މީގެ ފަންސަވީސް އަހަރު ކުރިން އިންޑިއާގެ އަޔޯދިޔާގައި ހުންނަ ބާބްރީ މިސްކިތް ތަޅާލި މައްސަލާގައި ބީޖޭޕީގެ ތިން ލީޑަރެއްގެ މައްޗަށް ޝަރީއަތް ހިންގުމަށް އިންޑިއާގެ ސްޕްރީމް ކޯޓުން އަމުރުކޮށްފިއެވެ.

އިންޑިއާގެ އުއްތަރުޕްރަދޭޝްގެ އަޔޯދިއާގައި ހުރި ބާބްރީ މިސްކިތް ތަޅާލާފައިވަނީ ހަރުކަށި ހިންދޫންގެ ގިނަ ބަޔަކު އެއްވެގެން 1992 ވަނަ އަހަރުއެވެ.

ހަރުކަށި ވިސްނުމުގެ ހިންދޫން 16 ވަނަ ގަރުނުގެ ބާބްރީ މިސްކިތް ތަޅާލީ އެތަނަކީ އެމީހުންގެ ކަލާންގެއެއް އުފަންވީ ތަނެއް ކަމަށް ބުނުމުގެ އިތުރުން އެތަނުގައި ކުރިން ހުރީ ފައްޅިއެއް ކަމަށް ބުނަމުންނެވެ.

އޭގެ ފަންސަވީސް އަހަރު ފަހުން އިންޑިއާގެ ސުޕްރީމް ކޯޓުން އެމައްސަލައިގެ ޝަރީއަތް އަލުން ހިންގުމަށް އަންގާފައިވަނީ 1993 އަހަރު ބީޖޭޕީގެ ލީޑަރުން ކަމަށްވާ ލާލް ކްރިޝްނާ އަދުވާނީ، މުރުލީ މަނޯހަރު ޖޯޝީ، އުމާ ބާރްތީ އާ ދެކޮޅަށް އުފުލާފައިވާ ދައުވާއެވެ.

މީގެ އިތުރުން އޭރު އުއްތަރަ ޕްރަދޭޝްގެ ޗީފް މިނިސްޓަރަކަށް ހުންނެވި ކަލިޔަން ސިންގް މައްޗަށްވެސް ޝަރީއަތް ހިންގާނެއެވެ. ނަމަވެސް އޭނާއަކީ މިވަގުތު ރާޖަސްތާނުގެ ގަވަރުނަރު ކަމަށްވާތީ، ކަލިޔަންގެ ޝަރީއަތް ކުރިއަށް ގެންދަން އަންގާފައިވަނީ ގަވަރުނަރުގެ ދައުރު ހަމަވުމުންނެވެ.

މިހާރު އިންޑިއާގައި ވެރިކަންކުރަމުން އަންނަ ބީޖޭޕީގެ އިސްލީޑަރުންތަކެއްގެ މައްޗަށް އަލުން މި ދައުވާކުރެވެނީ ބާބްރީ މިސްކިތް ތަޅާލުމަށް ހިންދޫންގެ ހަރުކަށި ފަރާތްތަކަށް ހިތްވަރު ލިބޭ ގޮތަށް ވާހަކަ ދައްކާފައިވާ ކަމަށް ބުނެއެވެ.

އޭގެ އިތުރުން ރުޅިވެރިކަން އުފެދޭ ގޮތަށް ވާހަކަ ދައްކައި، ގައުމީ އެއްބައިވަންތަކަމަށް ގެއްލުންވާ ގޮތަށް މަސައްކަތް ކުރި ކަމުގެ ކުށުގެ ދައުވާ މި ލީޑަރުންގެ މައްޗަށް ކުރެވޭނެއެވެ.

އިންޑީއާގެ ސުޕްރީމް ކޯޓުން ނެރެފައިވާ އަމުރުގައި ބުނެފައިވަނީ ކޮންމެ ދުވަކު ޝަރީއަތްތައް ބާއްވައިގެން ނަމަވެސް ދެ އަހަރު ތެރޭ މައްސަލަ ނިންމުމަށެވެ.

ބާބްރީ މިސްކިތް ތަޅާލުމުގެ ތުހުމަތުގައި 20 މީހެއްގެ މައްޗަށް ވަނީ ދައުވާ އުފުލައިފަ އެވެ.

ބާބްރީ މިސްކިތް ތަޅައިލި މައްސަލައިގައި އިންޑިއާގެ ދެ ކޯޓެއްގައި ދެ ދައުވާއެއް އުފުލި އެވެ. އެއީ އެމިސްކިތް ތަޅައިލަން މީހުންނަށް ހިތްވަރު ލިބޭ ގޮތަށް ވާހަކަ ދެއްކުމުކުގެ ކުށުގައި ރާއީ ބެރިއެލީގެ މެޖިސްޓްރޭޓް ކޯޓުގައި އުފުލި ދައުވާ އާއި މިސްކިތް ތަޅައިލި ކަމުގެ ކުށުގައި ލަކަނޫގެ ކޯޓްގައި އުފުލި ދައުވާ އެވެ. ނަމަވެސް ބީޖޭޕީގެ ލީޑަރުންގެ ޝަރީއަތް ދެން ކުރާނީ ލަކްނޯގަ އެވެ.