މި ސީޒަނަށްފަހުވެސް ރިޓަޔާކުރަން ނުވިސްނާ ކަމަށް އާސެނަލްގެ ކޯޗު އާސެން ވެންގާ ބުނެފި އެވެ.
ނޫސްވެރިންނަށް މައުލޫމާތު ދެމުން ވެންގާ ބުނީ އެއްބަސްވުމާމެދު އެއްޗެއް ބުނަން ނޭނގޭ ކަމަށާއި، އެހެން ނަމަވެސް އަންނަ ސީޒަނުގައި އާސެނަލް ނުވަތަ އެހެން ކްލަބަކުން ފެނިގެންދާނެ ކަމުގެ ޔަގީންކަން ދޭކަމަށެވެ.
ވެންގާ ބުނީ ކުރިމަގަށް ގޮތެއް ނިންމަން އެނގޭނީ ކްލަބަށް ކަމަށާއި، އޭނާ އުންމީދު ކުރަނީ އެންމެ ފައިދާހުރި ގޮތް ނިންމާނެ ކަމަށް ކަމަށެވެ. އެގޮތުން ވެންގާ ބުނީ ވޭތުވެދިޔަ 20 އަހަރު އާސެނަލްއާއެކު ހޭދަކުރީ ވަރަށް އިތުބާރާ އެކު ކަމަށެވެ.
މީގެއިތުރުން ވެންގާ ބުނީ އެކި ކްލަބްތަކުން އޭނާ އަށް ހުށަހެޅުންތައް ލިބިފައިވާ ކަމަށާއި، އެހެންނަމަވެސް އަބަދުވެސް ވިސްނީ އާސެނަލްއާ މެދު ކަމަށެވެ. އޭނާ ބުނީ އާސެނަލް ނޫން އެހެން ކްލަބަކާ މެދު އަދިވެސް ނުވިސްނާ ކަމަށެވެ.
ކުރިމަގާ ބެހޭގޮތުން ތަފްސީލްކޮށް ވާހަކަދައްކަން ބޭނުންނުވާ ކަން ފާހަގަކުރަމުން ވެންގާ ބުނީ އޭނާގެ ހުރިހާ ވިސްނުމެއް ހުރީ އަދިވެސް ކުރިމަގަށްވުރެ އާސެނަލްއަށް ކާމިޔާބީ ހޯދައިދިނުމަށް ކަމަށެވެ.
އާސެނަލްގެ ކޯޗުކަމާ 1996 ވަނަ އަހަރު ހަވާލުވި މިހާރު އުމުރުން 67 އަހަރުގެ ވެންގާ ވަނީ އާސެނަލް އެއް ފެންވަރެއްގައި ހިފެހެއްޓުމަށް ގިނަ މަސައްކަތްތަކެއް ކޮށްފައެވެ.
އާސެނަލްގައި އަށް ވެންގާ އިރުޝާދުދިން 20 އަހަރު ތެރޭގައި އެޓީމު ވަނީ އެ ކްލަބަށް ތިން ޕްރިމިއާ ލީގު، ހަ އެފްއޭކަޕް އަދި ހަ އެފްއޭ ކޮމިއުނިޓީ ޝިލްޑް ކާމިޔާބުކޮށްފައެވެ.
މީގެއިތުރުންވެސް ވެންގާ ވަނީ އެކިގޮތްގޮތަށް ގިނަ ކާމިޔާބީތައް ހޯދާފައެވެ. އިނގިރޭސި ގައުމީ ފުޓުބޯޅަ ޓީމަށްވެސް އިރުޝާދުދޭން ފުރުސަތު ލިބުނު ވެންގާ ވަނީ އިންޑިވިޖުއަލް ގިނަ އެވޯޑުތައްވެސް ހޯދާފައެވެ.
