އަނެއްކާވެސް މުސްލިމް ގައުމުތަކަށް ވިސާ ދިނުން ހުއްޓާލުމުގެ ގަރާރެއްގައި ސޮއިކުރެއްވުމަށް އެމެރިކާގެ ރައީސް ޑޮނަލްޑް ޓްރަމްޕް މަސައްކަތްކުރައްވަމުން ގެންދަވާ ކަމަށް މީޑިއާ ރިޕޯޓްތައް ބުނެފިއެވެ.
ވައިޓްހައުސްގެ ބައެއް އޮފިޝަލުންނާ ހަވާލާދީ، މީޑިޔާ ރިޕޯޓުތަކުގައި ބުނެފައި ވަނީ ޓްރަމްޕް މިފަހަރު ސޮއިކުރައްވާ ގަރާރަކީ ކުރިން ސޮއިކުރެއްވި ގަރާރަށް ވުރެ ތަފާތު ގަރާރެއް ކަމަށެވެ.
ސީރިޔާ، އިރާގް، އިރާން، ލީބިޔާ، ސޯމާލިޔާ، ސޫދާން އަދި ޔަމަނުން އެމެރިކާއަށް އަންނަ އެއްވެސް މީހަކަށް ވިސާ ނުދިނުމަށް ކުރިން ނިންމާފައިވާއިރު، އެކަމަށް ގިނަ ބައެއްގެ ފާޑުކިޔުން އަމާޒުވިއެވެ. މީގެއިތުރުން ކޯޓުން ވަނީ ޓްރަމްޕް ސޮއިކުރެއްވި ގަރާރު ތަންފީޒުކުރަން ނިންމި ނަމަވެސް އެކަން ބާތިލުކޮށްފައެވެ.
މެކްސިކޯއިން ގަވާއިދާއި ހިލާފަށް އެތެރެވާ މީހުން ހުއްޓުވުމަށް ފާރެއް ގާއިމްކުރުމަކީ ޓްރަމްޕްގެ ރިޔާސީ ވައުދެކެވެ. މިފާރަށް ހަރަދު ކުރާނީ މެކްސިކޯގެ ސަރުކާރުން ކަމަށްވެސް ޓްރަމްޕް ވަނީ އިއުލާންކުރައްވާފަ އެވެ. ޓްރަމްޕްގެ ސަޕޯޓަރުންގެ މެދުގައި މި ވައުދަކީ މަގުބޫލު ވައުދެއް ނަމަވެސް، މިކަމަށް ގިނަ ބައެއްގެ ފާޑު ކިޔުން އަމާޒުވެފައިވެ އެވެ.
ކެމްޕޭން ދުވަސްވަރު ޓްރަމްޕް ވަނީ މެކްސިކޯއަކީ ޑްރަގް ޑީލަރުންނާއި ރޭޕިސްޓުން އެމެރިކާއަށް އެކްސްޕޯޓު ކުރާ ގައުމެއްގެ ގޮތުގައި ސިފަ ކުރައްވާފަ އެވެ. އަދި، އެމެރިކާގައި ދިރިއުޅޭ މުސްލިމުން މޮނިޓަރ ކުރުމުގެ ގޮތުން ރެޖިސްޓްރީ އެއް ތައާރަފްކޮށް، މިހާރު އަމަލުކުރަމުންދާ އުސޫލުތައް އިތުރަށް ހަރުކަށި ކުރައްވާނޭ ކަމުގެ އިންޒާރު ދެއްވާފަ އެވެ.
