ޔަމަނުގެ ހަނގުރާމަ: ސައުދީ ކޯލިޝަނުގެ ބޯޓެއް ވައްޓާލައިފި

ޔަމަނުގައި ހަނގުރާމަ ކުރަމުންދާ ސައުދީ އަރަބިއްޔާ އާއި ގުޅިފައިވާ ކޯލިޝަނުގެ ހަގުރާމަމަތީ މަތިންދާބޯޓެއް "ޓެކްނިކަލް" މައްސަލައެއް ދިމާވެ ވެއްޓިއްޖެ ކަމަށް އެ ކޯލިޝަނުގެ ބަޔާނެއްގައި ބުނެފިއެވެ.

ހަނގުރާމަވެރިން ހިންގާ މަސީރާ ޓީވީގައި ހޫޘީ ހަނގުރާމަވެރިން އާދީއްތަ ދުވަހު ބުނީ އިނގިރޭސިވިލާތުގައި އުފައްދާފައިވާ ޓޯނެޑޯ ފައިޓަރ ޖެޓް ވައްޓާލީ އެ ޖަމާއަތުގެ ހަނގުރާމަވެރިން ކަމަށެވެ.

ބޯޓް ވެއްޓިފައި ވަނީ ސައާދާ ޕްރޮވިންސަށެވެ. ބޯޓްގައި ތިބި ދެ ޕައިލެޓުން ސަލާމަތްކުރުމަށް ސައުދީ ކޯލިޝަނުން ޚާއްސަ އޮޕަރޭޝަނެއް ހިންގާފައިވާއިރު ޒަޚަމްނުވެ، ދެ ޕައިލެޓުން ވަނީ ސަލާމަތްވެފައެވެ.

މި ހާދިސާ ހިނގާފައި ވަނީ ޔަމަނުގެ ކުރީގެ ރައީސް އަލީ އަބްދުﷲ ސާލިހްގެ، ޖެނެރަލް ޕީޕަލްސް ކޮންގްރެސް (ޖީޕީސީ) އިން އެ ޕާޓީގެ އާ ލީޑަރު އާދީއްތަ ދުވަހު އިންތިޚާބު ކޮށްފައި ވަނިކޮށެވެ.

މި އަހަރުގެ ޑިސެމްބަރު މަހުގެ 4 ވަނަ ދުވަހު ސާލިހް އަވަހާރަކޮށްލާފައިވާއިރު އެ ޕާޓީގެ އާ ލީޑަރަކަށް އިންތިޚާބްކޮށްފައި ވަނީ ސާލިހްގެ އަރިސް ބޭފުޅެއް ކަމަށްވާ އެޕާޓީގެ ކުރީގެ ނާއިބު ލީޑަރު ސާދިގް އަމީން އަބުރާސްއެވެ.

ޖީޕީސީ އިން ނެރުނު ބަޔާނެއްގައި ބުނެފައި ވަނީ އުމުރުފުޅުން 65 އަހަރުގެ އަބުރާސް، ދެން އޮންނަ އެ ޕާޓީގެ އާއްމު ބައްދަލުވުމާއި ހަމައަށް އެ މަގާމުގައި ހުންނަވާނެ ކަމަށެވެ. ނަމަވެސް ހާލަތު ތަންނުދޭތީ އެ ބައްދަލުވުން ބާއްވާނެ ތާރީޚެއް ކަނޑައަޅަން ދަތިކަމަށް އެ ޕާޓީގެ ބަޔާނުގައި ބުނެފައިވެއެވެ.

އދ. އިން ބުނާ ގޮތުގައި ޔަމަނުގައި މިހާރު ހިނގަމުންދާ ހަނގުރާމައަކީ ދުނިޔެއަށް މިވަގުތު ދިމާވެފައިވާ އެންމެ ބޮޑު އިންސާނީ ކާރިސާއެވެ. މިހާތަނަށް 10،000 މީހުން މަރުވެފައިވާއިރު ބަނޑުހައި ހޫނުކަމާއި ބަލިތައް ވަނީ ފެތުރިފައެވެ.