އެވަޓަން އިން އެ ކްލަބަށް ކުޅެމުން އަންނަ ބެލްޖިއަމްގެ ފޯވާޑް ރަމެލޫ ލުކާކޫއަށް އާ އެއްބަސްވުމެއް ހުށަހަޅައިފި އެވެ.
ރިޕޯޓްތައް ބުނާގޮތުން ލުކާކޫ އަށް އެވަޓަން އިން ވަނީ އާ އެއްބަސްވުމެއް ހުށަހަޅާފައެވެ. އެގޮތުން އެ އެއްބަސްވުމުގައިވާ ގޮތުން އޭނާ އަށް ހަފްތާއަކު 250،000 ޕައުންޑު ލިބޭނެއެވެ. އެހެންނަމަވެސް މި އެއްބަސްވުމަށް ލުކާކޫ އާއެކޭ ބުނިކަމެއް އަދި ކަށަވަރެއް ނުވެއެވެ.
ޕްރިމިއާ ލީގުގައި މި ސީޒަނުގައި ކުޅުނު 28 މެޗުގައި 21 ލަނޑު ކާމިޔާބުކޮށްފައިވާ ލުކާކޫ ހޯދުމަށް ދުނިޔޭގެ ނަން މަޝްހޫރު ގިނަ ކްލަބްތަކުންވެސް ދަނީ މަސައްކަތްކުރަމުންނެވެ. އެހެންނަމަވެސް އަދި ލުކާކޫ ބޭނުންވާފަދަ އެއްބަސްވުމެއް އެއްވެސް ކްލަބަކަށް ހުށަހެޅިފައެއްނުވެއެވެ.
އެވަޓަންއާއެކު 2019 އާ ހަމައަށް އެއްބަސްވުން ހަދާފައިވާ ލުކާކޫ އަށް ކުރިން ހުށަހެޅި އެއްބަސްވުމުގައިވާ ގޮތުން 140،000 ޕައުންޑު ލިބޭނެއެވެ. އެހެންނަމަވެސް ލުކާކޫ ވަނީ އެ އެއްބަސްވުމަށް ނޫނެކޭ ބުނެފައެވެ.
ރިޕޯޓްތައް ބުނާގޮތުން އުމުރުން 23 އަހަރުގެ ލުކާކޫ ޗެމްޕިއަންސް ލީގު ކުޅުމުގެ ފުރުސަތު ހޯދުމަށް އޭނާ މި ސީޒަނަށްފަހު އެހެން ކްލަބަކަށް ބަދަލުވާނެ ކަމަށް ވަނީ ބެލެވިފައެވެ.
ޗެލްސީން 2014 ވަނަ އަހަރު އެވަޓަންއަށް ބަދަލުވި ލުކާކޫ ވަނީ ވެސްޓްބްރޮމް އަށް ވެސް ކުޅެފައެވެ. ޗެލްސީއާއެކު ދެ ސީޒަން ހޭދަކޮށްފައިވާ ލުކާކޫ ވަނީ އެ ޓީމަށް 15 މެޗު ކުޅެދީފައެވެ.
މީގެއިތުރުން އޭނާ ވަނީ މިވީތަނަށް އެވަޓަން އަށް ކުޅުނު 157 މެޗުގައި 83 ލަނޑު ކާމިޔާބުކޮށްފައެވެ.
