ފުލުހުން އެމްޑީޕީ ހަރުގެއަށް ވަދެ، ޖަލްސާ ހުއްޓުވައިފި
އެމްޑީޕީ ހަރުގެއަށްވަދެ، ފުލުހުން ވަނީ ސައުންޑު ކަނޑާލާފަ
ފުލުހުން އެމްޑީޕީ ހަރުގެ ތެރޭގައި ހަރަކާތްތެެރިިވަނީ
ލޯކަލް ކައުންސިލް އިންތިހާބުގެ ކެމްޕޭންގެ ތެރެއިން އެމްޑީޕީން "ހަރުގެ ޖަލްސާ" ކުރިއަށްގެންދަނިކޮށް، ފުލުހުން ހަރުގެއަށްވަދެ، ޖަލްސާ ހުއްޓުވައިފި އެވެ.
ސިލްސިލާކޮށް، އެމްޑީޕީން ހަރުގެ ޖަލްސާ ކުރިއަށްގެންދާއިރު، ބުދަ ދުވަހުގެ ރޭ ޖަލްސާ ކުރިއަށްދަނިކޮށް، ކުއްލިގޮތަކަށް ފުލުހުން ވަނީ އެމްޑީޕީ ހަރުގެއަށްވަދެފަ އެވެ. 11:15 ހާއިރު ފުލުހުން އެމްޑީޕީ ހަރުގެއަށް ވަދެ، ވަނީ ސައުންޑް ކަނޑާލުމަށް އަންގާފަ އެވެ. އަދި އެއާއިއެކު، ހަރުގާގައި ހުރި އެއްވެސް މީހެއްގެ ހުއްދައެއް ހޯދުމަކާއި ނުލާ ފުލުހުން ވަނީ ހަރުގޭގައި ބޭނުންކުރަމުންދިޔަ ސައުންޑް ކަނޑާލާފަ އެވެ.
ފުލުހުން އެމްޑީޕީ ހަރުގެއަށް ވަންއިރު، ކޯޓު އަމުރެއް ގެންގުޅެފައެއް ނުވެއެވެ. މީގެކުރިން އެމްޑީޕީން ހަރުގޭގެ ތެރޭގައި ޖަލްސާ ކުރިއަށްގެންދާއިރު، އެއްވެ އުޅުމުގެ މިނިވަންކަން ހަނިކޮށް ސަރުކާރުން އެކުލަވާލި ގަވައިދުގެ ދަށުން 12:00 ވަންދެން އެއްވުންތައް ކުރިއަށްގެންދިއުމަށްވެސް ފުރުސަތު ލިބެއެވެ. ނަމަވެސް ފުލުހުން ކުއްލިގޮތަށް ހަރުގެއަށްވެދެ ޖަލްސާއަށް ހުރަސްއެޅި ސަބަބެއް ފުލުހުން ހާމައެއް ނުކުރެއެވެ.
މިކަމާއި ގުޅޭގޮތުން ފުލުހުންގެ ބަހެއް ހޯދުމަށް ކުރި މަސައްކަތް ކާމިޔާބުވެފައެއް ނުވެއެވެ.
އެމްޑީޕީ ހަރުގޭގައި ހުންނަވާ، މެމްބަރު ޤަފޫރު ނޫސްވެރިންނަށް މައުލޫމާތުދެއްވަނީ -- ފޮޓޯ: ރާއްޖެ.އެމްވީ
ޖަލްސާއަށް ހުރަސްއެޅުމާ ގުޅިގެން ރާއްޖެޓީވީއަށް މައުލޫމާތުދެއްވަމުން ކުޅުދުއްފުށީ އުތުރު ދާއިރާގެ މެމްބަރު އަބްދުއް ގަފޫރު މޫސާ ވިދާޅުވީ، ފުލުހުން ކުއްލިގޮތަކަށް ހަރުގެއަށްވަދެ، ސައުންޑް ކަނޑާލާފަ ދިޔައީ ކަމަށާއި، ވީގޮތްވެސް ނޭނގޭ ކަމަށެވެ. އަދި މިހާރު ފެންނަނީ ވަރަށް ލަދުވެތި މަންޒަރެއް ކަމަށް ގަފޫރު ވިދާޅުވި އެވެ. އޭނާ ވިދާޅުވީ އެމްޑީޕީން ކަންތައްތައް ކުރިއަށްގެންދަނީ ޤާނޫނުތަކާއި އެއްގޮތްވާގޮތުގެ މަތިން ކަމަށެވެ.
