އާސެނަލްގެ ފޯވާޑް ވޮލްކޮޓް އެވަޓަން އަށް ބަދަލުވުމާ ގާތަށް!

އާސެނަލް އަށް ކުޅޭ އިނގިރޭސި ފޯވާޑް ތިއޯ ވޮލްކޮޓް، އެވަޓަން އަށް ބަދަލުވުމާ ގާތަށް ގޮސްފައިވާ ކަމަށް ރިޕޯޓްތައް ބުނެފިއެވެ.

ބީބީސީ އިން ބުނީ، ވޮލްކޮޓްގެ ޓްރާންސްފަރ ފީގެ ގޮތުގައި އާސެނަލް އިން ހުށަހެޅި 20 މިލިއަން ޕައުންޑަށް އެވަޓަން އިން އެއްބަސްވެފައިވާ ކަމަށާއި، ކުޅުންތެރިޔާގެ ސޮއި ހޯދުމާއި ގާތަށް ގޮސްފައިވާ ކަމަށެވެ. އަދި އެވަޓަންގެ މެޑިކަލް ޓެސްޓްތައް ހެދުމަށް ވޮލްކޮޓް ތައްޔާރުވެފައިވާ ކަމަށް ރިޕޯޓްތައް ބުނެއެވެ.

މީގެ 12 އަހަރު ކުރިން ސައުތެމްޕްޓަން އިން އާސެނަލް އާ ގުޅުނު 28 އަހަރުގެ ފޯވާޑް މިސީޒަނުގައި އިނގިރޭސި ޕްރިމިއަރ ލީގުގައި އާސެނަލް އަށް ކުޅެފައި ވަނީ އެންމެ ހަ މެޗެވެ.

ވޮލްކޮޓްގެ ސޮއި ހޯދުމަށް އޭނާގެ ކުރީގެ ކްލަބް ސައުތެމްޕްޓަން އިން ވެސް މަސައްކަތް ކޮށްފައިވެއެވެ.

އާސެނަލް އަށް 397 މެޗު ކުޅެ، 108 ލަނޑު ޖަހާދީފައިވާ ވޮލްކޮޓާއި އާސެނަލްގެ ކޯޗު އާސެން ވެންގާއާ ދެމެދު ޚިޔާލުތަފާތުވުންތަކެއް އުފެދިފައިވާ ކަމުގެ އަޑުތަކެއް ފެތުރިފައިވެއެވެ.

އާސެނަލްއާ އެކު ވޮލްކޮޓް ހަދާފައިވާ އެއްބަސްވުމުގައި ބާކީ 18 މަސް ދުވަސް އޮތްއިރު، އާސެނަލްގެ ކޯޗު އާސެން ވެންގާ ވަނީ، ވޮލްކޮޓް އެޓީމުގައި މަޑު ކުރުމަށް އެދޭ ކަމަށް ބުނެފައެވެ. އެހެން ނަމަވެސް އޭނާ އަށް އެކްލަބުގެ ފުރަތަމަ އެގާރައިން ޖާގަ ދޭނެ ކަމުގެ އިޝާރާތެއް ވެންގާ ދީފައެއް ނުވެއެވެ.

އެވަޓަންގެ ކޯޗު ސެމް އެލާޑީސް ވަނީ، ވޮލްކޮޓަކީ އެކްލަބުގެ ސްކޮޑަށް އިތުރު ކުރަން އެންމެ ރަނގަޅު އެއް ކުޅުންތެރިޔާ ކަމަށާއި، އޭނާއަކީ އިދިކޮޅު ޓީމްތަކުގެ ގޯލަށް ނުރައްކާ ކުރާނެ ކުޅުންތެރިޔެއް ކަމަށެވެ.

މިހާރު މަޝްވަރާ ކުރަމުންދާ ގޮތަށް ތިއޯ ވޮލްކޮޓް ވިއްކާލެވިއްޖެ ނަމަ، އާސެނަލް އިން ބޭނުން ވަނީ ޖަރުމަނުގެ ބޮރޯޝިއާ ޑޯޓްމުންޑަށް ކުޅޭ ޕިއޭ އެމެރިކް އައުބަމެޔަންގ އަދި ފްރާންސް ބޯޑޯގެ ގޯވާޑް މަލްކޮމް ގެނައުމަށް ކަމަށް ރިޕޯޓްތައް ބުނެއެވެ.

މީގެ އިތުރުން އާސެނަލްގެ ފޯވާޑް އެލެކްސިސް ސަންޗޭޒް ޔުނައިޓެޑަށް ވިއްކާލުމަށް ފަހު، ޔުނައިޓެޑްގެ މިޑްފީލްޑަރ ހެންރިކް މިޚިތަރްޔަން ގެނައުމަށް އެކްލަބުން މަސައްކަތް ކުރަމުންދާ ކަމަށް ވެސް ރިޕޯޓްތައް ބުނެއެވެ.

އެހެންނަމަވެސް އާސެނަލް އިން އެ ތިން ކުޅުންތެރިން އެކުގައި ގެނައުމަކީ ވުމަށް ވުރެ ނުވުން ގާތް ކަމެއް ކަމަށާއި، މިޚިތަރްޔަންގެ ޓްރާންސްފަރގެ ކަންކަމުގައި އެއްބަސްވުމަކާއި ގާތްވެފައިނުވާ ކަމަށް އޭނާގެ ގާތް ފަރާތަކާ ހަވާލާދީ ބީބީސީ އިން ބުނެއެވެ.

މީގެ އިތުރުން އާސެނަލް އިން ވަނީ އެކްލަބަށް ކުޅޭ އިނގިރޭސި މިޑްފީލްޑަރ ޖެކް ވިލްޝެއަރ އަށް އާ އެއްބަސްވުމެއް ހުށަހަޅާފައެވެ. އާ އެއްބަސްވުމުގެ ދަށުން ވިލްޝެއަރ އަށް ހުށަހަޅާފައިވާ މުސާރައަކީ، މިހާރު އޮތް އެއްބަސްވުމުގެ ދަށުން ދޭ މުސާރަ އަށް ވުރެ ކުޑަ މުސާރައެއް ނަމަވެސް، އާ އެއްބަސްވުމުގައި ވިލްޝެއަރ ޝައުގުވެރިވާނެ އެހެން ބައެއް ކަންކަން ހިމަނާފައިވާ ކަމަށް ރިޕޯޓްތައް ބުނެއެވެ.

އުމުރުން 26 އަހަރުގެ ވިލްޝެއަރ އެކްލަބާ އެކު މިހާރު ހަދާފައިވާ އެއްބަސްވުމުގެ މުއްދަތު މިސީޒަނުގެ ނިޔަލަށް ހަމަވާނެއެވެ.