އެމްއެމްޕީއާރްސީގެ ރިޕޯޓް ނުނެރި ލަސްކުރަނީ މަޖިލިސް ބައެއް މެންބަރުންނަށް ބިރު ދައްކަން: އަލީ ހުސެއިން
މެންބަރުންނާ ދެކޮޅަށް ފިޔަވަޅު އަޅާ ތަން ފެނުން އެކަށީގެންވޭ
ކެންދޫ ދާއިރާގެ މެންބަރު އަލީ ހުސެއިން
މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން(އެމްއެމްޕީއާރްސީ) މެދުވެރިކޮށް ހިންގި ބޮޑު ޚިޔާނާތުގެ ތަހުގީގު ރިޕޯޓް ނުނެރި ލަސްކުރަނީ މަޖިލިސްގެ ބައެއް މެންބަރުންނަށް ބިރުދައްކަންވެގެން ކަމަށް ރައްޔިތުންގެ މަޖިލީހުގެ ކެންދޫ ދާއިރާގެ މެންބަރު އަލީ ހުސެއިން ވިދާޅުވެއްޖެ އެވެ.
ކެންދޫ ދާއިރާގެ މެންބަރު އަލީ ހުސެއިން ވިދާޅުވީ މަޖިލީހުގެ ރައީސްގެ އިތުބާރު ނެތްކަމުގެ ވޯޓާ ގުޅިގެން މަސައްކަތް ކުރާ ކޮންމެ މެންބަރަކާ ދެކޮޅަށް ވެސް ފިޔަވަޅުތައް އަޅާތަން ފެނުމަކީ އެކަށީގެންވާ ކަމެއް ކަމަށެވެ. އެހެން ނަމަވެސް، އެ މަސައްކަތުގައި ނިކުތީ އެފަދަ ފިއްތުންތަކާއި ބިރުވެރިކަމެއް ކުރިމަތިނުވާނެ ކަމަށް ބަލައިގެން ނޫން ކަމަށް އަލީ ހުސެއިން ވިދާޅުވި އެވެ.
"އަޅުގަނޑު ގަބޫލުކުރާ ގޮތުގައި އެމްއެމްޕީއާރްސީގެ ރިޕޯޓް ނުނެރި ލަސްކުރީ ވެސް ހަމަ މި ކަހަލަ ސަބަބުތަކަށްޓަކައި، އެބޭފުޅުން ބޭނުންވާ ބައެއްގެ ނަން އެ ރިޕޯޓަށް އަރުވާލުމުގެ ފުރުސަތު އޮތް ކަމުގެ ބިރު އަޅުގަނޑުމެންގެ ތެރެއިން ބައެއް މެންބަރުންނަށް ދައްކައިގެން މި ވޯޓަށް ހުރަސް އެޅުމުގެ ގޮތުން،" އަލީ ހުސެއިން ވިދާޅުވި އެވެ.
އަލީ ހުސެއިން ވިދާޅުވީ ބިރުދެއްކުމާއި ފިއްތުންތަކާއި ކުރިމަތިވިޔަސް މަސީހުގެ އިތުބާރު ނެތް ކަމަށް ވޯޓް ދެއްވަން ތިއްބެވި މެންބަރުން އެ ގޮތުގައި ދެމިތިބޭނެ ކަމަށާއި، މަސީހުގެ މައްޗަށް އިތުބާރު ނެތް ކަމަށް ފާސްވާނެކަމުގެ ޔަގީންކަން އާންމުންގެ ތެރޭގައި ވެސް ބޮޑުވަމުންދާ ކަމަށެވެ.
އަލީ ހުސެއިން ވިދާޅުވީ މިއަށް ވުރެ ދަތި އުނދަގޫ ހާލަތުތަކުގައި ދޭންޖެހޭ ވޯޓްތައް ރައްޔިތުންނާއި ގާނޫނު އަސާސީގެ ދިފާއުގައި ޖުމްހޫރީ ޕާޓީން އައީ ދެމުން ކަމަށާއި އެހެންކަމުން މަސީހުގެ އިތުބާރުގެ މައްސަލައިގައި ވެސް އެގޮތުގެ މަތިން ރައްޔިތުން ބޭނުންވާ ގޮތަށް ޖުމްހޫރީ ޕާޓީގެ ހުރިހާ މެންބަރުން ވޯޓް ދެއްވާނެ ކަމަށެވެ.
މަޖިލީހުގެ ގިނަ މެންބަރުންތަކަކަށް ޚިޔާނާތުގެ ފައިސާ ލިބިފައިވާ ކަމަށް ރައީސް އަބްދުﷲ ޔާމީން ވަނީ ވިދާޅުވެފަ އެވެ. ރައީސް ޔާމީން ވިދާޅުވީ ކުރީގެ ނައިބު ރައީސް އަހުމަދު އަދީބު އެއިރު ބެއްސެވި ފައިސާއަކީ ޚިޔާނާތުގެ ފައިސާކަމެއް މެންބަރުންނަށް ނޭނގޭނެ ކަމަށެވެ.