"ކޮން ޤާނޫނީ ބާރެއްލިބިގެންތޯ އެ މީހުން ކަންތައްތައް އެކުރަނީ. އަޅުގަނޑުމެންނަށް ހަމަ އެއްގޮތަކަށްވެސް ނޭނގެ. އަޖައިބުވާވަރުގެ ކަންތައްތައް ހިނގަމުންމިދަނީ. މިހިނެއް ކަންތައްތަކެއް ނުކުރެވޭނެ. އަޅުގަނޑުމެންވެސް ހެދިފައިވާ ޤާނޫނުތަކާއި އެއްގޮތްވާގޮތުގެމަތިން ކަންތައްތައް ކުރަމުންމިގެންދަނީ. އެގޮތަކަށް ކަންތައްތައް ކުރަމުންދާއިރުގައި އެ ބޭފުޅުން އައިސް ހިތަށް އެރީމަ، ހަރުގެއަށްވަދެ، މިތަނުގައި ހިނގާ ކަންތައްތައް ހުއްޓާލާ، މި ހުރިހާ ކަމެއް ކުރެވޭ. އެ ބޭފުޅުން ޖަލްސާ ބާއްވަންވީމަ، ބޭނުންތަނެއްގައި ބޭނުން އިރެއްވަންދެން އެކަންތައްތައް ކުރެވޭ" އެމްޑީޕީ ޕާލިމެންޓްރީ ގުރޫޕުގެ މެމްބަރު އަބްދުއް ގަފޫރު މޫސާ ވިދާޅުވި އެވެ.
އެމްޑީޕީ ހަރުގޭގައި ހުންނަވާ މެމްބަރު ނާޒިމް ރާއްޖެޓީވީއަށް މައުލޫމާތުދެއްވަނީ -- ފޮޓޯ: ރާއްޖެެ.އެމްވީ
ހަރުގޭގައި ހުންނަވާ ރާއްޖެޓީވީއާއި ވާހަކަދައްކަވަމުން ވައިކަރަދޫ ދާއިރާގެ މެމްބަރު މުހައްމަދު ނާޒިމް ވިދާޅުވީ، އެމްޑީޕީ ހަރުގެއަށް ފުލުހުން ވަދެފައިވަނީ ކޯޓު އަމުރަކާއިވެސް ނުލާ ކަމަށެވެ. އަދި ކޯޓު އަމުރަކާއި ނުލާ ވަނުމަށްފަހު، އަމިއްލައަށް ކަރަންޓަ ކަނޑާލާފަ ދިޔައީ ކަމަށާއި، ފުލުހުން އަމަލުކޮށްފައިވަނީ ޤާނޫނު އަސާސީއައި ހިލާފަށް ކަމަށެވެ.
ނާޒިމް ވިދާޅުވީ، އެއްވެ އުޅުމުގެ މިނިވަންވްކަން ވަރަށް ފުޅާ ދާއިރާއެއްގައި ލިބިދީފައިވާ ކަމަށެވެ. ނަމަވެސް އެމްޑީޕީގެ އެއްވެސް ހަރަކާތަކަށް ފުރުސަތު ނުދޭ ކަމަށާއި، އެކަން އެގޮތަށް ކުރަނީ ރައްޔިތުންދެކެ ގަންނަ ބިރެއްގެ ސަބަބުންކަމަށް ނާޒިމް ވިދާޅުވި އެވެ.
"މިރޭ އައީ ކޯޓު އަމުރެއް ނުވެސްލާ، ކޯޓު އަމުރެއްނުލާ އައިސަ އަޅުގަނޑުމެންގެ ހަރުގެއަށް ވަދެ، އެބޭފުޅުންގެ އަތުން ކަރަންޓު ކަނޑާލާފަ އެ ދިޔައީ. މިދެން ހައްދުން ނެއްޓީ އިނގޭތޯ ކަންކަމުގަ" މެމްބަރު މުހައްމަދު ނާޒިމް ވިދާޅުވި އެވެ.
އެމްޑީޕީގެ ސިޔާސީ ހަރަކާތްތަކަށް ފުލުހުން ހުރަސްއަޅަމުންގެންދާއިރު، ކޯޓުއަމުރަކާއެކު މި ހަފްތާގެ ތެރޭގައިވެސް ދެ ފަހަރެއްގެމަތިން ފުލުހުން އެމްޑީޕީ ހަރުގެއަށްވަދެ، ގިނަ އަދަދެއްގެ ތަކެތި ގެންގޮސްފައިވެއެވެ. އެގޮތުން އަނގާރަ ދުވަހުގެ ހަވީރުވެސް ފުލުހުން ވަނީ އެމްޑީޕި ހަރުގެއަށް ވަދެފަ އެވެ.
