ހަތް މަހަށް ފަހު ރާއްޖެޓީވީގެ ސީއޯއޯ ފިޔާޒުގެ ޝަރީއަތް މާދަމާ ފަށަނީ

ރާއްޖެޓީވީގެ ޗީފް އޮޕަރޭޓިން އޮފިސަރު ހުސެއިން ފިޔާޒް މުސާގެ މައްޗަށް ދައުލަތުން އުފުލާފައިވާ ދައުވާގެ ޝަރީއަތުގެ އަޑުއެހުމެއް އާދިއްތަ ދުވަހަށް ތައާވަލްކޮށްފި އެވެ.

ފިޔާޒުގެ މައްޗަށް ކުރަނީ ފުލުހެއްގެ ގައިގައި އަތްލުމުގެ ދައުވާ އެވެ. ދައުވާގައި ބުނެފައިވަނީ، މުލިއާގެ ކައިރިން ފެނުނު ބޮމެއް، ސްޓޭޑިއަމް ސަރަހައްދުގައި ނައްތާލުމަށް ސަލާމަތީ ބާރުތަކުން ހަރަކާތްތެރިވަމުންދަނިކޮށް، އެ ސަރަހައްދުން ފިޔާޒު ނުގޮސް، ފުލުހެއްގެ މޭ މަތީ ޖަހާފައިވާ ކަމަށެވެ. އެހެންވެ، ފުލުހެއްގެ ގައިގައި އަތްލުމުގެ ދައުވާ ވަނީ ކޮށްފަ އެވެ. ފުރަތަމަ ފިޔާޒުގެ މައްޗަށް އުފުލީ ފުލުހެއްގެ ގައިގައި ޖެހިކަމުގެ ދައުވާ އެވެ. ނަމަވެސް އެ ދައުވާ އަނބުރާ ގެންގޮސް އަލުން ދައުވާކުރީ ފުލުހެއްގެ ގައިގައި އަތްލިކަމުގެ ދައުވާއެވެ.

ދައުވާ ބަދަލުކުރި ސަބަބެއް ޕްރޮސިކިއުޓަ ޖެނެރަލްގެ އޮފީހުން ހާމަކޮށްފައެއް ނެތެވެ. ދައުލަތުން އުފުލާފައިވާ ދައުވާއަށް ފިޔާޒު ވަނީ އިންކާރުކޮށްފަ އެވެ.

އާދިއްތަ ދުވަހަށް ތައާވަލްކޮށްފައިވަނީ، ހެކިބަސް ނެގުމުގެ ޝަރީއަތުގެ މަޖިލީސް އެވެ. ފިޔާޒްގެ ފަރާތުން ވަނީ ހެކީންގެ ގޮތުގައި ހަތް ނޫސްވެރިޔަކާއި، ރާއްޖެ ޓީވީގެ ލައިވް ކަވަރޭޖްގެ ވީޑިއޯ ހުށަހަޅާފަ އެވެ.

ފިޔާޒުގެ ފަރާތުން ހުށަހެޅި ހެކިން:

• ރާއްޖެ ޓީވީގެ ސްޕޯޓްސް ޖާނަލިސްޓް ލީވާން އަލީ ނަސީރު
• ރާއްޖެ ޓީވީ ނޫސްވެރިޔާ އަހުމަދު އަޒްމޫން (އޭރު އަޒުމޫނަކީ ސީއެންއެމްގެ ނޫސްވެރިއެއް)
• ރާއްޖެ ޓީވީގެ ނޫސްވެރިޔާ މުހައްމަދު ވިޝާމް
• ރާއްޖެ ޓީވީގެ ނޫސްވެރިޔާ މުރުޝިދު އަބްދުލް ހަކީމް
• މިހާރު ނޫހުގެ ފޮޓޯގްރާފާ މުހައްމަދު ޝަރުހާން
• ސަން އޮންލައިންގެ ނޫސްވެރިޔާ އަހުމަދު ޝަރުވާން
• ޕީއެސްމްގެ ފޮޓޯ ގްރްފާ އަލީ ނަސީރު

އެންމެފަހުން ބޭއްވި އަޑުއެހުމުގައި ފިޔާޒްގެ ފަރާތުން ވަނީ ދައުވާގައި ސާފު ނުވާ ކަންތައްތަކެއް ހުރިކަން ފާހަގަކޮށްފަ އެވެ. އެ ނުކުތާ ފިޔާޒްގެ ފަރާތުން ފާހަގަކުރުމާއި ގުޅިގެން ދައުލަތުގެ ވަކީލް ވިދާޅުވީ، އެކަންކަން ހެކިބަސް ނެގުމަށް ބާއްވާ ޝަރީއަތުގައި ސާފުވާނެ ކަމަށެވެ.

ފިޔާޒްގެ މައްޗަށް ކޮށްފައިވާ ދައުވާގެ ޝަރީއަތުގެ އަޑުއެހުމެއް ބާއްވާއިރު، ރާއްޖޭގެ ޓީވީގެ އިތުރު ނޫސްވެރިންގެ މައްޗަށްވެސް އަންނަނީ ޝަރީއަތް ހިންގަމުންނެވެ.