އިޓާލިއަން ސެރީއޭގައި ލާޒިއޯއާ އެއްވަރުކޮށް އޭސީ މިލާން ޕޮއިންޓް ތާވަލުގެ ހަތްވަނަ އަށް ޖެހިލައިފި އެވެ.
ހޯމަ ދުވަހުގެ ރޭ ލާޒިއޯ އާއި އޭސީ މިލާން ބައްދަލުކުރި މެޗު އެއްވަރުވީ 1-1 ގެ ނަތީޖާއަކުންނެވެ.
ލާޒިއޯ ދަނޑުގައި ކުޅުނު މި މެޗުގައި ދެޓީމުގެ ފަރާތުންވެސް ފެނިގެންދިޔައީ ހަމަހަމަ ކުޅުމެކެވެ. އެގޮތުން ލަނޑު ޖަހަން ގިނަ ފުރުސަތުތަކެއް ދެޓީމަށްވެސް ވަނީ ލިބި ބޭކާރުވެފައެވެ.
މެޗުގައި ފުރަތަމަ ލަނޑު ޖަހާ ލީޑު ނެގީ ލާޒިއޯ އިންނެވެ. މި ލަނޑު ފުރަތަމަ ހާފްގެ އިތުރުވަގުތުގައި އެޓީމަށް ކާމިޔާބުކޮށްދިނީ ބިގްލިއާއެވެ. މި ލަނޑާއެކު ފުރަތަމަ ހާފް ނިމުނީ 0-1 ގެ ނަތީޖާއިން އޭސީ މިލާންގެ މައްޗަށް ލާޒިއޯ ކުރިހޯދައިގެންނެވެ.
ދެވަނަ ހާފް ފެށިގެން ބޯޅަ ކޮންޓްރޯލްކޮށްގެން ރަނގަޅަށް ކުޅުނީ އޭސީ މިލާނެވެ. އެގޮތުން އެޓީމަށް ވަނީ ދެވަނަ ހާފްގައި ލަނޑު ޖެހުމަށް ގިނަ ފުރުސަތުތަކެއް ލިބި ބޭކާރުވެފައެވެ.
މީގެއިތުރުން ލާޒިއޯ އަށް ވެސް ދެވަނަ ހާފްގައި ވަނީ ލީޑު ފުޅާކުރުމަށްވެސް ފުރުސަތުތަކެއް ލިބި ބޭކާރުވެފައެވެ. މެޗުގައި އޭސީ މިލާން އެއްވަރުކުރި ލަނޑު 85 ވަނަ މިނެޓުގައި ކާމިޔާބުކޮށްދިނީ ސުސޯ އެވެ.
މި ނަތީޖާއާއެކު އޭސީ މިލާން އޮތީ ކުޅުނު 24 މެޗުން ލިބުނު 41 ޕޮއިންޓާއެކު ޕޮއިންޓް ތާވަލުގެ ހަތްވަނައިގައެވެ. ލާޒިއޯ އޮތީ ކުޅުނު 24 މެޗުން ލިބުނު 44 ޕޮއިންޓާއެކު ޕޮއިންޓް ތާވަލުގެ ހަ ވަނައިގައެވެ.
