އިޓާލިއަން ސެރީއޭގައި ރޯމާއާ ދެކޮޅަށް ކުޅުނު މެޗުން އެއްވަރުވެ ތާވަލުގެ ހަތަރުވަނަ އަށް އިންޓަ މިލާން ވެއްޓިއްޖެއެވެ.

އަމިއްލަ ދަނޑުގައި ރޯމާއާ ދެކޮޅަށް އިންޓަ ކުޅުނު މެޗު ނިމިފައިވަނީ 1-1އިން އެއްވަރުވެގެންނެވެ. ލީގުގައި އެންމެ ފުރަތަމަ ކުޅުނު 15 މެޗުގެ ތެރެއިން 12 މެޗުން އިންޓަ މޮޅުވި ނަމަވެސް، އެންމެ ފަހުން ކުޅުނު ހަ މެޗުން ވެސް މޮޅުވެފައެއް ނުވެއެވެ. މި ދެ ޓީމުގެ ފޯވާޑުން ވެސް ހޯދުމަށް ޔޫރަޕުގެ އެންމެ ބޮޑު ޓީމުތަކުން މަސައްކަތްކުރަމުން އަންނައިރު އެ ކުޅުންތެރިން ވަނީ މި ދެ ޓީމުގެ ވެސް ފުރަތަމަ އެގާރައިގައި ހިމެނިގެން ކުޅެފައެވެ.

ދެ ޓީމުގެ ފަރާތުން ވެސް ފޯރިގަދަ ކުޅުމެއް ފެނިގެންދިޔަ މި މެޗުގައި ދެ ޓީމުން ވެސް ވަނީ ލަނޑު ޖެހުމަށް ރަނގަޅު ފުރުސަތުތަކެއް ތަނަވަސްކޮށްފައެވެ. މި މެޗުގެ ފުރަތަމަ ލަނޑު 31 ވަނަ މިނެޓުގައި އިންޓަގެ ޑިފެންސްއަށް ހެދުނު ގޯހެއްގެ ފައިދާ ނަގައިގެން ރޯމާއަށް ޖަހައިދިނީ ސްޓެފަން އެލް ޝާރަވީއެވެ. މި ލަނޑަށްފަހު އިންޓައިން އެ ޓީމުގެ ކުޅުން ރަނގަޅުކުރިއިރު އެ ޓީމަށް ނަތީޖާ ހަމަހަމަކުރެވިފައެއް ނުވެއެވެ.

ރޯމާ ކުރީގައި އޮވެގެން ފުރަތަމަ ހާފު ނިމިގެންދިޔައިރު އިންޓައިން ވަނީ ދެވަނަ ހާފުގައި އެ ޓީމުގެ ކުޅުން ވަރުގަދަކޮށްފައެވެ. މި ހާފުގައި އިންޓައިން އުފެއްދި ގިނަ ހަމަލާތަކުގެ ހުރަހަކަށް ވެގެންދިޔައީ ރޯމާގެ ކީޕަރު އެލިސަންއެވެ. އެހެން ނަމަވެސް މެޗުގެ 86 ވަނަ މިނެޓުގައި މަޓިއަސް ވެސީނޯ ވަނީ އެލިސަން ބަލަހައްޓަމުންދިޔަ ރޯމާގެ ގޯލު ފޫއަޅުވާލުމަށްފަހު އިންޓައަށް ނަތީޖާ ހަމަހަމަކޮށްދީފައެވެ.

ސެރީއޭގައި ލާޒިއޯ ވަނީ 5-1 އިން ޗިއޭވޯ ވެރޯނާ ބަލިކޮށް ތާވަލުގެ ތިންވަނައަށް ޖެހިލާފައެވެ. މި މެޗުގައި ލާޒިއޯގެ ސާޖީ މިލިންކޮވިޗް ދެ ލަނޑު ޖެހިއިރު އެ ޓީމުގެ ލުއިސް އަލްބާޓޯ އަދި ލުއިސް ނާނިގެ އިތުރުން ބާސްޓޯސް ވަނީ ކޮންމެ ކުޅުންތެރިޔަކު ލަނޑެއް ޖަހައިދީފައެވެ. މި މެޗުގައި ޗިއޭވޯއިން ޖެހި ހަމައެކަނި ލަނޑު އެ ޓީމަށް ޖަހައިދިނީ ފޯވާޑް މެނުއެލް ޕުކަރޭލީއެވެ.

ނަޕޯލީ ވެސް ވަނީ ރަށުން ބޭރުގައި 1-0 އިން އެޓަލާންޓާ ބަލިކޮށް ތާވަލުގެ ކުރީގައި އެ ޓީމަށް ލިބިފައިވާ ލީޑު ފުޅާކޮށްފައެވެ. މި މެޗުގައި އެ ޓީމުން ޖެހި ހަމައެކަނި ލަނޑު ޖަހައިދިނީ ބެލްޖިއަމްގެ ފޯވާޑް ޑްރައިސް މާޓެންސްއެވެ. ހަމައެހެންމެ އޭސީ މިލާން ވެސް ވަނީ ރަށުން ބޭރުގައި 2-1 އިން ކަގްލިއާރީ ބަލިކޮށް ތާވަލުގެ ހަތްވަނަ މަގާމަށް ޖެހިލާފައެވެ. ނިކޮލޯ ބޮރޭލާ ކަގްލިއާރީއަށް ލީޑު ނަގައިދިން ނަމަވެސް ފްރޭންކް ޔަނިކް ކެސީ ވަނީ ދެ ލަނޑު ޖަހައިދީ އޭސީ މިލާން މި މެޗުން މޮޅުކޮށްދީފައެވެ.

އިޓާލިއަން ސެރީއޭގެ ޕޮއިންޓް ތާވަލުގެ އެއްވަނައިގައި 21 މެޗުން 54 ޕޮއިންޓް ހޯދައިގެން އޮތީ ނަޕޯލީއެވެ. އެ ޓީމަށްވުރެ އެއް މެޗު މަދުން ކުޅެގެން 50 ޕޮއިންޓާއެކު ޔުވެންޓަސް އޮތްއިރު ތިންވަނައިގައި 43 ޕޮއިންޓާއެކު އޮތީ ލާޒިއޯއެވެ. އިންޓައަށް ވެސް 43 ޕޮއިންޓް ލިބިފައިވާއިރު އެ ޓީމަށް ހަތަރުވަނަ ލިބެނީ ފައިދާ ލަނޑުގެ ތަފާތުންނެވެ.