ދުނިޔޭގެ އެންމެ ބޮޑު ކަނޑު އަޑީގެ ރެސްޓޯރެންޓާއެކު ހުރަވަޅި ރިސޯޓް ރައީސް ޔާމީން ހުޅުއްވައިދެއްވަނީ
ހުރަވަޅި ރިސޯޓުގައި ހަދާފައިވާ ކަނޑުއަޑީގެ ރެސްޓޯރެންޓަކީ 24 މީހުންގެ ޖާގައިގެ ރެސްޓޯރެންޓެއް
ހުރަވަޅި ރިސޯޓުގައި ހަދާފައިވާ ކަނޑުއަޑީގެ ރެސްޓޯރެންޓް
ދުނިޔޭގެ އެންމެ ބޮޑު ކަނޑު އަޑީގެ ރެސްޓޯރެންޓް ހަދާފައިވާ ހުރަވަޅި ރިސޯޓް މިރޭ ރައީސް އަބްދުﷲ ޔާމީން އަބްދުލް ގައްޔޫމް ހުޅުއްވާ ދެއްވާނެ ކަމަށް ރައީސް އޮފީހުން ބުނެފިއެވެ.
ރާއްޖެއެމްވީ އަށް މައުލޫމާތު ދެއްވަމުން ރައީސް އޮފީހުގެ ތަރުޖަމާން އިބްރާހިމް މުއާޒް އަލީ ވިދާޅުވީ ހުރަވަޅި ރަސްމީކޮށް ހުޅުއްވާ ދެއްވުމަށްޓަކައި ރައީސް އަބްދުﷲ ޔާމީން އާއި އެމަނިކުފާންގެ އަނބިކަނބަލުން ފާތުމަތު އިބްރާހީމް އެ ރިސޯޓަށް ވަޑައިގެންފައިވާ ކަމަށެވެ.
ހުރަވަޅި ރިސޯޓުގައި ހަދާފައިވާ ކަނޑު އަޑީގެ ރެސްޓޯރަންޓަކީ ކަނޑުގެ 5.8 މީޓަރު އަޑީގައި ހަދާފައިވާ ރެސްޓޯރަންޓެކެވެ. މިއީ 24 މީހުންގެ ޖާގައިގެ ރެސްޓޯރަންޓެކެވެ. .
މީގެއިތުރުން ހުރަވަޅި ރިސޯޓުގައި 60 ވޯޓާ ވިލާ އަދި 30 ބީޗް ވިލާ ތަރައްޤީކޮށްފައިވެއެވެ. މި ރިސޯޓު ތަރައްޤީކޮށްފައިވަނީ ތިމާވެއްޓާއި ރަޙުމަތްތެރި ގޮތަކަށެވެ. އެ ގޮތުން ރިސޯޓުގައި ބޭނުންކުރާ ކަރަންޓުގެ ބޮޑު ބައެއް ނަގަނީ ރިސޯޓުގެ ބައެއް ޢިމާރާތްތަކާއި ރަށަށް އަރާ ފޭބުމަށް އޮންނަ ޖެޓީ މަތީގައި ބަހައްޓާފައިވާ ސޯލާ ޕެނަލްތަކުންނެވެ. މި ޕެނަލްތަކުގައި 930 ކިލޯ ވޮޓްގެ ކަރަންޓް އުފެއްދުމުގެ ޤާބިލްކަން ހުރެއެވެ.
