ޗައިނާގެ ކުންމިން ފެއާގައި 86 ގައުމަކުން ބައިވެރިވޭ: އިކޮނަމިކް މިނިސްޓްރީ

ޗައިނާ ކުންމިންގ އިމްޕޯޓް އެންޑް އެކްސްޕޯޓް ފެއަރ ނުވަތަ ކުންމިންގ ފެއަރ މިއަދު ފަށާފައިވާއިރު މި ފެއާގައި މިފަހަރު 86 ގައުމަކުން ބައިވެރިވާ ކަމަށް އިކޮނަމިކް މިނިސްޓްރީން ބުނެފިއެވެ.

ކުންމިންގ ފެއަރއާ ބެހޭ ގޮތުން އިކޮނޮމިކް މިނިސްޓަރގެ ނާއިބު އާދަމް ތައުފީޤް ވިދާޅުވީ، މިފަހަރުގެ ކުންމިންގ ފެއަރގައި އިކޮނޮމިކް މިނިސްޓްރީ އާއި ސަރުކާރުގެ ކަމާބެހޭ މުއައްސަސާތަކުގެ އިތުރުން ހަތަރު ކުންފުންޏަކުން ބައިވެރިވާ ކަމަށެވެ.

ތައުފީގް ވިދާޅުވި ގޮތުގައި މިފަހަރުގެ ކުންމިން ފެއާގައި 4,000 ކުންފުންޏަކުން 8,000 ބޫތު މިފެއާގައި ވަނީ ބަހައްޓާފައެވެ.

ތައުފީގް ވިދާޅުވި ގޮތުގައި މި ފެއާގައި ބައިވެރިވާ 41 ޕަސެންޓް ކުންފުންޏަކީ ޗައިނާއިން ބޭރުގެ ކުންފުނިތަކެވެ. އެގޮތުން މި ފެއާގައި ސައުތު އޭޝިއާގެ އަށް ގައުމަކުން ބައިވެރިވާއިރު ސައުތު އީސްޓް އޭޝިއާގެ 11 ގައުމަކުން ބައިވެރިވެއެވެ. އަދި ޗައިނާގެ 20 ޕްރޮވިންސްއަކުން މިފަހަރުގެ ކުންމިން ފެއާގައި ބައިވެރިވާ ކަމަށް ތައުފީގް ވިދާޅުވިއެވެ.

ކުންމިންގ ފެއާގައި ދިވެހިރާއްޖޭގެ ޕެވިލިއަން ފަރުމާކޮށްފައި ވަނީ ދިވެހިރާއްޖޭގެ ޓޫރިޒަމް ސިނާއަތާއި ދިވެހިންގެ މަސައްކަތްތެރިކަން ފެނިގެންދާ ގޮތަށެވެ.

މިފަހަރުގެ ކުންމިން ފެއަރގައި ވެސް ދިވެހިރާއްޖޭގެ އުފެއްދުންތައް އިޝްތިހާރުކޮށް، ދުނިޔޭ ބާޒާރަށް ދިވެހި އުފެއްދުންތައް ނެރުމަށްޓަކައި ތަފާތު އެކިއެކި މަސައްކަތްތައް ކުރުމަށް އިކޮނޮމިކް މިނިސްޓްރީން ވަނީ ނިންމަވާފައެވެ.

ދިވެހިރާއްޖެއިން މިދިޔަ އަހަރު ވެސް ކުންމިންގ ފެއާގައި ބައިވެރިވެފައި ވެއެވެ. މިދިޔަ އަހަރު ދިވެހިރާއްޖެއިން ކުންމިންގ ފެއަރގައި ބައިވެރިވެފައި ވަނި، ކަންޓްރީ އޮފް އޮނަރގެ ގޮތުގައެވެ. ޗައިނާގެ ޔުނާންސް ޕްރޮވިންސްގެ ކުންމިންގ ޑިއާންޗީ ކޮންވެންޝަން ސެންޓަރުގައި ކުރިއަށްދާ ކުންމިންގ ފެއަރ ކުރިއަށްދާނީ، މި ހިނގާ ޖޫންމަހުގެ 18 ވަނަ ދުވަހުގެ ނިޔަލަށެވެ.