ސީރިޔާގެ ހަނގުރާމަވެރިންގެ އަތްދަށުގައިވާ ސަރަހައްދުތަކުގައިވާ ހޮސްޕިޓަލްތަކަށް ވައިގެ ހަމަލާތައް ދީފައިވާ ކަމަށް އެހީދޭ ފަރާތްތަކުން ބުނެފިއެވެ.
އެގޮތުން ހަނގުރާމަވެރިންގެ އަތްދަށުގައިވާ 10 ހޮސްޕިޓަލަކަށް ފާއިތުވެދިޔަ 10 ދުވަސްތެރޭ ސީދާ ވައިގެ ހަމަލާ ދީފައިވާ ކަމަށް އެހީދޭ ފަރާތްތަކުން ބުނާއިރު ހަނގުރާމަވެރިންނާ ދެކޮޅަށް ހަނގުރާމަ ކުރަމުންދާ ސީރިޔާ ސަރުކާރާއި އަދި ސަރުކާރަށް ވާގިވެރިވާ ރަޝިއާ އިން ވަނީ ތަކުރާރުކޮށް އާންމުން އުޅޭ ތަންތަނަށް ހަމަލާ ނުދޭ ކަމަށް ބުނެ ތުހުމަތުތައް ދޮގުކޮށްފައެވެ.
ރިޕޯޓުތައް ބުނާގޮތުން ފާއިތުވެދިޔަ ދުވަސްތަކުގައި ހަމަލާ އަމާޒުވި ސިއްހީ ތަންތަނުގެ ތެރޭގައި އިދްލީބް ޕްރޮވިންސްގެ ހޮސްޕިޓަލެއް ހިމެނޭ ކަމަށާއި އެ ހޮސްޕިޓަލަކީ ހަތަރު ދުވަސްތެރޭ ތިން ފަހަރު ވައިގެ ހަމަލާ އަމާޒުވެފައިވާ ތަނެއް ކަމަށެވެ.
އަދި ބުދަ ދުވަހު ހޮސްޕިޓަލަކަށް ދިން ހަމަލާއެއްގައި ފަސް މީހަކު މަރުވެފައިވާ ކަމަށް ރިޕޯޓުތައް ބުނެއެވެ.
އަރަބި ރަބީއުގެ ކޮޅިގަނޑުގެ ތެރެއިން ސީރިޔާގެ ދާޚިލީ ހަނގުރާމަ ފެށިފައިވަނީ 2011 ވަނަ އަހަރުގެ މާޗް މަހުގެ 15 ވަނަ ދުވަހުއެވެ. އދ އިން މަނާކޮށްފައިވާ ކެމިކަލް ހަތިޔާރު ބޭނުންކޮށްގެން ދެވުނު އެތައް ހަމަލާތަކެއްގެ ޝިކާރައަކަށް ވެސް އެގައުމުގެ ރައްޔިތުން ވެގެން ގޮސްފައިވެއެވެ. ސީރިޔާގެ ހަނގުރާމައިގެ ތެރޭގައި ހަތިޔާރު ގެންގުޅެމުންދާ އެތައް ޕާޓީތަކެއް އޮތްއިރު ބައެއް ހަމަލާތައް ދެނީ ކޮންބައެއްކަން ނޭނގިވެސް އެތައް ހަމަލާތަކެއް ދެވިފައި އެބަހުއްޓެވެ.
