ފޭދޫ އެމްޑީޕީ ޖަގަހައަށް ވަދެ މާރާމާރީ ހިންގި މީހަކު ޒަހަމް ކޮށްލައިފި
ފުލުހުން ބުނީ އެމައްސަލާގައި އެއްވެސް މީހަކު ހައްޔަރު ނުކުރާ ކަމަށް
އައްޑޫގައި ބޭއްވި އެމްޑީޕީގެ ކެމްޕޭން ހަރަކާތެއްގެ ތެރެއިން
ރައްޔިތުންގެ މަޖިލީހުގެ ސަރުކާރަށް ނިސްބަތްވާ މަޖިލީހުގެ މެމްބަރަކާ ގާތް ގުޅުމެއް އޮންނަ ގްރޫޕަކުން، އައްޑޫ ސިޓީ ފޭދޫގައި ހުންނަ އެމްޑީޕީ ޖަގަހައަށް ވަދެ އެތަނުގައި ތިބި ބަޔަކާ މާރާމާރީ ހިންގާ މީހަކު ޒަހަމް ކޮށްލައިފި އެވެ.
ހުކުރު ދުވަހުގެ ރޭ ގާތްގަނޑަކަށް 01:30 އެހާކަންހާއިރު، ފޭދޫގައި ހުންނަ އެމްޑީޕީގެ ޖަގަހައަށް ދެ މީހަކު ވަދެ، އައްޑޫ ސިޓީ ކައުންސިލްގެ ކުރީގެ މެމްބަރު އަހުމަދު މިރުޒާއާއި އެމްޑީޕީ ފޭދޫ ދާއިރާގެ ރައީސް މުހައްމަދު ނިހާދު އިތުރުން ފިރާގު ކިޔާ މީހެއްގެ ނަން ބުނެ އެމީހުން ކޮބައިތޯ އަހައި އެތަނުގައި ހުރި މީހަކާ މާރާމާރީ ހިންގާފައިވެއެވެ. މީގެ އިތުރުން މިރުޒާގެ ބައްޕަގެ ގައިގައި ބަޔަކު ސައިކަލުން ޖައްސަން އުޅުނު ކަމަށް ވެސް ރާއްޖެ އެމްވީއަށް އެނގިފައިވެ އެވެ.
މިރުޒާ ބައްޕަ ދިރިއުޅޭ ގޭކައިރީގައި ހުއްޓައި ސައިކަލުން ޖެއްސޭ ގޮތް ނުވުމުން ސައިކަލުން ފައިބާ ހަމަލާދީ އޭނާ މަގުމައްޗަށް ވައްޓާލިކަމަށް، މަންޒަރު ފެނުނު ބައެއް މީހުން ބުންޏެވެ. އޭގެ ކުޑަ ވަގުތު ކޮޅެއްފަހުން ފުލުހުން އެތަނަށް ގޮސް އެ ދެ މީހުން ހައްޔަރުކުރި އެވެ. އެމީހުން ހައްޔަރު ކުރުމުގެ ތެރޭގައި އެ ގްރޫޕްގެ އެކަކު، އެތަނުގައި ތިބި މީހުންނާ ދިމާއަށް "ގޭ ވަށައި ޕެޓްރޯލް އަޅައި ރޯކޮށްލި ނަމަވެސް އެމީހުން ހައްޔަރު ނުކުރެވޭނެ ކަމަށާއި ހައްޔަރު ކުރިނަމަވެސް ނިކުންނާނެ ކަމަށް" ބުނި ކަމަށްވެ އެވެ.
އެ މާރާމާރީއާއެކު މިރުޒާގެ ބައްޕައަށް ވަނީ ފޭދޫ ސިއްހީ މަރުކަޒުން ފަރުވާދީފަ އެވެ. އޭނާގެ ދެ އަތުގައި ޒަހަމްތަކެއް ހުރިއިރު، ދެފައިވެސް ކޮންމެވެސް ވަރަކަށް ޒަހަމް ވެފައިވެއެވެ.
އެމްޑީޕީ ޖަގަހައަށް ވަދެ މާރާމާރީ ހިންގި މީހުން ވެސް ބުނީ އެ ރަށުން އެމްޑީޕީ ފޮހެލާނެ ކަމަށެވެ.
ފޭދޫން ދެ މީހަކު ހައްޔަރުކުރި ނަމަވެސް، ފުލުހުންގެ މީޑިއާ އޮފިޝަލް ހޮނިހިރު ދުވަހު "ރާއްޖެއެމްވީ"އަށް ވިދާޅުވީ ހުކުރު ދުވަހުގެ ރޭ ހިނގި މާރާމާރީއާ ގުޅިގެން މިވަގުތު އެއްވެސް މީހެއް ބަންދުގައި ނެތް ކަމަށެވެ. ނަމަވެސް ރަށުތެރެ ހަލަބޮލި ވުމާއި ގުޅިގެން ފުލުހުން ހިންގި އޮޕަރޭޝަނެއްގައި މަސްތުގެ ހާލަތުގައި ތިބި ހަތް މީހަކު ހައްޔަރު ކޮށްފައިވާ ކަމަށް ފުލުހުން ބުންޏެވެ.
