ހަތަރު ފަޔާއި އިތުރު ގުނަވަންތަކާ އެކު އުފަންވި ކުއްޖާ އޮޕަރޭޝަން ކޮށްފި
އޮޕަރޭޝަނަށް 3 ގަޑީއިރު ހޭދަވި
އުފަންވި އިރު ހަތަރު ފަޔާއި އިތުރު ގުނަވަންތައް ހުރި ފިރިހެން ކުއްޖެއް
އުފަންވި އިރު ހަތަރު ފަޔާއި އިތުރު ގުނަވަންތައް ހުރި އިންޑިއާގެ ފިރިހެން ކުއްޖާ އޮޕަރޭޝަން ކޮށްފިއެވެ.
ކުއްޖާ އުފަންވުމުން އޭނާގެ މަންމަ ބުނެފައިވަނީ އެއީ "ކަލާނގެ ދެއްވި ހަދިޔާ" އެއް ކަމުގައެވެ.
ޑޮކްޓަރުން ބުނެފައިވަނި އޮޕަރޭޝަނަށް ފަހު ކުއްޖާގެ ހާލު ރަނގަޅު ވަމުން އަންނަ ކަމަށެވެ.
މިކުއްޖާ އުފަންވީ މި އަހަރުގެ ޖަނަވަރީ މަހުގެ 21 ވަނަ ދުވަހު ދެކުނު އިންޑިއާގެ ކަރުނާޓަކާގެ ރައިޗޫރުގެ ހެލްތް ސެންޓަރެއްގައެވެ.
ޑޮކްޓަރުން ބުނާ ގޮތުގައި މިއީ ކުއްޖާގެ މަންމަގެ ބަނޑުގައި އެއް މާބަނޑު ދެބެން އުފެދުމުގެ ތެރޭގައި ކުއްޖާއަށް ކުރިމަތިވި ގޮތެއް ކަމަށް ބެލޭ ކަމަށެވެ.
ތިން ގަޑީއިރުގެ މި އޮޕަރޭޝަން ކުރީ ބެންގަލޫރުގެ ނަރަޔާނާ ހެލްތް ސިޓީ ހޮސްޕިޓަލުގެ ޑޮކްޓަރުން ހިލޭ ސާބަހަށެވެ.
އޮޕަރޭޝަން ކާމިޔާބު ވުމުން މި ކުއްޖާގެ މައިން ބަފައިން ތިބީ ވަރަށް އުފަލުން ކަމަށާއި އަދި ޑޮކްޓަރުންނަށް ތައުރީފް ކުރި ކަމަށް ޚަބަރުތައް ބުނެއެވެ.
މި ދެމަފިރިންނަށް މިއީ ލިބުނު ދެވަނަ ދަރިފުޅެވެ. ފުރަތަމަ ކުއްޖާ އުފަންވީ އިރު މިފަދަ އެއްވެސް އައިބެއް ނެތް ކަމަށާއި އޭނާގެ އުމުރުން މިހާރު ދެ އަހަރު ފުރިއްޖެ ކަމަށްވެސް، ދަނޑުވެރިކަން ކުރާ، ކުއްޖާގެ ބައްޕަ ޗެންނާބަސާވާ ދިން އިންޓަވިއު އެއްގައި ބުނެފައިވެއެވެ.
