އުތުރުކޮރެއާއިން އާދީއްތަ ދުވަހު ޓެސްޓްކުރީ ބެލިސްޓިކް މިސައިލެއްކަން ކަށަވަރުކޮށްދީފި

އުތުރު ކޮރެއާއިން އާދީއްތަ ދުވަހު މެދުރާސްތާގެ އިތުރު ބެލިސްޓިކް މިސައިލެއް ޓެސްޓްކޮށްފިކަމަށް އެ ގައުމުން ކަށަވަރުކޮށްދީފިއެވެ.

އެ ގައުމުގެ ދައުލަތުގެ ނޫސްއިދާރާ ކޭސީއެންއޭއިން ބުނީ އެ ހަތިޔާރު މިހާރު ހުރީ އަސްކަރީ ބޭނުމަށް ބޭނުން ކޮށްލުމަށް ތައްޔާރުގައި ކަމަށެވެ.

ވައިޓް ހައުސްއިން ބުނީ މި ޓެސްޓަކީ އުތުރު ކޮރެއާއިން އެންމެ ފަހުން ފޮނުވާލި ތިން މިސައިލާ ބަލާއިރު ދަތުރުކުރާ ދުރުމިން ކުރު މިސައިލެއް ކަމަށެވެ.

އުތުރު ކޮރެއާއިން ވަނީ މިދިޔަ ހަފްތާގައިވެސް މިސައިލް ޓެސްޓެއް ކޮށްފައެވެ.

އެ ގައުމުން ބުނާ ގޮތުގައި އެ ދުވަހު ޓެސްޓްކޮށްފައިވަނީ ބޮޑެތި ނިއުކްލިއަރ ވޯހެޑް އުފުލުމުގެ ގާބިލްކަން ލިބިފައިވާ އާ ވައްތަރެއްގެ ރޮކެޓެއްކަމަށެވެ.

މިދިއަ ހޯމަ ދުވަހު އދގެ ސަލާމަތީ މަޖިލީހުން ވަނީ އެފަދަ އިތުރު ޓެސްޓްތައް ނުކުރުމަށް އަނެއްކާވެސް ގޮވާލާފައެވެ.

މީގެ އިތުރުން އެ ކައުންސިލުންވަނީ އުތުރު ކޮރާއިން ވަގުތުން ވަގުތައް އިޚުލާސްތެރިކަން ދައްކައި ހަރުދަނާ ފިޔަވަޅުތަކަކާއެކު ނިއުކްލިއަރ ޕްރޮގްރާމް ހުއްޓާލުމަށް ފިޔަވަޅުތައް އެޅުމަށް ގޮވާލާފައެވެ.

އެ ކައުންސިލުން ވަނީ އަންގާރަ ދުވަހު ސިއްރު ބައްދަލުވުމެއް ބޭއްވުމަށް ތާވަލުކޮށްފައެވެ. މި ބައްދަލުވުން ބޭއްވުމަށް އެދިފައިވަނީ އެމެރިކާއާއި ދެކުނުކޮރެއާއާއި ޖަޕާނުންނެވެ.

އާދީއްތަ ދުވަހު ފޮނުވާލި ޕުކޫސޮންގ-2 މިސައިލް ލޯންޗްކުރުން އުތުރުކޮރެއާގެ ލީޑަރު ކިމް ޖޮން އުން ބައްލަވާފައިވާކަމަށާއި މި މިސައިލް، ހަމަލާދިނުމަށް ތައްޔާރުކޮށްފައިވާ ހަތިޔާރުގެ ތެރޭ ހިމެނުމަށް ހުއްދަ ދެއްވާފައިވާކަމަށް ކޭސީއެންއޭއިން ރިޕޯޓްކޮށްފައިވެއެވެ.

ދެކުނުކޮރެއާގެ ފޮރިން މިނިސްޓްރީއިން ކުރިން ބުނީ މި ޓެސްޓަކީ ޒިންމާދާރުކަމެއް ނެތް ނުރައްކާތެރި ޓެސްޓެއްކަމަށެވެ. އެމެރިކާގެ ސެކްރެޓަރީ އޮފް ސްޓޭޓް ރެކްސް ޓިލާސަން ސިފަކުރެއްވިގޮތުގައި އެއީ "މާޔޫސްކުރުވައި" އަދި "އުނދަގޫވާ" ކަމެކެވެ.

އެންމެ ފަހުން ފޮނުވާލި މިސައިލް ދަތުރުކޮށްފައިވަނީ ޖަޕާނު ކަނޑާ ދިމާލަށް 560 ކިލޯ މީޓަރަށް ކަމަށް ކޮރެއާގެ ޖޮއިންޓް ޗީފް އޮފް ސްޓާފް ވިދާޅުވިއެވެ.

މިދިއަ ހަފްތާގައި ފޮނުވާލި މިސައިލް 700 ކިލޯ މީޓަރަށް ދަތުރުކޮށްފައިވެއެވެ.

ޖަޕާނީސް ނިއުސް އޭޖެންސީން ބުނީ އެ މިސައިލް ވެއްޓުމުގެ ފުރުސަތު ބޮޑީ ޖަޕާން ކަނޑުގެ ބޭރު ސަރަހައްދަށް ކަމަށެވެ.

ޖަޕާނުގެ ޗީފް ކެބިނެޓް ސެކްރެޓަރީ ޔޯޝީޑީ ސޫގާ ނޫސް ކޮންފަރެންސެއްގައި ވިދާޅުވީ އުތުރު ކޮރެއާއާ ދެކޮޅަށް އިހުތިޖާޖެއް ރޭވިފައިވާކަމަށެވެ.