ފްލޮރިޑާގެ ހައި ސްކޫލެއްގައި ހިނގި ބަޑި ޖެހުމުގެ ހާދިސާއެއްގައި 17 މީހަކު މަރުވެއްޖެ

އެމެރިކާގެ ފްލޮރިޑާގެ މާރޖޮރީ ސްޓޯންމަން ޑަގްލަސް ހައި ސްކޫލްގެ ކެމްޕަހުގައި ހިނގި ބަޑި ޖެހުމުގެ ހާދިސާއެއްގައި 17 މީހަކު މަރުވެއްޖެއެވެ.

ފްލޮރިޑާގެ ޕާކްލެންޑްގައި ހުންނަ ހައި ސްކޫލް ކެމްޕަހުގެ ތެރޭގައި ބަޑި ޖަހާފައި ވަނީ ނިކޮލަސް ކްރޫޒް ނަމަކަށް ކިޔާ އުމުރުން 19 އަހަރުގެ ފިރިހެނެއް ކަމަށް މައުލޫމާތު ލިބެއެވެ. އޭނާއަކީ އެ ހައި ސްކޫލުން ކަނޑާލާފައިވާ އެ ސްކޫލްގެ ކުރީގެ ދަރިވަރެއް ކަމަށް ރިޕޯޓްތައް ބުނެއެވެ.

މިއީ 2012 ވަނަ އަހަރު ކަނެކްޓިކަޓް ސްކޫލްގައި ހިނގި ބަޑި ޖެހުމުގެ ހާދިސާ އަށް ފަހު، އެމެރިކާގެ ސްކޫލެއްގެ ތެރޭގައި ދިން މިފަދަ އެންމެ ނުރައްކާތެރި ހަމަލާއެވެ. ކަނެކްޓިކަޓް ސްކޫލްގައި ދިން ބަޑީގެ ހަމަލާގައި 20 ކުއްޖަކު މަރުވިއެވެ.

ނޫސްވެރިންނަށް މައުލޫމާތު ދެމުން ބްރޮވާޑް ކައުންޓީ ޝެރިކް ސްކޮޓް އިސްރާއީލް ބުނީ، ކްރޫޒް ސްކޫލްގެ ތެރެއަށް ވަދެފައި ވަނީ ސްކޫލްގެ ބޭރުގައި ދިން ބަޑީގެ ހަމަލާތަކެއްގައި ތިން މީހަކު މަރާލުމަށް ފަހު ކަމަށެވެ. އަދި ސްކޫލްގެ އިމާރާތުގެ ތެރެއަށް ވަދެ، އިތުރު 12 މީހަކު މަރާލާފައިވާ ކަމަށް ސްކޮޓާއިހަވާލާދީ މީޑިއާ ރިޕޯޓްތައް ބުނެއެވެ.

މީގެ އިތުރުން ކްރޫޒް ދިން ބަޑީގެ ހަމަލާތަކަށް ފަރުވާ ހޯދުމަށް ހޮސްޕިޓަލަށް ގެންދިޔަ ފަހުން އިތުރު ދެ މީހަކު މަރުވެފައިވާ ކަމަށް މީޑިއާ ރިޕޯޓްތައް ބުނެއެވެ.

ބްރޯވާޑް ހެލްތުގެ ފަރާތުން ނޫސްވެރިންނަށް މައުލޫމާތު ދިން ޑރ. އިވާން ބޯޔާ ވަނީ، އެމެރިކާ ގަޑިން ބުދަ ދުވަހުގެ ފަހުގެ ވަގުތެއްގައި ދިން މިހަމަލާއާ ގުޅިގެން 17 މީހަކު ކައިރި ހޮސްޕިޓަލްތަކަށް ގެންގޮސްފައިވާ ކަމަށް ވިދާޅުވިއެވެ. އަދި ހޮސްޕިޓަލުން ފަރުވާ ދިން މީހުންގެ ތެރޭގައި ބަޑީގެ ހަމަލާ ދިން ކްރޫޒް ހިމެނޭ ކަމަށާއި، އޭނާ އަށް ފަރުވާ ދިނުމަށްފަހު ފުލުހުންނާއި ހަވާލުކޮށްފައިވާ ކަމަށް ޑރ. އިވާން ވިދާޅުވިއެވެ.

ހަމަލާ ދިން ކްރޫޒް އެ ސްކޫލުން ވަކިކޮށްފައިވަނީ އަޚުލާޤީ މައްސަލަތަކަކާ ގުޅިގެން ކަމަށް ރިޕޯޓްތައް ބުނެއެވެ.