ބުރާސްފަތި ދުވަހުގެ ރޭ ކޯޓު އަމުރެއް ނެތި މ. ކުނޫޒް ތެރެއަށްވަދެ އެތަނުގައި ތިބި ބައެއްގެ މޫނަށް ޕެޕަރސްޕްރޭ ޖެހި މައްސަލަ ޖުމްހޫރީ ޕާޓީން ނޭޝަނަލް އިންޓަރގްރިޓީ ކޮމިޝަނަށް ހުށަހަޅައިފިއެވެ.
ޖުމްހޫރީ ޕާޓީން ހުށަހެޅި މައްސަލައިގައި ބުނެފައިވަނީ ޤާނޫނުއަސާސީއާ ޤާނޫނުތަކާ ޚިލާފަށް ރައީސް ޔާމީން އާއި ސަރުކާރުން ތަކުރާރުކޮށް ޚިލާފްވަމުން ދިއުމާއި، ރައްޔިތުންގެ އަސާސީ ޙައްޤުތަކާއި އެތައް ރައްޔިތުންނެއް ނުހައްޤުން ހައްޔަރުކޮށް ސިޔާސީ ލީޑަރުން ޖަލަށްލައި ހިންގަމުން ގެންދާ ޖަރީމާތަކާމެދު ރައްޔިތުން ހިތްހަމަނުޖެހިގެން ރާއްޖޭގެ އެކިކަންކޮޅުތަކުގައި ކުރަމުންދާ އިހުތިޖާޖްތަކުގެ ތެރެއިން މާލޭގައި ބުރާސްފަތި ދުވަހުގެރޭ ދަންވަރުގެ ވަގުތުގައި މޯލްޑިވްސް ޕޮލިސް ސަރވިސްގެ އެސްއޯ ފުލުހުން އެއްވެސް ބެލުމެއް އުސޫލެއް ހަމައެއް ނެތި ޖުމްހޫރީ ޕާޓީގެ އޮފީސް މާފަންނު ކުނޫޒް ތެރެއަށް އެއްވެސް ހުއްދައެއް ހޯދުމަކާއި ނުލައި ވަދެ ތަނުގެ އެތެރޭގައި ތިބި އެތަކެއް ރައްޔިތުންނަށް ގަސްދުގައި އަނިޔާ ދިނުމުގެ މަޤްސަދުގައި އެމީހުން ހިފަހައްޓައި އެމީހުންގެ މޫނަށާއި ލޮލަށް އަމާޒުކޮށް ފޫޓަކަށްވުރެވެސް ކައިރިން ޕެޕަރސްޕްރޭ ޖަހައި އަނިޔާވެރިކޮށް ބައެއް މީހުން ތަނުގެ ތެރެއިން ބޭރުކޮށް ހިންގާފައިވާ އިންސާނިއްޔަތާ ޚިލާފް މި ޢަމަލުތައް ތިޔަ ކޮމިޝަނުން ބައްލަވައިދެއްވުން އެދޭ ކަމަށެވެ.
ޖޭޕީން ބުނީ ހަމަ އެރޭ ކުނޫޒްގެ ތެރެއަށް ހުއްދަ ހޯދުމެއްނެތި ޤާނޫނާ ޚިލާފަށް ވަދެ ބައެއް ފުލުހުން ހިންގާފައިވާ މި ޖަރީމާގެ ތެރެއިން މ ގޯނބިލިގަސްދޮށުގެ ޢަބްދުﷲ ސަލީމްގެ މޫނަށާއި އަނގަޔަށާއި ލޮލަށް ގިނަ ޢަދަދަކަށް ޕެޕަރސްޕްރޭ ޖެހުމުގެ ސަބަބުން އޭނާ ފިޓްޖެހި ހޭނެތުމުންވެސް އޭނާއަށް އެހީތެރިނުވެ، ފުލުހުން އޭނާ ދޫކޮށްލާފައި ދިޔައިރު، ތަނުގެ ތެރޭގައި ތިބި އެހެން މީހުންނަށްވެސް އޭނަޔަށް އެހީތެރިވެވޭނެ ހާލަތެއްގައި ނެތް ހިނދު ފުލުހުންގެ އެހީތެރިކަން ގަސްދުގައި ނުދިނުމަކީ މީހެއްގެ ފުރާނަޔަށް ގެއްލުން ލިބިދާނެފަދަ ޙާލަތެއް ކަމަށްވެފައި އިންސާނިއްޔަތަށްޓަކައިވެސް އެހީތެރިވުމުގެ މަޤްސަދު އެފަދަ ފުލުހުންގެ ކިބައިގައި ނެތްކަމުން މިއަދު ޢަބްދުﷲ ސަލީމް އެގެންދަނީ އައިޖީއެމް ހޮސްޕިޓަލުގެ އައިސީޔޫގައި ފުރާނަޔާ ހަނގުރާމަ ކުރަމުން ކަމަށެވެ.
ފުލުހުންނަކީ އެމީހުންގެ ޤައުމީ މަސައްކަތުގައި ރައްޔިތުންނާ ގާތުން ޚިދުމަތްދީ ރައްޔިތުން ކުށްތަކުން ސަލާމަތްކޮށްދީ ނުރައްކާތެރި ޙާލަތްތަކުން ސަލާމަތްކޮށްދިނުމުގެ އިޖްތިމާޢީ ޒިންމާ އަދާކުރުންމަތީ ދެމިތިބެންޖެހޭ ބައެއް ކަމުގައި ވީނަމަވެސް ފުލުހުންގެ ޢަމަލްތައް ހުރީ އެއާ ދިމާ އިދިކޮޅަށް ކަމަށްވެފައި މިފަދަ ފުލުހުންނަކީ ޚިދުމަތުގައި ބައިތިއްބަން އެކަށޭނަ ތަމްރީނާ ތަރުބިއްޔަތު ލިބިފައިވާ ބައެއްކަމަށް ނުފެންނާތީ މިކަންކަން ބައްލަވައި ދިނުމަށްވެސް ހުށަހަޅާ ކަމަށެވެ.
