އާސެނަލް އަށް ކުޅެމުން އަންނަ ޖަރުމަންގެ ޑިފެންޑަރު މުސްތާފީ ދަނީ ފަރިތަކުރުންތަކުގައި ބައިވެރިވަމުން ކަމަށާއި، ސްކޮޑާ ވަރަށް އަވަހަށް ގުޅޭނެ ކަމަށް އާސެނަލްގެ ކޯޗު އާސެން ވެންގާ ބުނެފި އެވެ.
ނޫސްވެރިންނަށް މައުލޫމާތު ދެމުން ވެންގާ ބުނީ މުސްތާފީ އަށް ލިބުނު އަނިޔާއިން އޭނާ ރިކަވާވެފައިވާ ކަމަށާއި، މިހާރު ނޯމަލް ފަރިތަކުރުންތަކުގައި ބައިވެރިވަމުން އަންނަ ކަމަށެވެ. އެގޮތުން ވަރަށް އަވަހަށް އޭނާ ސްކޮޑާ ގުޅޭނެކަމަށްވެސް ވެންގާ ވަނީ ބުނެފައެވެ.
މުސްތާފީ އަށް އަނިޔާވީ މި މަހުގެ 10 ވަނަ ދުވަހު ޕްރިމިއާ ލީގުގައި ސްޓޯކް ސިޓީއާ ދެކޮޅަށް އާސެނަލް ކުޅުނު މެޗުންނެވެ. އެ މެޗުގައި މުސްތާފީގެ ފައިގެ ފަލަމަސްގަނޑަށް ވަނީ އަނިޔާވެފަ އެވެ.
އެވަޓަން އިން 2009 ވަނަ އަހަރު ކެރިޔަރު ފެށި އުމުރުން 24 އަހަރުގެ މުސްތާފީ ވަނީ ސަމްޕްޑޯރިއާ އަދި ވެލެންސިއާ އަށްވެސް ކުޅެފަ އެވެ. އެގޮތުން އޭނާ އާސެނަލް އަށް ބަދަލުވީ މި އަހަރު ވެލެންސިއާ އިންނެވެ.
ޖަރުމަނާއެކު ވޯލްޑްކަޕްވެސް ކާމިޔާބުކޮށްފައިވާ މުސްތާފީ ވަނީ އާސެނަލްއާއެކު އޭނާ ހޭދަކުރި މަދު ދުވަސްކޮޅު އެޓީމަށް 15 މެޗު ކުޅެފައެވެ. މީގެއިތުރުން އޭނާ އަންނަނީ އެޓީމުގެ ޑިފެންސްލައިންގައި މުހިންމު ދައުރެއް އަދާކުރަމުންނެވެ.
