ފަލަސްތީނުގެ ގާނޫނު ހަދާ މަޖިލީހުގެ އަންހެން މެމްބަރަކު އިޒްރޭލުން ހައްޔަރުކޮށްފި
2007 އިން ފެށިގެން ފަލަސްތީނުގެ ގާނޫނު ހަދާ މަޖިލީހުގެ މަސައްކަތްތައް ވަނީ ހުއްޓިފައި
ސަމިރާ ހަލޭޤާ
ފަލަސްތީނުގެ ގާނޫނު ހަދާ މަޖިލީހުގެ އަންހެން މެމްބަރަކު އިޒްރޭލުގެ ސަލާމަތީ ބާރުތަކުން ހައްޔަރުކޮށްފިއެވެ.
ފަލަސްތީނުގެ ގާނޫނު ހަދާ މަޖިލީހުގެ އަންހެން މެމްބަރެއް ކަމަށްވާ ސަމީރާ ހަލޭގާ މިދިޔަ ބުރާސްފަތި ދުވަހު ހައްޔަރުކުރީ ހުޅަނގު އައްސޭރީގެ ހަބްރޫންގައި ހުންނަ އޭނާ ގޭގައި ހުންނަވަނިކޮށް ކަމަށް ފަލަސްތީނުގެ ސަލާމަތީ ފަރާތްތަކާއި އިޒްރޭލުގެ ސަލާމަތީ ފަރާތްތަކުން ބުނެއެވެ.
ސަމިރާ ހަލޭޤާ އަކީ ހަމާސްއަށް ނިސްބަތްވެވަޑައިގަންނަވާ މެމްބަރަކަށްވާއިރު އޭނާ ހައްޔަރުކުރިކަން އިޒްރޭލުގެ ޖާސޫސީ އިދާރާއިން ކަށަވަރު ކޮށްދިން ނަމަވެސް އިތުރު މައުލޫމާތެއް ދިނުމަށް ވަނީ އިންކާރުކޮށްފައެވެ. ފަލަސްތީނުގެ ގާނޫނު ހަދާ މަޖިލީހުގެ ހަރަކާތްތައް 2007 ވަނަ އަހަރުން ފެށިގެން ހުއްޓިފައިވާއިރު، 132 މެމްބަރުން ތިއްބަވާ ޕާލަމެންޓްގެ 9 މެމްބަރަކު އިޒްރޭލުން މިހާރު ހައްޔަރުކޮށްފައިވާ ކަމަށް ރިޕޯޓުތައް ބުނެއެވެ.
2007 އިން ފެށިގެން ފަލަސްތީނުގެ ގާނޫނު ހަދާ މަޖިލީހުގެ މަސައްކަތްތައް ހުއްޓިފައިވާއިރު އޭގެ ފަހުން އިންތިޚާބެއްވެސް ބާއްވާފައެއް ނުވެއެވެ.
