އީރާނުގައި އާދީއްތަ ދުވަހުގެ ރޭ ކުރެވުނު މުޒާހަރާތަކުގައި 10 މަރު

އީރާނުގެ ސަރުކާރާ ދެކޮޅަށް އެގައުމުގައި ކުރެވެމުންދާ މުޒާހަރާތަކުގައި، އާދިއްތަ ދުވަހުގެ ރޭ 10 މީހުން މަރުވެއްޖެ ކަމަށް ދައުލަތުގެ ޓީވީ އިން ބުނެފިއެވެ.

އީރާނުގެ ދައުލަތުގެ ޓީވީ އިން ބުނީ އީރާނުގެ އެކި ސިޓީތަކުގައި އާދީއްތަ ދުވަހުގެރޭ ކުރެވުނު މުޒާހަރާތަކުގައި ޖުމްލަ 10 މީހުން މަރުވެފައިވާ ކަމަށާއި، އަދި މިދިޔަ ބުރާސްފަތި ދުވަހު މުޒާހަރާތައް ފެށުނު ފަހުން މަދުވެގެން 12 މީހުން މަރުވެފައިވާ ކަމަށެވެ.

ހޯމަ ދުވަހު އީރާނުގެ ރައީސް ހަސަން ރޫހާނީ މުޒާހަރާތަކާ ބެހޭގޮތުން ވިދާޅުވީ، މުޒާހަރާތަކާއި ފާޑުކިޔުންތަކަކީ ލިބޭ ފަހި ފުރުސަތެއް ކަމަށާއި އެއީ ބިރެއް ނޫން ކަމަށެވެ. ރޫހާނީ އިތުރަށް ވިދާޅުވީ ގައުމަށް ދިމާވެފައިވާ އިގްތިސާދީ މައްސަލަތައް ހައްލުކުރަން ގައުމުގެ އެންމެން ގުޅިގެން މަސައްކަތް ކުރަން ޖެހޭ ކަމަށެވެ. އިރާނުގެ ރައީސް ރޫހާނީ ކުރިން ވިދާޅުވެފައިވަނީ ގައުމުގެ ރައްޔިތުންނަށް ސުލްހަވެރިކަމާއެކު މުޒާހަރާ ކުރުމުގެ މިނިވަންކަން އެބައޮތް ކަމަށެވެ.

އާދީއްތަ ދުވަހުގެ ރޭ ކުރެވުނު މުޒާހަރާތައް ހުއްޓުވުމަށް ފުލުހުންވަނީ ކަރުނަ ގޭހާއި އަދި ޕްރެޝަރގައި ފެން ޖަހާ އުޅަނދުތައްވެސް ބޭނުންކޮށްފައެވެ.

މުޒާހަރާތަކާ ގުޅިގެން އިރާނުގެ އެކި ސިޓީތަކުން 400 އެއްހާ މީހުން މިހާތަނަށް ހައްޔަރުކޮށްފައިވާ ކަމަށް ރިޕޯޓުތައް ބުނެއެވެ.

ބުރާސްފަތި ދުވަހު ކުރަން ފެށި މުޒާހަރާތައް ކުރަން ފަށާފައި ވަނީ ގައުމުގެ ކޮރަޕްޝަނުގެ ހާލަތާ ގުޅިގެންނާއި އަދި ދިރިއުޅުމުގެ ހާލަތު ދަށްވުމުގެ ސަބަބުންނެވެ.

ތަކެއްޗާއި ހިދުމަތުގެ އަގު ބޮޑުވުމުގެ މައްސަލައިގައި ފެށި މުޒާހަރާތަށް ފުޅާވެ، ސިޔާސީ މުޒާހަރާތަކަކަށް ބަދަލުވެފައިވާއިރު، މުޒާހަރާގައި އީރާނުގެ ރޫހީ ލީޑަރު އާޔަތުﷲ އަލީ ޚާމަނާއީގެ އިތުރުން ރައީސް ހަސަން ރޫހާނީގެ އިސްތިއުފާ އަށް ވެސް ދަނީ ގޮވަމުންނެވެ. މީގެ އިތުރުން ސިޔާސީ ކުށްވެރިން މިނިވަން ކުރުމަށާއި، ފުލުހުންގެ އަނިޔާވެރިކަން ނިމުމަކަށް ގެނައުމަށް މުޒާހަރާގެ ބައިވެރިން ދަނީ ގޮވާލަމުންނެވެ. އަދި މުޒާހަރާގެ ބައިވެރިން ބުނަމުންދަނީ އީރާނުގެ ސަރުކާރުން ކުރަން ނުޖެހޭ ޚަރަދުތައް ކުރަމުންދާ ކަމަށެވެ.