އާސެނަލް އަށް ކުޅެމުން އަންނަ ޖެކް ވިލްޝެއާ ގެންދަން މެންޗެސްޓާ ސިޓީގެ ކޯޗު ޕެޕް ގާޑިއޯލާ ބޭނުންވާ ކަމަށް ބާސެލޯނާގެ ލެޖެންޑް ޒަވީ ހެނާންޑޭޒް ބުނެފި އެވެ.

ފޮކްސް ލެޓިން އެމެރިކާ އަށް ދިން އިންޓަވިއުއެއްގައި ޒަވީ ބުނީ ގާޑިއޯލާ އަބަދުވެސް ވިލްޝެއާ އަށް އިހުތިރާމް ކުރާ ކަމަށާއި، އާސެނަލް އާއި ބާސާ 2011 ވަނަ އަހަރު ބައްދަލުކުރި މެޗުގައި ވިލްޝެއާ ވަނީ ބާސާގެ ކުޅުންތެރިން އަދި މެނޭޖްމަންޓް ވެސް ހައިރާންކުރުވާ ފަދަ ކުޅުމެއް ކުޅެފައިވާ ކުޅުންތެރިއެއް ކަމަށެވެ.

މީގެ އިތުރުން ޒަވީ ބުނީ އެ މެޗުގައި ވިލްޝެއާގެ ފަރާތުން ފެނިގެންދިޔަ މޮޅު ކުޅުން ބަލައިގަންނަ ކަމަށާއި، އޭނާގެ އެންމެ ބޮޑު މައްސަލައަކީ ދިމާވާ އަނިޔާގެ މައްސަލަތައް ކަމަށެވެ. އެހެންނަމަވެސް އަނިޔާގެ މައްސަލަ ދިމާނުވާ ނަމަ ވިލްޝެއާ ވެގެންދާނީ ދުނިޔޭގެ އެންމެ މޮޅު އެއް މިޑްފިލްޑަރަށް ކަމަށް ވެސް ޒަވީ ވަނީ ބުނެފައެވެ.

މީގެ އިތުރުން ޒަވީ ބުނީ ވިލްޝެއާގެ ފިޓްނަސްއާ މެދު މިހާރު ސުވާލު އުފެއްދޭނެ ޖާގައެއް ނެތް ކަމަށާއި، އެގޮތުން ވިލްޝެއާގެ ސޮއި ހޯދެން ކިރިޔާ ވެސް ފުރުސަތެއް އޮތް ނަމަ އެ ފުރުސަތުގެ ބޭނުން ގާޑިއޯލާ ހިފާނެ ކަމަށެވެ.

އާސެނަލް އިން 2008 ވަނަ އަހަރު ކެރިޔަރު ފެށި ވިލްޝެއާ ވަނީ އެޓީމުގައި މިހާތަނަށް ހޭދަކުރި ނުވަ ސީޒަނުގައި 159 މެޗު ކުޅެ 12 ލަނޑު ކާމިޔާބުކޮށްފައެވެ. މީގެ އިތުރުން އޭނާ ވަނީ އެ ކްލަބާއެކު އެފްއޭކަޕް ދެފަހަރު އަދި އެފްއޭ ކޮމިއުނިޓީ ޝިލްޑް ކާމިޔާބުކޮށްފައެވެ.

ބޮލްޓަންއަށް ލޯނު އެއްބަސްވުމެއްގެ ދަށުން 2009 ވަނަ އަހަރު އާސެނަލް އިން ބަދަލުވެ 14 މެޗު ކުޅެފައިވާ ވިލްޝެއާ މިވަގުތު ހުރީ ލޯން އެއްބަސްވުމެއްގެ ދަށުން އޭއެފްސީ ބޯންމައުތްގައެވެ. އެގޮތުން މިހާރު އޭނާ ވަނީ އެ ކްލަބަށް 20 އަށްވުރެ ގިނަ މެޗު ކުޅެދީފައެވެ.