ފްރީ ޓްރޭޑް އެގްރިމެންޓް: ޗައިނާ މީހުންނަށް ވެސް ރާއްޖޭގައި ކަންމަތީ ފިހާރަ ހުޅުވޭނެ؟!

ރާއްޖެ އާއި ޗައިނާއާ ދެމެދު ސޮއިކުރުމަށް ތައްޔާރުވަމުންދާ މިނިވަން ވިޔަފާރީގެ އެއްބަސްވުމާ އެކު، ރާއްޖޭގައި ޗައިނާގެ ކުދި ވިޔަފާރިވެރިންނަށް ވެސް ވިޔަފާރިކުރުމުގެ ފުރުސަތު ހުޅުވިގެންދާނެ ކަމަށް ބުނެ ބައެއް ފަރާތްތަކުން ކަންބޮޑުވުން ފާޅުކޮށްފިއެވެ.

އަވަސް އަރުވާލައިގެން މަޖިލީހުން ރުހުން އޮތް ކަމަށް މި އެއްބަސްވުމަކީ ރާއްޖެ ކަހަލަ ކުޑަ ޤައުމަކަށް ބޮޑެތި ގެއްލުންތަކެއް ކުރިމަތިވާނެ އެއްބަސްވުމެއްކަން ފާހަގަކުރަމުން އިޤްތިޞާދީ ބޭފުޅުން ވިދާޅުވާ ގޮތުގައި މިއީ ޗައިނާއަށް ފައިދާ ބޮޑުވާނެހެން ތައްޔާރުކޮށްފައިވާ އެއްބަސްވުމެކެވެ. މި އެއްބަސްވުމުގެ ސަބަބުން ވޯރާ ވިޔަފާރިވެރިން ރާއްޖޭގެ އިޤްތިޞާދަށް އަތް ގަދަކުރިހެން، ޗައިނާގެ ވިޔަފާރިވެރިންނަށް ރާއްޖޭގެ ކުދި އަދި މެދު ފަންތީގެ ވިޔަފާރިތައް ހުޅުވާލެވިގެން ހިނގައިދާނެކަމުގެ ބިރު އެބައޮތް ކަމަށް އިޤްތިޞާދީ ބޭފުޅުން ވިދާޅުވެއެވެ. އަދި މި އެއްބަސްވުމުގެ ސަބަބުން ޗައިނާއަށް އާއްމު ވިޔަފާރިކުރުން ހުއްދަވެގެން ދިޔަ ނަމަވެސް، މިހާރު އަމަލުކުރަމުންދާ ޤަވާޢިދުތަކުގެ ސަބަބުން އެހެން ޤައުމަކަށް މިފުރުސަތު ނޯންނާނެއެވެ. ފްރީ ޓްރޭޑް އެއްބަސްވުމުގެ ސަބަބުން ޗައިނާގެ ގިނަ ބާވަތްތަކެއް ޑިއުޓީއަކާއި ނުލައި ރާއްޖެއަށް އެތެރެ ކުރެވޭތީ ޗައިނާގެ މުދާތައް ރާއްޖޭގެ ބާޒާރުގައި ގިނަވާނެ ކަމަށް ބުނެ، ބައެއް ވިޔަފާރިވެރިން ވެސް ގެންދަނީ ފާޑުކިޔަމުންނެވެ. މިހާރު ވެސް ޗައިނާގެ "ފޭކް" މުދާތައް ރާއްޖޭގެ ބާޒާރުގައި ވަރަށް ގިނައެވެ.

ރާއްޖެ އާއި ޗައިނާއާ ދެމެދު ސޮއިކުރެވޭ މިނިވަން ވިޔަފާރީގެ އެއްބަސްވުމުގެ 110 ވަނަ މާއްދާގައި ބުނާ ގޮތުން މި އެއްބަސްވުމުގެ ބައިވެރިން، އެޤައުމެއްގައި އަނެއް ޤައުމެއްގެ ކޮންމެ ކަހަލަ އިންވެސްޓްމަންޓެއް ކުރި ނަމަވެސް، އެކަމަކަށް މަގުފަހިކޮށްދޭން ޖެހެއެވެ. އިމެއް ނެތް ގޮތުގައި އިންވެސްޓްކުރުމަށް ހުޅުވާލުމަކީ ކަންބޮޑުވާ ކަމެއް ކަމަށް އިޤްތިޞާދީ ބޭފުޅުން ވިދާޅުވެއެވެ.

ޗައިނާ-މޯލްޑިވްސް ފްރީ ޓްރޭޑް އެގްރިމެންޓާ ގުޅޭ ގޮތުން ދެޤައުމުގެ މެދުގައި މީގެ ކުރިން ބައްދަލުވުންތަކެއް ބާއްވާފައި ވެއެވެ. އެހެން ނަމަވެސް ކުއްލިއަކަށް މަޖިލީހަށް ވައްދައިގެން މަދު ވަގުތުކޮޅެއްގެ ތެރޭގައި މި އެއްބަސްވުމަށް ރުހުން ހޯދި އިރު، އެއްބަސްވުން ކިޔާލާނެ ވަގުތެއް މަޖިލިސް މެމްބަރުންނަށް ލިބިވަޑައެއް ނުގަންނަވައެވެ. އަދި އިދިކޮޅު ބައެއް މެމްބަރުންނަށް ޖަލްސާއަށް ނުކިޔާ ކަމަށް ބައެއް މެމްބަރުން ވިދާޅުވާއިރު، ޖަލްސާއެއް އޮންނަކަން ބައެއް މެންބަރުންނަށް އަންގާފައި ވަނީ ޖަލްސާ ފެށެން މަދު ވަގުތުކޮޅަކަށް ވެފައި ވަނިކޮށް ކަމަށް އެމެމްބަރުން ވިދާޅުވެއެވެ.

ޗައިނާއާ އެކު 11 ޤައުމަކުން މިނިވަން ވިޔަފާރީގެ އެއްބަސްވުންތައް ހަދާފައިވާއިރު، މި 11 ޤައުމަކީ ވެސް ސިނާޢީ މަސައްކަތްތައް ކުރާ، ދުނިޔޭގެ ނިސްބަތުން ފާހަގަކޮށްލެވޭ ބޮޑެތި އިޤްތިޞާދުތަކެވެ. އެހެންކަމުން އެފަދަ އެއްބަސްވުންތަކުގެ ސަބަބުން އެ ގައުމުތަކަށް ބޮޑެތި ފައިދާތަކެއް ލިބިގެންދިޔަ ނަމަވެސް ރާއްޖެއާ އެކު ހަދާ އެއްބަސްވުމުން ރާއްޖެ އަށް ލިބޭ ގެއްލުން ބޮޑުވެފައި ޗައިނާ އަށް ލިބޭ ފައިދާތައް ބޮޑުވާނެ ކަމަށް އިގްތިސާދީ މާހިރުން ގެންދަވަނީ ވިދާޅުވަމުންނެވެ. އަދި މީގެ ސަބަބުން ދިވެހި ކުދި އަދި މެދު ފަންތީގެ ވިޔަފާރިވެރިންނަށް ގެއްލުންތަކާ ކުރިމަތިލާން ޖެހިދާނެކަމުގެ އިންޒާރު އެ ފަރާތްތަކުން ދީފައި ވެއެވެ.