ކެޓަލޯނިއާގެ ލީޑަރު ސްޕެއިން ދޫކުރައްވާ ބެލްޖިއަމަށް ވަޑައިގެންފި
ކާލޮސް ޕުއިޖްޑެމޮންޓް މައްޗަށް، ސްޕެއިންގެ ސަރުކާރުން ބުނެފައި ވަނީ ދައުލަތާ ދެކޮޅަށް ނިކުތުމަށް ހިތްވަރު ދިނުމާ ގުޅިގެން ދައުވާ ކުރާނެ ކަަމަށް
ކެޓަލޯނިއާގެ ކުރީގެލީޑަރު ކާލެސް ޕުއިޖްޑެމޮންޓް
ސްޕެއިންގެ މައި ސަރުކާރުން މަގާމުން ދުރުކޮށްފައިވާ ކެޓަލޯނިއާގެ ކުރީގެ ލީޑަރު ކާލެސް ޕުއިޖްޑެމޮންޓް ސްޕެއިން ދޫކޮށް ބެލްޖިއަމްގެ ބްރެސެލްސް އަށް ވަޑައިގެންފައިވާ ކަމަށް ސްޕެއިންގެ ސަރުކާރުގެ އޮފިޝަލުން ހާމަކޮށްފިއެވެ.
ސްޕެއިންގެ ބާރުގެ ދަށުން ކެޓަލޯނިއާ މިނިވަންކަން އިއުލާން ކުރުމާ ގުޅިގެން، ކެޓަލޯނިއާގެ ލީޑަރު ކަމުގައި އެ ސަރަހައްދުގެ މިނިވަންކަން އިއުލާން ކުރި އިރު ހުންނެވި ވެރިޔާ، ކާލޮސް ޕުއިޖްޑެމޮންޓް މައްޗަށް ސްޕެއިންގެ ސަރުކާރުން ބުނެފައި ވަނީ ދައުލަތާ ދެކޮޅަށް ނިކުތުމަށް ހިތްވަރު ދިނުމާ ގުޅިގެން ދައުވާ ކުރާނެ ކަަމަށެވެ.
ޕުއިޖްޑެމޮންޓް ބެލްޖިއަމަށް ވަޑައިގަންނަވާފައިވާއިރު، ބެލްޖިއަމްގެ އެސައިލަމް އެންޑް މައިގްރޭޝަން އެފެއާޒް މިނިސްޓަރު ތިއޯ ފްރެންކެން ވިދާޅުވެފައި ވަނީ ޕުއިޖްޑެމޮންޓް އަށް އެގައުމުގެ ހިމާޔަތަށް އެެދުމުގެ ފުރުސަތު އެބައޮތް ކަމަށެވެ.
ބެލްޖިއަމަށް ވަޑައިގެންނެވި ކެޓަލޯނިއާގެ ލީޑަރާ އެކު ކެޓަލޯނިއާ ސަރުކާރުގައި އިސްކޮށް އުޅުއްވި ފަރާތްތައް ހިމެނޭ ކަމަށް ވެސް ރިޕޯޓުތައް ބުނެއެވެ.
ހޮނިިހިރު ދުވަހު އިވިގެން ދިޔައީ ބާރުގަދަ ސްޕެއިން އިން ކެޓަލޯނިއާ އަށް ދީފައި އޮތް ކޮންމެވެސްވަރެއްގެ މިނިވަންކަން، އެއްކޮށް ނިގުޅައިގަތް ވާހަކައެވެ. އަދި ކެޓަލޯނިއާގެ ލީޑަރު ކާލެސް ޕުއިޖްޑެމޮންޓް މަގާމުން ދުރުކޮށްފައެވެ. މިކަމާ ގުޅޭގޮތުން ޕުއިޖްޑެމޮންޓް ވިދާޅުވީ ކެޓަލޯނިއާ، ސްޕެއިންގެ ފުރިހަމަ ބާުރުގެ ދަށަށް ގެނައުމާ ދެކޮޅަށް ސުލްހަވެރިކަމާއެކު އިހްތިޖާޖް ކުރަން ޖެހޭ ކަމަށާއި މަގާމުން ދުުުރުކުރި ފަރާތްތައް އެކުވެގެން "މިނިވަން ކެޓަލޯނިއާ އެއް ބިނާކުރައްވަން މަސައްކަތްޕުޅު ކުރައްވާނެ ކަމަށެވެ." އުފެދޭ ސުވާލަކީ ކެޓަލޯނިއާ މައްސަލައިގައި ދެން ވާނީ ކިިހިނެއްތޯއެވެ.
