އައިއެސްގެ ލީޑަރު އަލް-ބަގްދާދީ މަރުވެއްޖެ ކަމަށް ސީރިޔާގެ ދައުލަތުގެ ޓީވީ އިން ބުނެފި

ދުނިޔޭގެ ކަމާބެހޭ ފަރާތްތަކުން ހޯދަން އެންމެ ބޭނުންވެފައިވާ އެއް ޓެރަރިސްޓް ކަމަށްވާ އަބޫ ބަކްރު އަލް-ބަގްދާދީ ވައިގެ ހަމަލާއެއްގައި ހޮނިހިރު ދުވަހު މަރުވެފައިވާ ކަމަށް ސީރިޔާގެ ދައުލަތުގެ ޓީވީން ބުނެފިއެވެ.

ސީރިޔާގެ ދައުލަތުގެ ޓީވީ އިން އިސްލާމިކް ސްޓޭޓް (އައިއެސް)ގެ ލީޑަރު އަލް-ބަގްދާދީ މަރުވެފައިވާ ކަމަށް ބުނިއިރު، މީގެ ކުރީގައިވެސް, އަލް-ބަގްދާދީ މަރުވެފައިވާ ކަމަށް ރިޕޯޓުކޮށްފައިވެއެވެ. އެހެން ކަމުން މީކިހާ ވަރެއްގެ ސައްހަ މައުލޫމާތެއް ކަން ކަށަވަރު ކުރުމަށް ކަމާބެހޭ ފަރާތްތަކަށް ވަނީ ދަތިވެފައެވެ.

އިނގިރޭސި ވިލާތުގެ މަޝްހޫރު ނޫހެއް ކަމަށްވާ ޑެއިލީ މެއިލް އިން ބުނެފައި ވަނީ ސީރިޔާގެ ރައީސް ބައްޝާރުލް އަސަދުގެ ސަރުކާރުން އަލް-ބަގްދާދީ މަރާލެވިފައިވާ ކަމަށް ބުނުމަކީ ޕްރޮޕަގަންޑާ ފަތުރަންވެސް ކޮށްފާނެ ކަމެއް ކަމަށެވެ. މިފަަހަރު އަލް-ބަގްދާދީ މަރުވެފައިވާ ކަމަށް ރިޕޯޓު ކުރެވިފައި ވަނީ ސީރިޔާގެ ރައްގާގައެވެ.

ބަގްދާދީ މަރާލި މީހަކަށް 25 މިލިއަން ޑޮލަރު ހުށަހަޅާފައިވާއިރު، ބަގްދާދީ ފިލައިގެން ހުރީ އިރާގުގެ މޫސަލް އާއި ކައިރި ސަރަހައްދެއްގައި ކަމަށް ރިޕޯޓުތައް ލިބިފައިވެއެވެ. އެހެންނަމަވެސް އިރާގު އަސްކަރިއްޔާ އިން މޫސަލް އެމީހުންގެ އަތްދަށަށް ގެނައުމުގެ ތެރޭގައި އޭނާ އެ ސިޓީ އިން ފިލައިފައިވާ ކަމަށް އިންޓެލިޖެންސް އެޖެންސީ ތަކުން ބުނެއެވެ.

މި އަހަަރުގެ ޖެނުއަރީގައި ބައެއް ރިޕޯޓުތައް ބުނެފައި ވަނީ ވައިގެ ހަަމަލާއެއްގައި އޭނާ ވަރަށް ބޮޑަށް ޒަޚަމްވެފައިވާ ކަމަށެވެ.