ސްޕެއިންގެ ކެޓަލޯނިއާގެ ޤާނޫނު ހަދާ މަޖިލީހުގެ އިންތިޚާބު، އެސަރަހައްދުގެ މިނިވަންކަމަށް މަސައްކަތްކުރާ ޕާޓީތަކުން އަނެއްކާވެސް ކާމިޔާބުކޮށްފިއެވެ.

ކެޓަލޯނިއާގެ ސަރަހައްދީ ޤާނޫނު ހަދާ މަޖިލީހުގެ އިންތިޚާބު ބާއްވާފައި މިވަނީ އެސަރަހައްދުގެ މިނިވަންކަން އިއުލާންކުރި މައްސަލައިގައި ސްޕެއިންގެ މައި ސަރުކާރުން ކެޓަލޯނިއާގެ ސަރަހައްދީ ޤާނޫނު ހަދާ މަޖިލިސް އުވާލުމާ ގުޅިގެންނެވެ. ކެޓަލޯނިއާގެ ސަރަހައްދީ ޤާނޫނު ހަދާ މަޖިލީހުން ސްޕެއިންގެ މައި ސަރުކާރުން ވަކިވެ، އޮކްޓޯބަރު 27 ވަނަ ދުވަހު މިނިވަންކަން އިއުލާންކުރުމާ އެކު، ސްޕެއިންގެ މައި ސަރުކާރުން ވަނީ އެސަރަހައްދަށް ދީފައިވާ ސަރަހައްދީ މިނިވަންކަން ނިގުޅައިގަނެ، ޤާނޫނު ހަދާ މަޖިލިސް އުވާލައި، ޑިސެމްބަރު 21 ގައި އިންތިޚާބު ބާއްވަން އިއުލާންކޮށްފައެވެ.

ސަތޭކަ ތިރީސް ފަސް ގޮނޑި ހިމެނޭ ކެޓަލޯނިއާގެ ޤާނޫނު ހަދާ މަޖިލީހުގެ 70 އަށް ވުރެ ގިނަ ގޮނޑި ކާމިޔާބުކޮށްފައި ވަނީ ވަކިވެގަތުމަށް މަސައްކަތްކުރާ ޕާޓީތަކުންނެވެ. އެޕާޓީތަކަކީ ކެޓަލޯނިއާގެ ކުރީގެ ރައީސް ކާލްސް ޕުއިޖެމޮންޓްގެ ޓުގެދަރ ފޮރ ކެޓަލޯނިއާ ޕާޓީ، ޕުއިޖެމޮންޓްގެ ކުރީގެ ނައިބު އުރިއަލް ޖުންކެރާސްގެ ޕާޓީ ރިޕަބްލިކަން ލެފްޓް އޮފް ކެޓަލޯނިއާގެ އިތުރުން ޕޮޕިއުލަރ ޔުނިޓީ ޕާޓީއެވެ. މިޕާޓީތަކުން މެޖޯރިޓީ ނެގި ނަމަވެސް، ކެޓަލޯނިއާގެ އެންމެ ބޮޑު ސިޔާސީ ޕާޓީ ސިޓިޒަންސް ޕާޓީއަށް 37 ގޮނޑި ލިބިފައިވާތީ އެޕާޓީއަށް ވެސް ނެގޯޝިއޭޓިންގ ޕަވަރ ލިބެއެވެ. ސިޓިޒަންސް ޕާޓީއަކީ އެހެން ޕާޓީތަކާއި ޚިލާފަށް ކެޓަލޯނިއާ މިނިވަން ދައުލަތެއްގެ ގޮތުގައި އޮތުމުގެ ބަދަލުގައި ސަރަހައްދީ މިނިވަންކަން ލިބިގެންވާ ސްޕެއިންގެ ބައެއްގެ ގޮތުގައި އޮތުމަށް ތާޢީދުކުރާ ޕާޓީއެކެވެ.

މި އިންތިޚާބުގައި ސްޕެއިންގެ ބޮޑުވަޒީރު މަރިއާނޯ ރަޚޯއީގެ ޕޮޕިއުލަރ ޕާޓީއަށް ލިބިފައި ވަނީ އެންމެ ތިން ގޮނޑިއެވެ. އުވާލެވުނު މަޖިލީހުގައި އެޕާޓީގެ 11 މެމްބަރުން ތިއްބެވިއެވެ.

ކެޓަލޯނިއާގެ މިނިވަން ކަމަށް ކުރެވުނު މަސައްކަތާ ދެކޮޅަށް ސްޕެއިންގެ މައި ސަރުކާރުން އެޅި ފިޔަވަޅުތަކުގެ ސަބަބުން މައި ސަރުކާރާ މެދު އެސަރަހައްދުގެ ރައްޔިތުންގެ ހިތުގައި އޮތް ރުޅިވެރިކަން ވަނީ އިތުރުވެފައެވެ. އަދި އިންތިޚާބުގެ ނަތީޖާ ނިކުތް ގޮތުން މިނިވަން ކަމަށް ކުރެވޭ މަސައްކަތް އަނެއްކާ ވެސް ފަށާނެ ކަމަށް ބައެއް މުހައްލިލުން ލަފާކުރެއެވެ.

އިންތިޚާބުގެ ނަތީޖާއާ ބެހޭ ގޮތުން ސްޕެއިންގެ މައި ސަރުކާރުން އަދި ވާހަކަ ދައްކާފައެއް ނުވެއެވެ. އަދި ވިލާތުގެ އިއްތިޙާދުން ބުނެފައި ވަނީ ކެޓަލޯނިއާގެ މައްސަލައަކީ ސްޕެއިންގެ ދާޚިލީ މައްސަލައެއް ކަމަށާއި، އެމައްސަލައިގައި އީޔޫ އިން ބުނާނެ ވާހަކައެއް ނެތް ކަމަށެވެ.

ވަކިވެގަތުމަށް މަސައްކަތްކުރާ ޕާޓީތަކުން އިންތިޚާބު ކާމިޔާބުކުރި ނަމަވެސް، އިދިކޮޅު ލީޑަރު އަދި ކުރީގެ ރައީސް ކާލްސް ޕުއިޖެމޮންޓް ހުންނެވީ އަމިއްލައަށް އަރުވާލެވިގެން ބެލްޖިއަމްގައެވެ. އަދި އޭނާގެ ނައިބު އުރިއަލް ޖުންކެރާސް ހުންނެވީ ސްޕެއިންގެ މައި ސަރުކާރުން ޖަލުގައި ބަންދުކޮށްފައެވެ.

ކެޓަލޯނިއާއަކީ ސްޕެއިންގެ އާބާދީގެ 16 އިންސައްތަ ދިރިއުޅެމުންދާ ސަރަހައްދެވެ. މިސަރަހައްދަކީ ސްޕެއިންގެ އެހެން ސަރަހައްދުތަކާއި ތަފާތު ސަޤާފަތަކާއި އާދަކާދަތަކެއް ލިބިގެންވާ ސަރަހައްދެކެވެ.