގެ ބަޔާނުގައި ފާހަގަކޮށްފައިވެއެވެ.

Advertisement

ރާއްޖެޓީވީން ބުނީ، އެހާ ފާޅުކަން ބޮޑު ގޮތެއްގައި ޓެރަރިޒަމްގެ އަމަލެއް ހިންގުމަށް މަޝްވަރާ ކޮށް ފައިސާ ހުށަހެޅުމުގެ ފަހަތުގައި ސިޔާސީ ފަރާތްތައް ތިބެނީ އެ ފަރާތްތަކަކީ ގާނޫނަށް ވުރެ މަތިން ބާރުތަކެއް ލިބިފައިވާ ބައެއް ކަމަށް އެމީހުންނަށް ގަބޫލު ކުރެވޭތީ ކަމަށް ކަމަށެވެ. އަދި އެކަން މިހާރަށް މިހެން އޮތް ނަމަވެސް، މި ނުބައި އަމަލު ހިންގުމަށް ރާވާ ހިތްވަރު ދިން ފަރާތްތައް އިންސާފުގެ ކުރިމައްޗަށް ގެނެވޭނެ ދުވަހެއް އަންނާނެ ކަމާ މެދު ޝައްކެއްގެ ހިޔަންޏެއްވެސް ނެތް ކަމަށް ސްޓޭޝަނުން ގަބޫލު ކުރާކަމަށް ބަޔާނުގައި ބުނެފައިވެއެވެ.

ރާއްޖެޓީވީން ނެރުނު ބަޔާނުގައި އިތުރަށް ބުނެފައިވަނީ، ރާއްޖެޓީވީ ނައްތާލުމަށް އެކި ގޮތްގޮތުން ބާރުގަދަ ފަރާތްތަކުން ކުރަމުންދާ މަސައްކަތްތަކުގެ ތެރެއިން އެކަމަކީ އޭގެ ޒާތުގައި ބިރުވެރި، ލާދީނީ، ނުރައްކާތެރި އަދި އެހާމެ ދަށުދަރުޖައިގެ ޓެރަރިޒަމްގެ ފިނޑި އަމަލެއް ކަމަށް މިސްޓޭޝަނުން ދެކޭކަމަށެވެ. އަދި ރާއްޖެޓީވީ އަންދާ އަޅިޔަށް ހަދާލުމާއި، އަސްލެއް ނެތި ބޮޑެތި އަދަދު ތަކުން ފުލުފުލުގައި ޖުރިމަނާ ކުރުމާއި، ނުހައްގުން މުވައްޒަފުން ހިފާ ހައްޔަރު ކޮށް ޖަލުގައި ބަންދު ކޮށް ގެންގުޅުން ފަދަ ކަންކަމަށް ވުރެވެސް ގަސްދުގައި މުވައްޒަފަކަށް ގެއްލުންދޭން ރޭވިކަން އެނގުމަކީ ސްޓޭޝަނުން އަދި ވަކީން ބޮޑަށް ކަންބޮޑުވި ކަމެއްކަމަށްވެސް އެ ބަޔާނުގައި ބުނެފައިވެއެވެ.

ރާއްޖެޓީވީން ބުނީ، ފިޔާޒަށް ގަސްދުގައި ގެއްލުން ދޭން ރޭވި ރޭވުމަކީ ރާއްޖޭގައި ނޭވާ ހޮޅިޔަށް އެޅިފައި އޮތް މިނިވަން ނޫސްވެރިކަން އިތުރަށް ބިރުވެރި ކަމުގެ ތެރެއަށް ވައްޓާލާ، ނޫސްވެރިންގެ ހިތްތަކުގައި ނުތަނަވަސް ކަން އިތުރުކޮށް ނޫސްވެރިން ފަހަތައް ޖެއްސުމަށް ކުރި ކަމެއް ކަމުގައިވެސް މި ސްޓޭޝަނުން ދެކޭކަމަށެވެ. ނަމަވެސް މިފަދަ ފިނޑި ރޭވުން ތަކުގެ ތެރެއިންވެސް އެންމެ ފަހު ވަގުތާ ޖެހެން ދެންވެސް ގައުމީ މި މުހިންމު ޚިދުމަތުގައި ތެދު ޚަބަރާއި މައުލޫމާތު ގެނެސްދިނުމުގައި ތަންފުކެއްވެސް ފަހަތައް ޖެހުމެއް ނެތި ރާއްޖެޓީވީގެ ނޫސްވެރިން ސާބިތުވެ ތިބޭނެ ކަމަށް ބަޔާން ނިންމާލަމުން ސްޓޭޝަނުން ބުނެފައިވެއެވެ.