އެމެރިކާގެ ނިއުޔޯކްގެ ވިންތްރޮޕް ޔުނިވާސިޓީ ހޮސްޕިޓަލުގައި ހަތަރު އަންހެނުން ހަ ގަޑިއިރުގެ ތެރޭގައި އަށް ކުދިން ވިހައިފިއެވެ.

ހަތަރު އަންހެނުންނަށް ލިބިފައި ވަނީ ކޮންމެ މީހަކަށް އެއްމާބަޑު ދެކުދިންނެވެ.

މިއީ މިހާތަނަށް އެ ހޮސްޕިޓަލަށް މިހާ ގިނަ އަދަދެއްގެ އެއްމާބަނޑު ކުދިން އުފަންވި ފަހަރު ކަމަށް ވިންތްރޮޕް ހޮސްޕިޓަލުން ބުނެއެވެ.

ވިންތްރޮފް ހޮސްޕިޓަލްގެ ޗީފް އޮފް މެޓާނަލް ފެޓަލް މެޑިސިން ޑރ. މާޓިން ބުނީ މީގެ ކުރިން ވެސް އެ ހޮސްޕިޓަލަށް އަހަރެއްގެ ތެރޭގައި ގާތްގަނޑަކަށް 125 އެއްމާބަނޑު ކުދިން ވިހާފައިވާ  ކަމަށެވެ.

މާޓިން ބުނީ ބުދަދުވަހުގެ އެ ހަގަޑިއިރަކީ އެ ހޮސްޕިޓަލުގެ ނަރުހުންނާއި ޑޮކްޓަރުން ވަރަށް ބިޒީވި ވަގުތެއް ކަމަށެވެ. އަދި އެއީ މަދުން ނޫނީ ނުވާ ކަމަކަށް ވުމުން އެ ހޮސްޕިޓަލުގެ ސްޓާފުން ތިބީ ވަރަށް އުފަލުން ކަމަށް މާޓިން ބުންޏެވެ.

މި އަށް ކުދިން ވިހާފައި ވަނީ ބުދަދުވަހުގައެވެ. އެކުދިންގެ ހާލު ރަނގަޅު ކަމަށް ވެސް މާޓިން ވަނީ ބުނެފައެވެ. އޭގެ ތެރެއިން ހަތަރު ކުދިން ހޮސްޕިޓަލުން ދޫކޮށްލާފައިވާ ކަމަށާއި އަނެއް ހަަތަރު ކުދިން ވެސް ވަރަށް އަވަހަށް ދޫކޮށްލާނެ ކަމަށް މާޓިން ބުންޏެވެ.

މާޓިން ބުނީ ހަ ގަޑި އިރުގެ ތެރޭގައި އަށް ކުދިން ވިހެއުން އެއީ ވިންތްރޮޕް ހޮސްޕިޓަލުގެ އަދި ދުނިޔޭގެ ވެސް ރެކޯޑެއް ކަމަށެވެ. އެހެން ކަމުން އޭނާ ވެސް އެކަމާ އުފަލުން ހުރި ކަމަށް މާޓިން ބުންޏެވެ.