އޯޕްރާއާ މެދު ޓްރަމްޕް: ވާދަކުރިޔަސް ބަލިކުރާނަން

އެމެރިކާގައި 2020 ވަނަ އަހަރު އޮންނަ ރިޔާސީ އިންތިޚާބުގައި މަޝްހޫރު ޓީވީ ޕްރެޒެންޓަރ އޯޕްރާ ވިންފްރީ ވާދަކޮށްފި ނަމަ ބަލި ކުރައްވާނެ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެއެވެ.

ޓްރަމްޕް މިހެން ވިދާޅުވީ 2020ގެ ރިޔާސީ އިންތިހާބުގައި އޯޕްރާ ވާދަކޮށްފާނެ ކަމުގެ އަޑުތައް ގަދަވެފައި ވަނިކޮށެވެ. ނަމަވެސް ޓްރަމްޕް ވިދާޅުވީ އިންތިހާބުގައި އޯޕްރާ ވާދަކުރާނެ ކަމަށް ނުބެލެވޭ ކަމަށެވެ. އަދި ކުރިޔަސް ބަލިކުރާނެ ކަމަށެވެ.

ގޯލްޑަން ގްލޯބް ހަފްލާގައި އޯޕްރާ ދިން ތަގުރީރާ އެކު އެމެރިކާގައި ދެން އޮންނަ ރިޔާސީ އިންތިޚާބެއްގައި ވާދަކޮށްފާނެ ކަމުގެ އަޑުތައް ވަނީ ފެތުރިގެން ގޮސްފައެވެ.

ބައެއް ޑެމޮކްރޭޓުން ގެންދަނީ، 2016 ވަނަ އަހަރު ހިލަރީ ކްލިންޓަންގެ މައްޗަށް ރައީސް ޓްރަމްޕް ހޯއްދެވި ކާމިޔާބާ ގުޅިގެން ލިބުނު ޝޮކަށް ފަހު ސެލެބްރިޓީ ކެނޑިޑޭޓަކު ނެރުމުގެ ވިސްނުމާ ދެކޮޅު ހަދަމުންނެވެ. ނަމަވެސް 63 އަހަރުގެ ބިލިއަނަރު ވަނީ އެ މަގާމަށް ޝައުގުވެރިވާކަމުގެ އިޝާރާތެއް ދީފައެވެ. ނަމަވެސް އޯޕްރާގެ އެންމެ ގާތް އެކުވެރިޔާ ބުނެފައި ވަނީ މިވަގުތު އަދި އެކަމަށް ނުކުންނަށް ނިންމާފައިވާ ކަން ނޭނގޭ ކަމަށެވެ.