ހުއްދަ ނުހޯދައި އޮފީހަށް ވަދެ، ގެއްލުންދިން މީހުން މައްޗަށް ދައުވާ ކުރާނަން: ރައީސް މައުމޫން

ހުއްދަ ނުހޯދައި ޕީޕީއެމްގެ ރައީސްގެ އޮފީހަށް ވަދެ ގެއްލުން ދިން މީހުންގެ މައްޗަށް ދައުވާ ކުރައްވާނެ ކަމަށް ޕީޕީއެމް ރައީސް އަދި ކުރީގެ ރައީސް މައުމޫން އަބްދުލް ގައްޔޫމް ވިދާޅުވެއްޖެއެވެ.

ސިވިލް ކޯޓުގެ އަމުރަކާ ގުޅިގެން ފުލުހުން ޕީޕީއެމްގެ ރައީސްގެ އޮފީހަށް ވަދެ އޮފީހުގެ ނަންބޯޑާއި ޕީޕީއެމްގެ ދިދަ ނެގުމާ ގުޅިގެން ރައީސް މައުމޫން ކުރެއްވި ޓްވީޓެއްގައި ވިދާޅުވީ އެމަނިކުފާނު ކުއްޔަށް ހިފާފައިވާ އިމާރާތަކަށް ހުއްދަ ނެތި ބަޔަކު ގެއްލުން ދީފައި ވާތީ އެ ގެއްލުން ދިން މީހުންގެ މައްޗަށް ދައުވާ ކުރައްވާނެ ކަމަށެވެ.

ކޯޓު އަމުރު ތަންފީޒްކުރުމަށް ކަމަށް ބުނެ، ޕީޕީއެމްގެ ރައީސްގެ އޮފީހުގައި ހުރި ނަން ބޯޑާއި، ދިދަ ނެގުމަށް ފުލުހުން، ހ. ތެމާއަށް ވަދެފައިވަނީ، ހުކުރު ދުވަހުގެ ރޭ 7:30 ގައެވެ. އަދި ފުލުހުން އެ އޮފީހަށްވަދެފައި ވަނީ، އޮފީހުގެ ތަޅު ހަލާކުކޮށްލުމަށް ފަހުގައެވެ. ތަޅު ހަލާކުކޮށްލުމަށް ފަހު ވަދެ ވަނީ ރައީސް މައުމޫނުގެ އޮފީހުގައި ހުރި ޕީޕީއެމްގެ ދިދަ ނަގައި، ޕީޕީއެމްގެ ރައީސްގެ އޮފީހުގެ ނަން ބޯޑް ނަގައިފަ އެވެ.

ފުލުހުން ރައީސް މައުމޫންގެ އޮފީހަށް ފޮނުވާފައިވާ އެންގުމެއްގައި ބުނެފައި ވަނީ ޕީޕީއެމްގެ ހިންގުން ރައީސް އަބްދުﷲ ޔާމީނާ ހަވާލްކޮށް ކޮށްފައިވާ ހުކުމުގައި ކަނޑައަޅާފައިވާ ގޮތާ ޚިލާފަށް ޕީޕީއެމްގެ ރައީސްގެ ނަމުގައި އޮފީހެއް ހަދާ، ޕީޕީއެމްގެ ދިދަ އާއި ލޯގޯ ބޭނުންކޮށްގެން އަދި ޕީޕީއެމްގެ ނަމުގައި ޖަލްސާ ބާއްވައި އެއްވެސް ހަރަކާތެއް ހިންގާނަމަ އެކަމެއް ހުއްޓުވުމަށާއި، ޕީޕީއެމްގެ ނަމުގައި ހ. ތެމާގައި ހަދާފައިވާ ޕީޕީއެމްގެ ރައީސްގެ އޮފީސް ހިންގުން ހުއްޓުވުމަށާއި، އެތަނުގައި ނަގާފައިވާ ޕީޕީއެމްގެ ދިދަ އެތަނުން ނަގާ އެފަދަ އެއްވެސް ހަރަކާތެއް ހިންދިޔަ ނުދިނުމަށް މޯލްޑިވްސް ޕޮލިސް ސާވިސްއަށް ސިވިލްކޯޓުން އަމުރުކޮށްފައިވާ ކަމަށެވެ. އެހެންކަމުން އެ އަމުރު ތަންފީޒްކުރުމަށް ކުރުމަށް އަޅަންޖެހޭ ހުރިހާ ފިޔަވަޅުތައް އަޅާނެކަމަށް އެންގުމުގައި ބުނެގައި ވެއެވެ.