އާސެނަލްގައި ސަންޗޭޒްއާއި އޮޒިލް މަޑުކުރާނެ: ވެންގާ

އާސެނަލްއަށް ކުޅެމުން އަންނަ ޗިލީގެ ފޯވާޑް އެލެކްސިސް ސަންޗޭޒް އަދި ޖަރުމަނުގެ މިޑްފީލްޑަރު މެސުޓް އޮޒިލް އެ ޓީމުގައި މަޑުކުރާނެ ކަމަށް އެ ޓީމުގެ ކޯޗު އާސެން ވެންގާ ބުނެފިއެވެ.

އާސެނަލްއަށް ކުޅެމުން އަންނަ މި ދެ ކުޅުންތެރިންގެ ކޮންޓްރެކްޓު ވެސް މި އަންނަ ޖެނުއަރީ މަހަށް ހަމަވާނެއެވެ. ކޮންޓްރެކްޓުގެ މުއްދަތު ހަމަވުމާއެކު އެހެން ޓީމަކަށް ބަދަލުވުމުގެ ފުރުސަތު އެ ދެ ކުޅުންތެރިންނަށް ވެސް ހުޅުވިގެންދާނެއެވެ. އެގޮތުން ހިލޭ ޓްރާންސްފާއެއްގެ ދަށުން އެ ދެ ކުޅުންތެރިންނަަށް ވެސް އެހެން ޓީމަކަށް ބަދަލުވުމުގެ މަޝްވަރާތައް ކުރިޔަށް ގެންދިޔުމުގެ ފުުރުސަތު ލިބިގެންދާނެއެވެ.

އިނގިރޭސިވިލާތުގެ އެންމެ ބޮޑު ނޫސް ކަމަށްވާ 'ބީބީސީ' އާއި ވާހަކަ ދައްކަމުން ވެންގާ ބުނެފައިވަނީ ޖެނުއަރީއަށް ފަހުވެސް އެ ދެ ކުޅުންތެރިން އެ ޓީމުގައި މަޑުކުރާނެ ކަމަށާއި އެހެން ޓީމަކުން އެ ދެ ކުޅުންތެރިން ފެނުމަކީ ވަރަށް ނާދިރުކަމެއް ކަމަށެވެ. ހަމައެހެންމެ އެ ދެ ކުޅުންތެރިން ވެސް ޓީމުގައި މަޑުކުރާނަމަ އެ ދެ ކުޅުންތެރިންގެ ފަރާތުން ވެސް އެންމެ ރަނގަޅު ކުޅުން ފެންނާނެ ކަމުގެ ފުރިހަމަ ޔަގީންކަން އެބައޮތް ކަމަށްވެސް ވެންގާ ބުނެފައިވެއެވެ.

މި ސީޒަން ނިންމާލުމަށް ފަހު އެ ދެ ކުޅުންތެރިން އާސެނަލްގައި މަޑުކުރާނެތޯ ސުވާލު ކުރުމުން ވެންގާ ބުނީ އެއީ އޭނާގެ ބާރުގެ ދަށުގައި އޮތް ކަމެއް ނޫން ކަމަށާއި އެކަން ނިންމާނީ އެ ދެ ކުޅުންތެރިން ކަމަށެވެ. ސަންޗޭޒްއާއި އޮޒިލްގެ ކޮންޓްރެކްޓު އައު ކުރުމާއި ގުޅޭގޮތުން ވެންގާ ވަނީ ވާހަކަ ދައްކަން ދެކޮޅު ހަދާފައެވެ.

މި އިންޓަވިއުގައި ވެންގާ ވަނީ އެ ޓީމަށް ކުޅެމުން އަންނަ އިނގިރޭސިވިލާތުގެ މިޑްފީލްޑަރު ޖެކް ވިލްޝިއާ އެ ޓީމުގައި މަޑުކުރުމަށް އެދިފައެވެ. އެގޮތުން ވެންގާ ބުނީ ވިލްޝިއާއަކީ ވަރަށް މޮޅު ކުޅުންތެރިއެއް ކަމަށާއި އޭނާ އާސެނަލްގައި މަޑުކޮށްފިނަމަ މުސްތަގުބަލުގައި އޭގެ ފައިދާ ފެނިގެންދާނެ ކަމަށެވެ.

ވެންގާ މިބީދައިން ވާހަކަ ދައްކާފައިވާއިރު މި ސީޒަނުގެ ޕްރިމިއާ ލީގުގައި ވިލްޝިއާ އެއްވެސް މެޗެއް ކުޅެފައެއް ނުވެއެވެ. އުމުރުން 25 އަހަރުގެ ވިލްޝިއާ އާސެނަލްއަށް ކުޅެން ފެށީ 2008 ވަނަ އަހަރު ކަމަށްވާއިރު އޭގެ ފަހުން އޭނާއަށް ކުރިމަތިވި އަނިޔާގެ މައްސަލަތަކުގެ ސަބަބުން ފުރަތަމަ 11 އިން ޖާގަ ލިބިފައެއް ނުވެއެވެ.

ސަންޗޭޒްއާއި އޮޒިލް އާސެނަލްގައި މަޑުކުރާނެ ކަމުގެ އިޝާރާތެއް ވެންގާ ދީފައިވާއިރު މި ދެ ކުޅުންތެރިންނަކީ އާސެނަލްގައި މުހިންމު ދައުރެއް އަދާކުރަމުން އަންނަ ދެ ކުޅުންތެރިންނެވެ.

ބާސެލޯނާއިން 2014 ވަނަ އަހަރު އާސެނަލްއަށް ބަދަލުވި ސަންޗޭޒް ވަނީ މިހާތަނަށް އެ ޓީމަށް ކުޅުނު 113 މެޗުގައި 56 ލަނޑު ޖަހައިދީފައެވެ. ހަމައެހެންމެ 2013 ވަނަ އަހަރު ރެއާލް މެޑްރިޑް ދޫކޮށް އާސެނަލްއަށް ބަދަލުވި ފަހުން އޮޒިލްވަނީ އެ ޓީމަށް ކުޅުނު 168 މެޗުގައި 33 ލަނޑު ޖަހައިދީފައެވެ. މި ދެ ކުޅުންތެރިން ވެސް ވަނީ ވެންގާގެ އިރުޝާދުގެ ދަށުން އާސެނަލްއިން ދެ އެފްއޭ ކަޕް އަދި އެފްއޭ ކޮމިއުނިޓީ ޝީލްޑް ކާމިޔާބުކުރިއިރު އެ ޓީމުތަކުގައި މުހިންމު ދައުރެއް އަދާކޮށްފައެވެ.