ވަޅިހަރައި މަރާލާނެ ކަމުގެ އިންޒާރުދިންތާ ފަސް ދުވަސް ވީއިރު ވެސް އެމީހާ ހައްޔަރެއް ނުކުރެވުނު!

ވަޅިހަރައި މަރާލާނެ ކަމަށް ބުނެ، ރައްޔިތުންގެ މަޖިލީހުގެ މާފަންނު އުތުރު ދާއިރާގެ މެމްބަރު އިމްތިޔަޒް ފަހުމީ (އިންތި)އަށް މަރުގެ އިންޒާރުދިންތާ ފަސް ދުވަސް ވީއިރު ވެސް ދިވެހި ފުލުހުންނަށް އެމީހާ ހައްޔަރުނުކުރެވޭ ކަމަށް ފުލުހުން ބުނެފިއެވެެ.

ރާއްޖޭގައި މޮބައިލް ހިދުމަތާއި އިންޓަރނެޓްގެ ހިދްމަތް ދެމުންދާ އުރީދޫ ނަމްބަރަކުން ވައިބަރ މެދުވެރިކޮށް، އިންތި އަށް މަރުގެ އިންޒާރު ދީފައި ވާތީ އެމައްސަލައިގެ ތަހުގީގު ގޮސްފައިވާ ހިސާބެއް ބެލުމަށް ބުދަ ދުވަހު ފުލުހުންގެ މީޑިއާ އޮފިޝަލަށް ގުލާލުމުން ވިދާޅުވީ މިހާތަނަށް އެއްވެސް މީހަކު ހައްޔަރު ކޮށްފައި ނުވާ ކަމަށެވެ. ނަމަވެސް އެމައްސަލަ ތަހުގީގު ކުރަމުންދާ ކަމަށް ފުލުހުން ބުނެ އެވެ.

އެ އިންޒާރު ދިން މެސެޖްގެ ސްކްރީމް ޝޮޓާއި މެސެޖް ފޮނުވި މޮބައިލް ނަމްބަރާ އެކު އިންތި ވަނީ ފުލުހުންނާއި ސިފައިންނަށް އަދި ހިއުމަން ރައިޓްސް ކޮމިޝަން ޓެގްކޮށް އެމެސެޖް ޓްވީޓް ކުރައްވާފަ އެވެ.

ހޮނިހިރު ދުވަހު ފުލުހުން ބުނެފައި ވަނީ އެމްޑީޕީގެ ޕާލިމެންޓްރީ ގުރޫޕުގެ ޑެޕިއުޓީ ލީޑަރުކަން ވެސް ކުރައްވާ އިމްތިޔަޒް ފަހުމީއަށް ވައިބަރ މެދުވެރިކޮށް، މަރުގެ އިންޒާރު ދިން މައްސަލަ ހުކުރު ދުވަހުގެ ރޭ ފުލުހުންނަށް ހުށައަޅާފައިވާ ކަމަށެވެ. އަދި އެއްމަސަލަ ސީރިއަސް މައްސަލައެއްގެ ގޮތުގައި ބަލުންދާ ކަމަށް ފުލުހުން ބުނެފައި ވެއެވެ.

އިމްތިޔަޒް ފަހުމީއަށް ނުދަންނަ ނަމްބަރަކުން ފޮނުވާފައިވާ މެސެޖުގައި ބުނެފައިވަނީ "ކަލޭ ވަޅި ހަރައި މަރާލާނެ" ކަމަށެވެ. އޭގެ އިތުރުން އެއްވެސް އެއްޗެއް ބުނެފަ އެއް ނުވެއެވެ.

ރައްޔިތުންގެ މަޖިލީހުގެ މެމްބަރުންނަށް ފުރިހަމަ ރައްކާތެރިކަމާއި، ހިމާޔަތް ފޯރުކޮށްދޭންޖެހޭނެކަމަށް ޤާނޫނުތަކުގައި ފުލުހުންނާއި، ސިފައިންގެ މައްޗަށް ލާޒިމްކޮށްފައިވާއިރު، މެމްބަރު އިމްތިޔާޒަށް މަރުގެ އިންޒާރުދިންއިރު، އޭނާއަށް ރައްކާތެރިކަން ފޯރުކޮށްދެމުންދާކަމެއް ކަށަވަރެއް ނުވެއެވެ. އެނގިފައިވާ ގޮތުގައި ރައްޔިތުންގެ މަޖިލީހުގެ މެމްބަރުންގެ ސަލާމަތީކަންކަން ވަކިވަކިން އެމްއެންޑީއެފުން މިހާރު ބަލަހައްޓަމުންނެއް ނުގެންދެއެވެ.

ރައްޔިތުންގެ މަޖިލީހުގެ އިދިކޮޅު މެމްބަރުންނަށް މީގެ ކުރިން ވެސް ވަނީ މަރުގެ ގިނަ އިންޒާރުތަކެއްދީފަ އެވެ. ނަމަވެސް އެއިން އެއްވެސް މައްސަލައެއް ތަހުގީގުކޮށްފައިވާކަން ފުލުހުން ހާމަކޮށްފައެއް ނުވެއެވެ. އެ ގޮތުން އިމްތިޔާޒް ގަޔަށް ކަޅު ތެޔޮ ޖެހި މައްސަލައެއް ވެސް މީގެ ކުރިން ވަނީ ފުލުހުންނަށް ހުށަހަޅާފައެވެ.

އިމްތިޔަޒް ފަހުމީއަށް މަރުގެ އިންޒާރުދިންއިރު، އޭނާއަކީ ސަރުކާރަށް ވަރަށް ބޮޑަށް ފާޑުވިދާޅުވަމުންގެންދަވާ ބޭފުޅެކެވެ.